زینب آغلار گجه گوندوز سنه ایوای آناوای

آناسیزلیق غمی بسدور منه ایوای آناوای


زینب آغلار گجه گوندوز سنه ایوای آناوای

آناسیزلیق غمی بسدور منه ایوای آناوای

ای بلاکش آنا چکدون او قدر محنت و غم

که بو آز وقتیده اگدی قدیوی بار الم

کیمدی سن تک آغاران زلفی، اولان قامتی خم

صبر ایدن هر ستم دشمنه ایوای آناوای

آنا سالدوقجا گورن گونلریوی یادیمه من

چوخالور بو دل زاریمده کی اندوه و محن

اوز ایوین سهلیدی قویمازدیلا صحراده ده سن

بیر دویونجا گله سن شیونه ایوای آناوای

دوقّوز ایل چکدون آتام حیدر ایوینده دم آنا

بو قدر مدّتی غم یتدی سنه هردم آنا

مونس آه سحری، ناله ی شب همدم آنا

گورونوب هانسی بلاکش زنه ایوای آناوای

باخورام برج جلالتده ایشیق کوکبیوه

یانورام دلدن آنا باشداکی چادر شبیوه

مایه ی غصّه دی بو نکته زبس زینبیوه

عمریم اولسا دیرم من سنه ایوای آناوای

ایتمدون جسمیوه پیرایه زر و زیوریله

خوش گیچیندون هامی عمرون سن آتام حیدریله

آج قالوردون گجه گوندوز آنا اوچ گونلریله

صبر ایدوردون دایانوردون گینه ایوای آناوای

بسلدون گل تک حسینیله حسن قارداشیمی

سهلیدور قویمازیدون منده توکم گوزیاشیمی

باشیم اوسته یری وار یولسام اُلونجه باشیمی

توکسم اوز زلفیمی پیرامنه ایوای آناوای

وقت رحلتده اگرچه او رسول مدنی

سالم اعضائیله بو امّته تاپشوردی سنی

قوروسون قویمادی ثانی آنا جدّیم کفنی

قولّارون دوندی گل سوسنه ایوای آناوای

اولمادی ثانی رضا گولماقا بیر لحظه یوزون

اود ووروب اودلادی درگاهیوی، آغلاتدی گوزون

محسنون سقط اولوب آخِر قالوب آغزوندا سوزون

آغلارام حشره کیمی من سنه ایوای آناوای

نگران قالما گله نائبه ام منده سنه

مین بیله غم یته هر آنیده هر دمده منه

نلر ایلر بولورم امّت حسین و حسنه

دیرم سنسیز آناوای منه، ایوای آناوای

حسن اوّل بولورم ظلمیله مسموم اولاجاق

محنتینده هامی عالم آنا مغموم اولاجاق

اوز یرینده وطنینده ایله مظلوم اولاجاق

دونه جاق بیر پوزولان گلشنه ایوای آناوای

باشه یتمز نه دیوم چوخدی بلاسی باشیمون

کربلا قصّه سی وار منله حسین قارداشیمون

گوره سن موجینی دریا کیمی بو گوزیاشیمون

اونداکی گلدون همان مسکنه ایوای آناوای

عقل حیران قالی شمرین آناجان کینه سینه

گه چخار اوغلون حسینین یارالی سینه سینه

قویاز اوز نحس ایاقین سرّ حق آئینه سینه

بولمز هرگز یتیشوب ایمنه ایوای آناوای

تاپشوروب چون آنا جدّیم بو سوزی امّتینه

گوسترور سو هامی قربانه او سوز حرمتینه

اوز حسینی ویری جان تشنه گیدر خدمتینه

لعن حق، زاده ی ذی الجوشنه ایوای آناوای

بی وفا امّت آنا سانما جفادن دویاجاق

تشنه باشین کسه جاق سهلیدی رختین سویاجاق

کهنه بیر پیرهن اوسته اونی عریان قویاجاق

ایمدیدن یانّام او پیراهنه ایوای آناوای

راه جاناندا حسینون بیله بیر جوده گلر

که ایله جود تعجّب هامی موجوده گلر

او سلیمان بولی بجدل که نه مقصوده گلر

ویری بارماق اوزوک اهریمنه ایوای آناوای

آغلا صافی گوره هر کیمسه نین آغلاردی گوزی

ویره جاق گوزیاشینون صاحبی بول اجرین اوزی

ذکر قیل زینب مظلومه دلینجه بو سوزی

آناسیزلیق غمی بسدور منه ایوای آناوای