گلور بوی گلاب و عنبر عمّه
اَسور گویا نسیم کوثر عمّه


گلور بوی گلاب و عنبر عمّه
اَسور گویا نسیم کوثر عمّه
بو عطر جانفزای کربلادی
گلن زوّاری سرمست ایلر عمّه
گلور پیغمبر عطری  چون بو یرده
یاتوب شبه رُخ پیغمبر عمّه
کانّه شانه لر زلفین یول اوسته
گلور چون بوی موی اکبر عمّه
گلابون شیشه سی سنمش بو غازدان
آخور خون گلوی اصغر عمّه
گوتورسون کربلانون تپراقندان
گلر بوی بتول اطهر عمّه
بوسوز بیر عادی سوزدور وار همیشه
اوغول قاننده بوی مادر عمّه
دگنده اوچ پر اوخ داغلی اورکدن
سنوب شیشه آخوب مشگ تر عمّه
او مسماره دگن قانلان نه فرقی
بو قانیکه توکوبدور خنجر عمّه
او تپراق رنگ آلوب الله قانیلان
او قانه صاحب اولمش داور عمّه
قوراندا دادگاه عدلی الله
آلار بو قانی روز محشر عمّه
یادیمدان چخمیوب چخماز او ساعت
توکولدی خیمه گاهه لشگر عمّه
اگر سن اولماسیدون من یاناردیم
اولاردیم شعله ده خاکستر عمّه
اود ایچره دوتمادی بیر کس الیمدن
سن اولدون بو علیله یاور عمّه
پوزولماز خاطریمدن بو محبّت
منه هم عمّه سن هم مادر عمّه
آلاندا سن وضو من شرم قیلّام
قولون نیلی دی چون نیلوفر عمّه
دوراندا سن نمازه من اوتانام
ضعیف اولمش وجودون تترر عمّه
یتشدوق سرزمین کربلایه
دوشون سیز ناقه لردن یکسر عمّه
منیمده دوت الیم آهسته اندیر
پرستار ئوز مریضین گوزلر عمّه
عروس ایتسون ئوزی دامادی بیدار
اولار روحینده حظّ محضر عمّه
قورون بیر خیمه جای حجله گهده
ایده خلوت ایکی غم پرور عمّه
دیسین قوی باشنون غم ماجراسین
اولا هم سرّ همسر همسر عمّه
ربابی قویمیون گوزدن کناره
گولین پرپر ایدوب چون صرصر عمّه
بالاسین قویموشام شه سینه سینده
اولوب شمس و قمر هم بستر عمّه
دینن چوخ گزمیسن ال سینه سینده
بو صحرانی رباب مضطر عمّه
وُرون دوره بو ششگونه مزاره
دیه نوحه بو شیرین دللر عمّه
دی باش چکسون بابام گهگاه شامه
رقیه شامده یول گوزلر عمّه
صله ارحام ایدر اکبرده گیتسه
ویروب جان دلده اکبر اکبر عمّه
او شیرین دللری چخماز یادیمدان
نه سوزلر ایلمشدی اَزبَر عمّه
مساوی دوتدی لیلا و ربابی
گهی اکبر دیدی گه اصغر عمّه
رقیه جورینی چکسون سکینه
گرک همّتله آچسین شهپر عمّه
دی قیلسون دسته زلفین مثل جارو
سیلر بابا مزارین دختر عمّه
سیزی گورجک چکیلدی گیتدی جابر
اوزاقلاشدی قوجالمش نوکر عمّه
بلور چون بزم ماتم اهلبیته
نقدری اولسا خلوت بهتر عمّه
بیری شاید خانملاردان باش اچدی
اگر نامحرم اولسا نیلر عمّه
سَرَللر قبرین اوسته شال و ترمه
توکللر دیده دن اشک تر عمّه
یوخوندور شال اگر وار قانلی کوینگ
اونی آچ سن بو قبر اوسته سر عمّه
سکینه باجیمی رمزیله آندیر
که بلسون هاردا یاتمش دلبر عمّه
دی قزلار دورماسین پائین پاده
وار اوردا بیر یارالی پیکر عمّه
علی اکبر ایاق آلتندا یاتمش
اولوب بیر گل مثالی پرپر عمّه
دینن قارداش یارالی یاتسا هرگز
دایانماز سینه سینده خواهر عمّه