منه امام زمان شامل ایتسه رافتینی

آتاسینون یازارام قصه ی ولادتینی


منه امام زمان شامل ایتسه رافتینی

آتاسینون یازارام قصه ی ولادتینی

سبب گوزوم یاشینا قلبیمون کدورتی دور

سالان فشاره منی امریمون صعوبتی دور

محیط بحر بلایم، محاط درد و الم

همیشه مضطرب اولماق غریقون عادتی دور

بیر اضطراب تاپوب جسم عنصریده وجود

که امتدادی منیم روحیمون اذیّتی دور

خدادن اوتری ویرن یوخدی ناخدایه خبر

ترحّم ایله بونون موسم هلاکتی دور

سفینه دن اوزولوبدور الی بو بدبختین

اُلوم زمانه ده بدبختلر سعادتی دور

یوخومدی چاره امام زمانه یالوارّام

ویرن نجات اونون لطفیدور کرامتیدور

یازام آتاسینون احوالینی گرک باشدان

آلان قراریمی الدن اونون محبّتی دور

ائمّه ایچره ایکیمجی حسندی صاحب حُسن

سبب گوزل آدینا حسنی دور وجاهتی دور

بونون آتاسی علیّ النّقیّ هادی دور

اونون با پاک خلف وارث هدایتی دور

یازولّا بعضی کتبده آناسینی سوسن

سلیل بعضی محدّثلرین کتابتی دور

علیحده خبریله حدیث دور اسمی

عجب جلالتی وار، موجبی او عفّتی دور

آدی حسن، هامی اخلاقی اسمی تک احسن

خدای لم یزلین اون بیریمجی حجّتی دور

زکیّ و هادی و هم عسکری ملقّب دور

ابومحمّد عربده بونون کنیّتی دور

یازولّا مولَدینی سُرَّ مَن رَآی بعضی

مدینه شهریده بعضی لرین حکایتی دور

تولّدینده بونون مختلف خبرلر وار

صحیحی لیک مفیدین همین عبارتی دور

ایکی یوز اوتوز ایکی ایل گیچنده هجرتدن

ربیع الاوّل آیی موسم ولادتی دور

ربیع دوم آیی روز جمعه هشتم ماه

قویوب جهانه قدم، مجلسی روایتی دور

بیله روایت اولوبدور امام صادقدن

ائمّه نین بو روایت دلیل عزّتی دور

همینکه ایستدی حق بیر امامی خلق ایلسون

هامی ائمّه ده بو شیوه حق مشیّتی دور

هبوط ایدر یره بیر قطره زیر عرشیدن آب

خدای لم یزلین مطلق آب رحمتی دور

دوشر او سو یره بیر میوه اوسته یا علفه

امام آتاسینون اول پاک میوه قسمتی دور

امام نطفه سی اول میوه دن تاپار تشکیل

نه روحینه، جسده بو اساسِ خلقتی دور

امام روحی اولونماز قیاس ارواحه

سالان تحیّره کونینی معنویّتی دور

قولیندا ثبت اولی تَمَّت کَلِمَةُ ربِّک

خدای خلقین او خط دستخطّ قدرتی دور

امامته او علامت دلیل قاطع دور

ائمّه نین بو بیان مُثبِتِ امامتی دور

امام افضل و هم اشجع خلایق اولور

امام خلقه خدای جلیل آیتی دور

امام آینه ی رهنمادی مخلوقه

امام بنده لرین قبله ی عبادتی دور

امام نوریدی، ماهیّتین بشر بولمز

خدا بولر که امامت کیمون لیاقتی دور

گیچاق بو صحبتی، بو صحبتین محلّی دگل

مرامیمیز حسن عسکری شهادتی دور

زبسکه اَورَعیدی اَزهدِ خلایقیدی

اودور صحیفه ی تاریخه زیب طاعتی دور

نه تک محبّلری بو امامه مادحیدی

عدولرینده بونون ذکری بزم زینتی دور

بو شان صاحبینون حقّین آلدیلار الدن

دچار اولوب او که دشمنلرین اذیّتی دور

باباسی حیدر کرّار تک ایدوب عزلت

تقیّه ارثیدی چون جدّینون شریعتی دور

بو هاشمی نسبی چوخ سخوب بنی عبّاس

ایدن تحمّله وادار حق رضایتی دور

ایدوب بو سروری آخِرده معتمد مسموم

او ظالمین بو ستم نخوتِ خلافتی دور

همینکه زهر جفا ایلیوب امامه اثر

بولوب خلیفه امامین زمان رحلتی دور

ایدوب خوّاصینی اظهار گلدی بیر نچه سی

اولار که محرم اسرار بزم خلوتی دور

دیدی مریضیدی ابنُ الرّضا دیولّر اُلور

گیداخ عیادتینه موسم عیادتی دور

گلوب حضور امامه او شوم بی ایمان

دیمه عیادته باعث اولان ارادتی دور

خیال ایدوبدی اوزین اتّهامیدن قوتارا

سبب بو گلماقینا دلده کی عداوتی دور

 

