او آغلیان گوزیوه زینبون فدا آناجان

بو نوعی ایلمه چوخ ناله و نوا آناجان


او آغلیان گوزیوه زینبون فدا آناجان

بو نوعی ایلمه چوخ ناله و نوا آناجان

ندندی گل یوزیوه گوز یاشین روان ایدوسن

بو زار و خسته نی دیندیر سنه فدا آناجان

سولوبدی رنگ رخون ایلوسن ندن شیون

اورکده ساخلاما دردون ده برملا آناجان

بهار ابری کیمی گوزلرون دولوب گورورم

که یاغدیرور منه غم بیله بیر هوا آناجان

سن ای پیمبره ریحانه مفخر عالم

سنیله فخر قیلوب ختم الانبیا آناجان

سنون مقامیوی بُلموب بو بی وفا امّت

اولوبدی امّت مرحومه بی وفا آناجان

هلال یکشبه تک گوزلرون دوتور آچیلور

نقدری سختیدی دردون که یوخ دوا آناجان

بهار عمریوی بو روزگار ایتدی خزان

که قالمادی داخی گلزاریده صفا آناجان

اوزون خدایه حبیبه، رسوله ریحانه

یقین که حکمتی واردور دوزر خدا آناجان

ایوین چراغی سوننده دوتار اتاقی ظلم

سنون بو اُلماقون ایلر ایوی قرا آناجان

خدادن ایستوسن هر بیر فریضه ده اُلومی

منی چوخ آغلادوری ایتدیقون دعا آناجان

نه تیز دویوب بو جهاندان بیزی قویوب گیدوسن

چتیندی زینبوه بیله ابتلا آناجان

نه درک ایدر بُله ثانی سنون جلالتیوی

قصور فکریله ویرمز سنه بها آناجان

گوروم او ظالمین اولسون داخی عذابی شدید

خدادن ایلمدی شرم او بی حیا آناجان

گوزومله گوردوم اوزوم ووردولار سنی قاپودا

اوجاتدون اوندا گویه نی کیمی نوا آناجان

قاپیوی یاندیروب هم ایتدیلر سنی مصدوم

چیخا محال یادیمدان او ماجرا آناجان

آتام علیدن او گُل صورتون نهان ایلدون

که سالمیا دله غم شاه لافتی آناجان

اگرچه آگهیدی شیر لم یزل غمیوه

محالیدور اولا بو سرّ اختفا آناجان

ایله وجوده که طاها دیردی امّ اَبی

او ظلمی گوردوله بُلمم نجه روا آناجان

اودون شراره سی یاندیردی دربو دیواری

همان شراره دن اودلاندی نه سما آناجان

آتام علینی چکن وقته مسجده دشمن

نه ظلم اولوندی اونی ایلدون رها آناجان

وظیفه بُلدون امامین کمک لیقون اوزیوه

یوخیدی گرچه وجودونده هیچ قوا آناجان

او حالیلن گنه دوردون ایاقه حولیلن

حجاب حرمتینی ایلدون بقا آناجان

باشوندا محکم ایدوب چادری دیدون قویمام

امامی تک لیله لر فرقه دغا آناجان

بابام که هانیه ویرمیش لقب سنه دوزدور

سنه سزادی فقط بیله ارتقا آناجان

بو نیّتیله آتام گورمه سون سولان یوزیوی

یوزوندن ایلمدون چادرون جدا آناجان

دوشوبدی مشکله صدری بیزه توسل ایدوب

خدادن ایسته ایده حاجتین روا آناجان