گوزومده غم گتیرور موجه اشک دریاسین

دین زمان حسن عسکری قضایاسین


گوزومده غم گتیرور موجه اشک دریاسین

دین زمان حسن عسکری قضایاسین

اولیدی کاش بو معموره روزگار خراب

ایدنده معتمد دون جفایه فتح الباب

ایدوب امام زمانین آتاسینی مسموم

دوتوبدی رعشه وجود شریفی چون سیماب

گیچنده سال قمردن ایکی یوز آتمش ایل

اولوبدی جدّینه ملحق وصیّ ختم مآب

ربیع الاوّل آیی, روز جمعه، هشتم ماه

بو شاه دینون اولوبدی منامی تیره تراب

بیله روایت ایدور اول شهین غلامی عقید

که مندن ایستدی سو اول سلالة الاطیاب

حضورینه او شهین آب مصطکی گتدیم

ولیک رعشه امان ویرمیوب اولا سیراب

قویوب یره دیدی سو ویر ایدوم وضو تجدید

امام عصر اُلنده گتوردی کاسه ی آب

زمان صبحیدی ایتدی وضوسینی تجدید

نماز صبحی ادا ایتدی پور امّ کتاب

دوباره آلدی اله آب مصطکی ایچسون

یتوردی لبلرینه خسرو سپهر غباب

ایدوبدی رعشه الی، دگدی کاسه دیشلرینه

صعوبتیله ایچوب سو شفیع یوم حساب

عظش حرارتینی سوندوروب تمام اولدی

بو شرح غم گینه الدن آپاردی طاقت و تاب

حسینه اولمادی بیر کیمسه بیر ایچیم سو ویره

دیه یارالیدی، قلبین عطش ایدوبدی کباب

بیله روایت ایدور بو سوزی ابوالادیان

اونون دلینجه ایدوب ثبت معتبر کتّاب

دیر امام حسن یعنی اون بیریمجی امام

منی حضوره چاغوردی بو نوعی ایتدی خطاب

واریمدی بیر نچه نامه آپار مداینه سن

اوتوز گونون اولی نصفی سنه ایاب و ذهاب

گلنده شهره گوررسن قیامت عالمیدور

ایدوبدی چاک گریبان تمام شیخیله شاب

دولوب فغان و نوائیله شهر شامرّه

او دمده داعی حقّی بول ایتموشم ایجاب

دیدیم آتام سنه قربان خدا نکرده اگر

بو ایش اولا، سنه کیمدی وصی، ویردی جواب

او کس که ایستیه سندن جواب نامه لری

امام مفترضُ الطّاعه دور او عرش جناب

دیدی بیر آیری علامت بویور، دیدی هر کیم

قیلا نمازیمی بولسون امام اونی احباب

دیدیم بیر اوزگه علامت، دیدی که همیاندا

ویره او کس که مُطلّائیله طلایه نصاب

خیال ایتدیم ایدم عرش هانسی بیر همیان

دوتوب وجودیمی رعب امام و بیم عتاب

مرخّص اولدوم امام هدی حضوریندن

گیدوب مداینه قیلدیم مراجعتده شتاب

منیم مسافرتیم جمله چکدی اون بش گون

یتنده شهره نه گوردوم جهان اولیدی خراب

فغان و شیونیله سُرَّ مَن رَآی دولودور

ملال بحریدی، مردم او بحر ایچینده حباب

امام رحلت ایدوب صحنیده ویرولّر غسل

اَنَا الامام دیور خلقه جعفر کذّاب

دیدیم من اوز اوزیمه بو امام هاردان اولور

و حال آنکه قمار بازیدی ایچردی شراب

عقید گلدی دیدی ایتدیلر امامه کفن

نماز قیل دوزولوبدور صفه تمام اصحاب

نمازه جعفر کذّاب ایلینده شروع

حقیقتین گونی یوزدن کناره چکدی سحاب

طلوع ایلدی دولت سرای والادن

صغیر سنّیله بیر آفتاب عالمتاب

جبین گشاده و دندان گشاده، گندمگون

جمالی گون کیمی طالعدی، زلفی پرخم و تاب

گلوب وقاریله دوتدی عباسینون اتگین

بویوردی جعفره یاعمّ ایتمه بیله شتاب

آتام نمازینی قیلماقلیقا من اولایم

چکیل کناره، او بی شرم او طفله اولدی مجاب

نمازی قیلدی همان سیّد جلیل القدر

امامی قبره قویوب قلب پاکی اولدی مصاب

دونوب بویوردی منه ویرجواب نامه لری

او طفله ردّ ایلدیم، غائب اولدی اول مهتاب

دیدیم من اوز اوزیمه بو ایکی علامتیدی

منه گیدنده بویورموشدی شاه ذوالانساب

او گیر و داریده بیر دسته اهل قم گلدی

امام موتینی بولدی او باوفا احباب

سوال ایتدیله کیمدور وصی، دیدی حضّار

امام قارداشی جعفر اولوب امام صواب

گلوبله جعفر کذّابه تهنیت دیدیلر

سواله ایتدیله بو دللریله فتح الباب

بویور گوراخ سنه کیمدن گتیرمیشوخ نامه

نچه ویروبله بیزه ایله امره کشف حجاب

دوروبدی جعفر ایاقه تغیّریله دیدی

مگر امام بولر غیبی یا اولوالالباب؟

غلام حضرت حجّت چخوب او ساعتده

ایدوب امام زمان قولیجه او جمعه خطاب

ویروبدی نامه لری سیزلره فلان و فلان

منه آچوبدی خدا علم غیبیدن ابواب

امام مالیدی، واردور یانوزدا بیر همیان

مین اشرفی وار ایچینده به سان دُرّ خوشاب

ولی او کیسه ده اون اشرفی مطلّادور

خیال ایدوبدیله من بولمرم چکوبله نقاب

او جمع سویلدی هر کیم که گوندروبدی سنی

اودور امام زمان بیزلره مَلیک رقاب

گیدوب خلیفیه جعفر بو وضعی ویردی خبر

ایدوب خلیفه نی بو ماجرائیله اعتاب

خلیفه امر ایلدی حجّت الَّلهی دوتالار

او دودمانه هجوم آور اولدی اهل عذاب

ایکی امام اُلن گون توکولدیلر ایوینه

حیالی عترتی توکدی عذارینه خوناب

بیری امام زمان صاحب الزّمان آتاسی

بیری حسین او که قانیله شَیبی اولدی خضاب

چکیلدی جار حسین اُلدی وقت غارتدور

توکولدی خیمه لر اوسته سپاه کینه مآب

سویولدی زینب کبری باخوب او حاله یانوب

صفیّه عاتکه لیلا سکینه نازلی رباب

نه غارت، ایتدی قیامت قیام زهرایه

مخدّراته بویون باقی اولدی قید و طناب

وورولدی سیّد سجّاد بوینونا زنجیر

گوزیندن اولدی روانه سرشکی چون میراب

او توزلی قبره حسینی اولوبدی چوخ مشتاق

دوزت وسایلینی یا مُسَبِّب الاسباب

اولوبدی جدینه ملحق وصی ختم مآب