چاغوردی قاضی قضّاتی دوتدی استشهاد

دیدی نظر منه بو عدّه نین شهادتی دور

باخون وجودینه اصلا یتیشمیوب صدمه

اگر اُله سببی درد سقم شدّتی دور

دیولّه خلق خلیفه بونی ایدوب مسموم

خلایقین منه بو سوز کمال تهمتی دور

طبیب گتدیله ایتدی معاینه یازدی

سبب همین مرضه ضعف عنصریّتی دور

ولیک بولمدی زهریله دوغرانوب جگری

او اضطرابه سبب قلبینون حرارتی دور

دیدی سو ایچره گرک مصطکینی قِینده لر

اگر ایچه مرضین احتمال صحّتی دور

طبیب گیتدی، جماعت داغیلدی، قالدی امام

دله موثّر اولان ماجرای غربتی دور

مدینه شهری دگل جمع اولا بنی هاشم

غریب دور وطن و ائل قبیله حسرتی دور

ایکی امامه ایدوب قاتلی طبیب احضار

ایکی خلیفه ی جورین بو امر شرکتی دور

بیرینی معتمد دون بیریسینی هارون

گوروب که گوردوقی ایش رخنه ی ریاستی دور

گتوردی مجلسه موسی بن جعفری هارون

گوروب طبیب مرض زهر کین سرایتی دور

دیدی بو ناخوش اوزی اوز قضیّه سین بولوری

خلیفه نین بو قضایا یقین سیاستی دور

ایدوبدیلر بونی مسموم گیزلدولّه ولی

بو قصّه قاتلینون منتهای جودتی دور

پوزولدی مجلس، ایاقه دوروب هامی گیتدی

گوروبدی سند عجب انتقام فرصتی دور

ایاقیله الیله بولمورم نه ظلم ایلدی

او ظلمی فاش ایده آیا کیمون جسارتی دور

بدن ضعیف، لگد قوّه لی، امام مریض

بو ظلمه سندی جری ایلین قساوتی دور

ویروبدی سنده بو مشقی ازلده شمر دنی

او ظالمین بو ستم اوّلین اشارتی دور

اودا حسینی ووروب چکمه لی ایاقیله

خیاله سالمادی پیغمبرین امانتی دور

کسیلدی باشی لب عطشان عزیز زهرانون

سوسوز شهادته باخ مایه ی شرافتی دور

اوزین حسینه ایدوب خونبها خدای جلیل

همان اَنَا دِیَتُک مُثبِتِ جلالتی دور

اوجالدی گون کیمی باشی جدا بویوندا دوروب

قضا دیدی بو گون آل اللهین قیامتی دور

توکن صحیفیه دُر خامه ی حسینی دور

حسین نوکری سعدی زمان هویّتی دور

ولیک مُلهِمی روح القدسدی باطنده

قلمده بیله تسلّط خدا عنایتی دور

اسیر ایدن قلمی خطّ سیریدن چخادان

بتول نائبه سی زینبین اسارتی دور

یارالی سینمه یاره ووران یارا اوستن

حسین سینه سیدور، دورت مین اوخ جراحتی دور

ایدن توانیمی یغما قراریمی تاراج

حسین خیامیدی، شمرین جفای غارتی دور

یانان خیام اودیدور اود ووران یانان جگره

بو آغلیان گوزوم آرام قلب آفتی دور

ایدوبدی غصّه گلوگیر چخموری نفسیم

ویرن نفس منه بو قانلی باش تلاوتی دور

حسین آدیله عزاخانه لرده داد ایدرم

مقصّرم، نظریم فاطمه شفاعتی دور

تمام ایدوم یوزیمی ایتمسون ازلکی سوزوم

فقط اشاره حسینی لرین کفایتی دور

دیوم امام زمانین آتاسینون حالین

گوزوم یاشی او شهین عمده سرسلامتی دور