مجذوب ایدوب پیمبری شوق وصال یار

ایستردی باغلیا سفر آخرتله بار


مجذوب ایدوب پیمبری شوق وصال یار

ایستردی باغلیا سفر آخرتله بار

احضار قیلدی فاطمه نی باسدی باغرینا

دیندیردی خوش دلیله ایدوب لطف بی شمار

بیرده گتوردی قویدی دوداقین دوداقینه

آهسته سمعینه دیدی گویا او شهریار

چوخ تزلیقیله ملحق اولارسان منه قیزیم

بیله پوزولما آغلاما چوخ اولما اشگبار

بو مژدنی آلاندا اولوب شاد فاطمه

آرام دوتدی اودلی دلیندن سونوبدی نار

هر دم ویرردی ضعف رسول کرامه یوز

آثار مرگ اولوردی جمالینده آشکار

ناگه قاپی دوگولدی چخوب دیشره فاطمه

گلدی قاپی دالندا دوروب حالتی نزار

فرمایش ایتدی کیمسن ارادون ندور سنون

ویردی جواب قاصدم ای معدن وقار

محبوبدن حبیبینه واردور رسالتیم

ضمن عیادتیمله اولار نکته آشکار

زهرا بویوردی باب کباریم مریضدور

ممکن دگل عیادت سلطان تاجدار

صوت مهیبیله دیدی وارد اولام گرک

ایتدی او صوتیله دل زهرانی بیقرار

چوخ مضطرب قیتدی پیمبر حضورینه

عرض ایتدی ماجرانی او محزون و دلفگار

فرمایش ایتدی ملک الموت دور قیزیم

ایلر او عمر رشته لرین پاره تار تار

زهرا اودور که یاری سالار آیری یاردن

ایستکلینین الیندن اوز ایستکلی سین آلار

قارداشی قارداشیندان آتادن اوز اوغلونی

هر بیر آنانی قیزدان اودور ایلین کنار

هر خانمان چراغینی خاموش ایدن اودور

شمع عزا اودور ایدن ایولرده شعله بار

بر هم ایدن اودور هامونین عیش و عشرتین

عیشی پوزار هر ایوده عزا بزمی قوردورار

دلده قویان اودور هامونین آرزولرین

قویماز اولا جهان ده بیر کیمسه کامکار

لذتلری آلان اودی هر بیر مذاقدن

شیرینی تلخ ایدندی تاپوب صیت و اشتهار

هر بیر یارانمیشی اودی کیم قبض روح ایدر

باخماز گدادی یا شه دارای اقتدار

باغلی دگل اونا قاپیلار وارد اولماقا

واردور یولی هامی ایوه بی نشر اختیار

ساخلار ولی سنون قاپوین احترامینی

ایستر اجازه سندن او مامور کردگار

گلموش یقین قیزیم منیده قبض روح ایده

دعوت ایدوبدی اوز آتاوی مهربان نگار

بو سوزده ضعف ویردی رسول خدایه یوز

گورسندی گل یوزینده علامات احتضار

دوزدی جبینه قطره به قطره اولوم تری

یعنی که باغلورام سفر آخرتله بار

جان اوسته مصطفی باشی اوستونده مرتضی

قرآن اوخوردی معنی قرانه اشکبار

زهرا دئیردی وا ابتا شور و شینیله

گوزدن توکردی عارضینه در شاهوار

صاقدا حسن صولوندا حسین بن فاطمه

هر تک تکی سیزیلدیوب آغلاردی زار زار

بیر پنج تن یغیشدیلا بو یرده بیر یره

کرب و بلاده بیرده بو امر اولدی برگزار

او ساعتیکه دوشدی آتندان حسین یره

لب تشنه دلشکسته بدن خسته زخمدار

الده عمامه حاضر اولوب جدی مصطفی

باشی آچوخ آتاسی علی شیر کردگار

مسموم زهر کینه امام حسن گلوب

زهراده خم قدیله او دشته ایدوب گذار

جمع اولدیلا حسین یخیلان یرده پنچ تن

فریاد وا حسینیله دللرده آه و زار

زهرا نه حاله قالدی ایا صاحب الزمان

حلق حسینی گوردی اوپر تیغ آبدار

دوزمز آنا گوره بالا قاتل الینده دور

خاصه حسین و فاطمه ؛ پی مطلبه آپار

دوشمز غلط دیسم که گوزل اللرین ایده

زهرا گوزینه حایل او پیغمبر کبار

تا گورمه سون او صحنه جانسوزی فاطمه

گورسه او حالی فاطمه نی یاندیرار یاخار

معناده گلدی ختم رسل ؛ مرتضی ؛ بتول

هم مجتبی ؛ حسین کیمی مظلوم روزگار

زینبده گلدی سس ویره زهرا آناسینه

ساز ایتدی اوزگه صحنه او زهرایه یادگار

تک گلمدی گتوردی حسینون بالالارین

بیرده حسینی صاق گوره اول عده سوگوار

بی کس امامی دوره لیبلر بویوک کیچیک

گویا گلین کنارین آلوب یوزدن آز هزار

غمگین ترانه باشلادیلار خوش ترانه لر

حلقه  وروب او یرده عزا بزمی قوردولار

بیر صحنه گوردیلر اونی واضح دینمرم

کشف ایتماقا او مطلبی من قیلام اعتذار

وادور بو قدر سسلدی هر فردی یا حسین

فریاد و شیونیله دولوب دشت و کوهسار

بعضی اوشاق هراسه دوشوب یومدی گوزلرین

بعضی یانا یانا ایدوب اول عالمه نظار

ایش بیر یره یتیشدی نه اولدی ؛ بو قدر وار

وا عمتا دیوبلراو اطفال گلعذار

آچدی حسین تشنه جگر قانلی گوزلرین

فرمایش ایتدی دورما باجی بوردا زینهار

گیت خیمه گاهه بو باشیم اوستونده آغلاما

دوره شماتت اهلی دی دشمنلریم باخار

یا گیت خیامه گورمه بو حالیله سن منی

باغلا گوزومی یا سنی گورموم من فگار

سویلوب امان اولا گوزیوی باغلارام حسین

نیلوم مجال ویرموری بو توده شرار

تائب چکیلدی آخر صحبت چتین یره

یازما قوتار کلامیوی بر وجه اختصار

طبعون گلوب تلاطمه طغیان ایدر قلم

گوزله کمیت طبعوه چوخ ویرمه اختیار

چوخ دولدوروبدی دفتر اعمالیوی گناه

قیل اعتصام دامن معصوم هشت و چار

بلکه او خاطره سنی اله بغیشلیوب

ایتسون جزاده اهل بهشتیله هم قطار