گل گلزار ولا نخل امامت ثمری

اسوه جود و کرم باغ کرامت شجری


گل گلزار ولا نخل امامت ثمری

اسوه جود و کرم باغ کرامت شجری

نام زیباسی حسن بحر ولایت گهری

سبط طاها گل زهرا نسبا مرتضوی

اشجع الناسیدی البتده سیاستده قوی

شیر میدان شجاعتدی حسن نور جلی

جان پیغمبر و فرزند سلحشور علی

ماه شبهای مدینه نجبانین  گوزلی

اونی تائید ائلیوب حی توانا و قدیم

آدی مشهوریدی دللره کریم ابن کریم

جنگ ایده صلح ایده مولادی جلالت واریدی

شه اقلیم هدایتدی امامت واریدی

کربلا شاهینه رهبردی ولایت واریدی

بعضی سوزلر دانیشور مردم نادان و جهول

که ندن صلحی او حالتده حسن  ائتدی قبول

او حسن که دو جهان منزلت و شوکتی وار

باغ زهرا گلیدور عزتی وار عصمتی وار

مصلحت بیلدی که صلح ائلیه چون حکمتی وار

مدعی سن نه بیلورسن حسنون قیمتینی

گئت سوروش فاطمه دن رتبه و شخصییتینی

صلح اگر ایلمه سیدی او شه عرش مکین

شیعه نین نسلینی کسمیشدی معاویه یقین

صلحیله حفظ ائلدی مکتبی اول سرور دین

صلحیله خدمت شایان ائلدی قرآنه

قویمادی صدمه یته سوره الرحمانه

گر چه مستغرق دریادی محندور شیعه

پیرو آل عبا حقی دیندور شیعه

تا قیامت ولی مدیون حسندور شیعه

مرتضا اوغلیدی شان و شرف و شوکتی ار

شیعه نون بوینونا الحق آقامون منتی وار

اولماسیدی حسنون صلحی صفاده یوخیدی

خامس شیر دل آل عباده یوخیدی

شهداده یوخیدی کرب و بلا ده یوخیدی

شرف و جاه و مقام شهدا اونداندی

کربلا اولدی اگر کرب و بلا اونداندی

حیله لر ائتدی معاویه او ملعون دنی

حسنون اولدی فزون قلبیده درد و محنی

بی وفا چخدی جماعت داغیلوب انجمنی

صلح تحمیل اولونوب حضرته امضا ایلدی

آل سفیانی او امضائیله رسوا ائلدی

او امامی که ولایت واریدی  مهر و مهه

امرا خائن اولوب ائتدی خیانت او شهه

رشوه لر وئردی معاویه سران سپهه

اکثری بیر کیسه سیم و زره دینون ساتدی

تک قویوب فاطمه اوغلون آناسین آغلاتدی

ترک جنگ ایلدی اجبارا او سلطان زمن

گوردی لشگر داغیلوب پوزدی اونی درد و محن

گوتدی قارداشلارینی یثربه تا گلدی حسن

توکولور گوز یاشی رخسارینه چوخ زار و غمین

گجه نین عالمی یوز قویدی بقیعه شه دین

دوشنوب فاطمه نین قبرینه دلخسته و زار

عرض ائدوب من حسنم اولدوم آنا درده دچار

گجه نین عالمی سس وئر بالووا ائتمه فگار

دردمندم بیلوسن درد و بلادن یانورام

چوخ سوزوم وار اورگیمده یانورام اودلانورام

شوقیله عطر دل انگیزیوی من آلدیم آنا

قبرون اوسته ئوزومی حسرتیله سالدیم آنا

بی وفالر منی ترک ایلدی تک قالدیم آنا

بلبل خسته کیمی من گنه گلدیم چمنه

گجه نین عالمی سس ویر باری اوغلون حسنه

خون دل حسرتیله اشگیمه دائم  قاتارام

ایچرم زهری آنا عالمی گوزدن آتارام

قویمارام تک قالاسان منده بقیعده یاتارام

مدفنیم خاک بقیعدور یاتارام دلده محن

سنی تک قویماز آنا حشره کیمی اوغلون حسن

مجتبانی بو فلک جبریله مظلوم ائلدی

یاندیروب قلب شریفین اونی مغموم ائلدی

همسر زهر ویروب حضرتی مسموم ائلدی

 سویی میل ایلدی زهرین گورونوبدور اثری

پارچالاندی ئورگی طشته توکولدی جگری

گلدی قارداشلاری صبحه کیمی دل داغلادیلار

سس وئروب زینبه هی اشکی یوزه باغلادیلار

وای حسن وای دیدیلر حسرتیله آغلادیلار

قارداشین گوردی همان حالیده دلخسته حسین

حسنون باشینی آلدی دیزی اوستونده حسین

مجتبی باخدی حسینه غمی شدت ایلدی

تاپشیروب قاسمی قارداشینه صحبت ایلدی

دولدوروب گوزلرینی نچه وصیت ایلدی

قیل توجه دئدی قلبیمده اولان احساسه

قاتلیم جعده نی اما دئمیون عباسه

مجتبانین محن و محنتی چوخ آز اوخونار

علتین عرض ایدورم من بو ایشین حکمتی وار

اوزی عاشقدی حسینه او شه نیک تبار

دائما اذن وئرر حسرتیله گوز یاشینا

حسن آغلار ئوزی اللرده ئولن قارداشینا

ئوزی ایستوردی غم و غصه سی پنهان اولسون

تا حسین قارداشینون محنتی عنوان اولسون

یا حسین صوتی چکوب عرشه نمایان اولسون

حسنون قالمادی نعشی قوری یر اوسته عیان

یوخودی قلب شریفینده اونون داغ جوان

ایکی قارداش چوخ عجبدور که بیر اوتدان یاندی

او سو ایچدی اثریندن جگری دوغراندی

بو چوخور یرده یخیلدی اورگی اودلاندی

بیلدی اول دم شه عالم اله مطلب گوردی

نه گوروب سرعتیله مقتله زینب گوردی

صادقی ایله امام حسنه عرض ملال

چون کریم النجبادور ائلمه آیری خیال

آناسی فاطمییه آند ویروب حاجتون آل

دردوی عرض ایله شایسته دوا وئرسین آقا

بیر بقیع بیرده سنه کرب و بلا وئرسین آقا