خلاص اولوبدی یزیدین اَلیندن آلُ ا...

ایدوبدی عزم وطن عترت رسولُ ا...


خلاص اولوبدی یزیدین اَلیندن آلُ ا...

ایدوبدی عزم وطن عترت رسولُ ا...

مدینه یوسفینون قانلی کوینگین گوتوروب

ویروب بشیره ایدوب اهل بیتیله همراه

ایشیتدیلر هامی شام اهلی کوچ ایدور زینب

تمام خلق بو مطلبدن اولدولار آگاه

خرابه دوره سین از بس که دوتدی عورت اوشاق

چخانمادی او گونی قالدی اولیاءُ ا...

جناب زینبه چون واضح اولدی نقل مکان

کجاوه دن یره سالدی اوزین او علیا جاه

گَلوب خرابیه قبر رقیّه اوسته دوروب

دیدی قیزیم گیدیروخ کربلایه بسم ا...

دیمهی بیبیم منی قویدی خرابه ده گیتدی

یزیدین اولسون اوزی قاره سنده وار نه گناه

زنان شامه بویوردی بیر التماسیم وار

اونی قبول ایلیون خاطراً لِوَجهِ ا...

بو مسجد ایچره منیم بیر امانتیم قالدی

بو حبس خانه ده قویدوم رقیّه قالدی گواه

خرابه ده متوجّه اولون دوشنده یولوز

بو توزلی قبری خراب اولماسون سیزی ا...

دونوبدی بعضی لریندن ایدوب خداحافظ

دالنجا یاشلی قالوب گوزلری، چکردیله آه

مخدّرات حرم اَگلشوب کجاوه لره

جرس فغانه گَلوب، ناقه دوندی باشلادی راه

گیدوردی قافله، زینب رقیّه ذکریله

قالوب خرابه ده، فکری گیدردی خواه نخواه

یول آیریلوبدی ایکی سمته عرض ایدوبدی بشیر

گیدور مدینیه بو جاده، کربلایه بو راه

ایشیتدی زینب مظلومه کربلا آدینی

اورک دوگوندی، گَلوب درده، چکدی ناله و آه

دیدی اوغول منه لازمدی کربلایه گیدم

پناهیم اوردا قالوبدور، وطنده یوخدی پناه

بویوردی سیّد سجّاد دگلگلن عمّه

بو یولدا حکم سنوندور بشیری قیل آگاه

عیالینی منه چون تاپشوروب گیدنده حسین

گیدیم اُلن بالاسیندان ایدوم اونی آگاه

گرک گیدم دیم عبّاسه قالماسون نگران

بو سن بو قانلی علم، بو مِنا بو قربانگاه

یولوم اوزاقدی، پرستار یوخ، گرک آپارام

یانیمجه اکبر و عبّاس و قاسمی همراه

نجه گیدوم وطنه شام محنتین ایشیدوب

جناب جعفر طیّارین اوغلی عبدا...

دوروب یول اوسته یوزین توپراقا قویوب صغری

او بی کسون نه یوزیله ایدوم یوزینه نگاه

ایتورموشم نچه بلبل گرک او چولده تاپام

فرار ایدوبله یانان دمده خیمه و خرگاه

ایدوبدی حکم دونوب سمت کربلایه قطار

هامی کجاوه سیاه و هامیسی جامه سیاه

یتیشدی بیر یره ناقه دونوب بویوردی امام

بو یرده اَلده عصا چوخ دوروب کلیمُ ا...

کلیمه جلوه لنن نور ایلیوبدی ظهور

سلام ویردی دوشوب ناقه دن لسانُ ا...

او گون که اهل حرم وارد اولدولار حرمه

حسینه زائریدی جابر بن عبدُ ا...

نه گوردی جابر عجب شورشش قیامتدور

دیدی نه وار، دیدیلر گورسنور سواد سپاه

بیری دوشوب یولا تعجیلیله گیدوب نه گوروب

دیدی گَلون نه دوروبسوز بولاردی آلُ ا...

اویاندا اهل مدینه، بویاندا اهل حرم

یتیشدی بیر بیره چکدیله ناله ی جانکاه

چوخ آختاروب تانیا بُلمدیله بیماری

نه قدر اهل وطن کاروانه ایتدی نگاه

نه چون وجودینه چوخ گون دگوب بدن اَریوب

وجودی اولموشیدی فرط ضعفیدن چون کاه

حسین قبرینی زینب گوروب اولوب بی هوش

گَلنده هوشه دیوب لا اِلهَ اِلّا ا...

دوشَندی قبرینه آهسته عرض ایدوب زینب

فدا بو قبریوه من ای شهید عشقُ ا...

«حقیر» مُلهم غیبی سنی ایدوب آگاه

کلام نظمیوه روحُ القدس اولوب همراه