ویرانه ده بیر قیز دولانور خانه سی یوخدور

زندانه دوشوب منزل و کاشانه سی یوخدور

 


ویرانه ده بیر قیز دولانور خانه سی یوخدور

زندانه دوشوب منزل و کاشانه سی یوخدور

 

سوز یوخ که اسیری قولی باغلی آپاراللار

دعواده شه ئولسه قزینا سیلی ووراللار

ویرانه مکاندا اونی زندانه سالاللار

هئچ خانه خرابین بئله ویرانه سی یوخدور

 

اوچ سنیده بیر قزدی بو قز شهدی باباسی

افسوس اولا که کهنه دی اگنینده لباسی

بیر خون جگردور بو قزون آب و غذاسی

هئچ شمعین ائله غصه لی پروانه سی یوخدور

 

ای باد صبا کرب وبلایه گذر ایله

اللهه گوره اکبره مندن خبر ایله

بیر شامه طرف باجوا خاطر سفر ایله

آخشام چاقی زلفین داریا شانه سی یوخدور

 

گوز یاشی یوزه شام وسحرده آخار آغلار

عالملری ئوز آهینه هر گون یاخار آغلار

تای توشلارینا آخشام اولاندا باخار آغلار

قوش مثلی قفسده سخلوب لانه سی یوخدور

 

غربتده اسیر اولدی بو قز قوم جهوله

بی سقف مکان مسکن اولوب آل رسوله

گوندوز گون اذیت ائدور اولاد بتوله

حتی گجه ایمنده قالان خانه سی یوخدور

 

ئوز ائللرینی یاده رقیه سالار آخشام

قارداشلارینون فکرینه هر گون قالار آخشام

بیر صود امره نازیله لایلای چالار آخشام

افسوس اولا که اصغر دردانه سی یوخدور

 

شایسته دی شامین دیله داغ داشلاری گلسین

قسمت یوخوموش محبسه قارداشلاری گلسین

باری چاغیرون یانینه قارداشلاری گلسین

قلبی داریخوب اکبر فرزانه سی یوخدور