بیر عمریدور خرابه ده خونبارم آغلارام

گوزدن دوشن سرشک کیمی خوارم آغلارام


بیر عمریدور خرابه ده خونبارم آغلارام

گوزدن دوشن سرشک کیمی خوارم آغلارام

کنج خرابه محنت غربت اوزوم اسیر

پابند قید شمر جفاکارم آغلارام

نه مونس و انیس، نه بیر دادیمه یتن

دلدن نشان طعنه ی اغیارم آغلارام

ایلوم نه چاره بوینومی زنجیر چوخ سیخور

زنجیریمی آچان هانی ناچارم آغلارام

عمّه کسوبدی قولّاریمی گور نجه طناب

غم لر دچاری حسرت غمخوارم آغلارام

راحت یاتالّا صبحه کیمی شام قیزلاری

من هر گئجه خرابه ده بیدارم آغلارام

شامین اوشاقلاری منه باخدوقجا طعن ایدر

دلگیر ظلم فرقه ی اشرارم آغلارام

عمّه مگر بیزیم یوخودی خانمانیمیز

ایمدی قوری یر اوسته بیله خوارم آغلارام

گوزدن سالوب بابام منی گَلمور خرابیه

دائم یتیم لر تک عزادارم آغلارام

مدّتدی اولموشام من علی اکبر آیریسی

هجران غمینده سخت گرفتارم آغلارام

دلدن سنه علاقه واریمدور حسینیم

لطف ایت خانم غلام گنهکارم آغلارام

جرمیم مقابلینده اُلونجه گر آغلاسام

چوخ آزدی، چوخ بُکایه سزاوارم آغلارام