احوالات حضرت معصومه در ورود به قم و گریز به شام(من کلام : صحاف)

ای درد غربتیله اولان باغری قان خانیم

دلدن شرار آتش هجره یانان خانیم

اهل قبیله ائل وطنیندن جدا اولان

قارداش جمالینه گوزی حسرت قالان خانیم

کان حیا و عصمت و گنجینۀ وفا

خورشید چرخ عفت و عرش آستان خانیم

معصومۀ زمانه و مظلومۀ جهان

ریحانۀ پیمبره همنام اولان خانیم

گلمز مقام و شأن و جلالون تصوّره

وار کیمده بو جلالت و بو عزّ و شان خانیم

بنت امام اُخت امام عمۀ امام

حیراندی عقل شانیوه ای باغری قان خانیم

ایلر طواف قبرون ئوپر آستانه وی

شام و سحر ملائک هفت آسمان خانیم

بو صحن و بو رواق بو ایوان زرنگار

ایلوب بو قم دیارینی رشگ جنان خانیم

قبرین گورن بهشت برین ائتمز آرزو

دوشمز خیال جنته تا وار جهان خانیم

یاد ایلدوقجا حالیوی قانه دونر گوگول

بی اختیار اولور یوزه اشکیم روان خانیم

شهریزدن آیریلاندا سنی سالدیلار یولا

چوخ عزت و جلالیله پیر و جوان خانیم

طیّ منازل ایلدون آغلار گوزیله سن

باشدا هوای وصل امام زمان خانیم

قارداش دالینجا چوللره دوشدون فغانیله

هم ناله اولدولار سنه لاهوتیان خانیم

وارد اولاندا عزتیله قم دیارینه

چخمیشدی پیشوازیوه مرد و زنان خانیم

الده گلاب شیشه لری عود مجمری

شا باش ایلردیلر باشیوا گول عیان خانیم

آلمیشدیلار کجاوه وون اطرافینی تمام

بعضی دعا و بعضی ویرردی اذان خانیم

قرآن اوخوردولار قاباقونجا نظاملن

آچمیشدیلار تلاوته نطق و بیان خانیم

دوشموشدی بیر منادی قاباقدا چکوردی جار

شهر اهلینه ویروردی سنی کیم نشان خانیم

آگاه اولون بو شهره امام عمه سی گلور

موسی الرضا باجیسی ملک پاسبان خانیم

باب الحوائجون قیزیدور احترامینی

واجب ایدوبدی خلقه حقِ مستعان خانیم

اما اولاندا وارد شام آل مصطفی

چخمشدی پیشوازه هامی شادمان خانیم

عَمَّه ن بتوله نایبه زینب علی قیزین

بیر پیشواز ائتدی او گون شامیان خانیم

اللرده چنگ و بربَط و طنبور نای و نی

آغلار او حاله ایندیده قدوسیان خانیم

گَه کول توکردیلر باشینا گاه اودلی نی

ویران اولیدی کاش بو کون و مکان خانیم

گاهی دیردیلر که بولار خارجیدولر

نه حاله دوشدی اوندا او بی خانمان خانیم

قرآن اوخوردی نیزه ده لَحن حجازیله

رأس مُنیر پادشه انس و جان خانیم

بیر داش آتوب عجوزه دگوب سجده گاهینه

دلدن دوشوب آخوب یوزونه تازه قان خانیم

گوردی او حالی زینب عُلیا مخدره

عرشه اوجاتدی شیون و داد و فغان خانیم

بی اختیار چالدی باشین چوب محمله

قانه بویاندی زلفی یوزی لاله سان خانیم

« صحّافه » ایله گوشۀ چشمونله بیر نظر

مدتدی درد الیندن اولوب ناتوان خانیم

ویرّم سنی امام رضا جانینه قسم

قیل چاره دردیمه ئوزون ای مهربان خانیم

دریای لطف سن صِله می ایله تئز عطا

تا وار حیات اولوم سنه من نوحه خوان خانیم

اولما رضا حضور امام رضاده من

سندن آچوم شکایته بیرده زبان خانیم

صِدقیله پاک درگهیوه دوشموشم دخیل

مأیوس اولوب بیری بو قاپودان هاچان خانیم

 

 

/ 0 نظر / 238 بازدید