مصطفادن چاتدی ارثیه بلاغت زینبه

مرتضادن چاتدی دریای شجاعت زینبه

حضرت زهرا آناسیندان شهامت زینبه

مجتبادن روح بی باک و صلابت زینبه

چاتدی ارثیه حسیندن خون غیرت زینبه


مصطفادن چاتدی ارثیه بلاغت زینبه

مرتضادن چاتدی دریای شجاعت زینبه

حضرت زهرا آناسیندان شهامت زینبه

مجتبادن روح بی باک و صلابت زینبه

چاتدی ارثیه حسیندن خون غیرت زینبه

هئچ کیمون اولماز جهاندا بیر بئله ارثیه سی

حیرته دنیانی سالدی زینبون روحیه سی

نشر اولور الاندا عاشوراسینون نشریه سی

رشک آپاردی ظهر عاشور محرم زینبه

چون ابوالفضلدن یتیشدی قانلی پرچم زینبه

گوش عالم ایندیده وار خطبه نغزینده دی

جمله لقمانلار کلاس پند و اندرزینده دی

گنج های علم عالم زینبون مغزینده دی

باش اگر علامه های کل عالم زینبه

فخر ائدر بیر لحظه شاگرد اولسا ، مریم زینبه

بار سنگین بلا خم وئرمدی ابروسینه

اولدی غم موجی اثرسیز همت اقیانوسینه

مثل عنقا گتدی کرکس لر باشین زانوسینه

یعنی باش اندیردی تسلیم اولدی دشمن زینبه

سسلدی چوخ یرده دشمنلرده احسن زینبه

احتیاجه آچمادی ال دهرده هئچ کیمسنه

اوخشیوردی  استقامت وقتی محکم صخریه

تک نه بیزلر صبرینه ، یر گوی گرک احسن دئیه

باغرینی قان صحنه سی ، وحشتلی میدان یارمادی

گودی مقتلده حتی شمره ده یالوارمادی

ایلدی دائم تلاطم موجی لی دریا کیمی

پاسدار اولدی حریم عصمته سقا کیمی

ولوله دنیایه سالدی خطبه سی مولا کیمی

اوغلی ، قارداشی ئولنلر اولدی لشکر زینبه

افتخار  ایتدی سخن بزمینده حیدر زینبه

سر فراز ائتدی صلاته سر وئرن قارداشلارین

محمل اوستونده خضاب ائتدی آغارمیش باشلارین

قویمادی اصلا حسابه دشمنون پرخاشلارین

قلبینون غیرت رگین زخم زبانلار قیرمادی

دشمنی سیندیردی اما وقرینی سیندیرمادی

 دشمنه جانی چیخینجا دست بیعت ویرمدی

قزلارا هر نه بلا گلدی گزارش وئرمدی

کثرت قمچی یارالی قلبه لرزش وئرمدی

استقامت شعری یازدی آسمانلار زینبه

آخرالامر آغلادی قمچی ورانلار زینبه

کوفه ده حق حسینی خلقه اثبات ایلدی

گوردی بیر ایش چرخ دوّارون رُخین مات ایلدی

قاره بیر پرچم الینده قصد شامات ایلدی

امپراطور پلیدی گلدی تحقیر ایلیه

اوچ یاشیندا بیر قیزیلا شامی تخیر ایلیه

بیر مجلل مجلس ائتمشدی او گون بر پا یزید

فکر ائدوردی چون اولوبدور حاکم  دنیا یزید

هئچ اینانموردی او مجلسده اولا رسوا یزید

ایستسه الله عدولر موجبات خیر اولار

حاصل سعی و تکاپوسی نصیب غیر اولار

حس پیروزی ائدوردی بزمیده بازنده لر

مدح ائدوردی آل سفیانی دنی خواننده لر

دوره ده ؛ نیزه الینده دیو خو درنده لر

غرقیدی قاره ئورکلر منجلاب کینه ده

قورخوسوندان حبس اولونمشدی ؛ نفسلر سینه ده

مجلسون آشمیشدی رعب و وحشتی اندازه دن

خوفیدن چخمیشدی جانلار رشته سی شیرازه دن

وارد اولدی ناگهان قول باغلیلار دروازه دن

خیردا قیزلار مجلسون وضعین گوروب آغلاشدیلار

وحشتیندن زینبون اطرافینه توپلاشدیلار

ائتدی فرمایش مبادا قلبوزی وحشت سیخا

ئولمیوب زینب هله گوزیاشلاروز گوزدن آخا

آههیمیله اودلارام هر کیم سیزه گر چپ باخا

قورخمیون؛ آغلاشمیون افغانه احساسیم گلر

لازم اولسا سسلرم نهر اوستن عباسیم گلر

باش اگوردی هی یزیده اهل بزمون تک تکی

چوخ غروریله اوتورمشدی دمشقون دلقکی

آیری عالملرده سیر ایلوردی مغز کوچکی

گه تمسخرله باخوردی مرتضی اولادینه

فکر ائدوردی اود وروب آل علی بنیادینه

یوخ سوزوم چوخ هرزه سوز آغزیندا نشخوار ایلدی

ایستدی مولانی خوار ایتسون ئوزین خوار ایلدی

یازمارام اول قانلی باشیله نه رفتار ایلدی

ایلدی توهین خلاصه زینبون قارداشینه

گوردی بیر ایش ؛ زینبون دنیا دولاندی باشینه

رگلرینده مرتضی دلبندینون جوش ائتدی قان

جنگجو بیر پهلوان تک دوردی یردن ناگهان

فرض ایله قوزاندی یردن شعله آتشفشان

گوئیا ایستور ائیده بوبکری رسوا فاطمه

سسلدی قولباغلی قیزلار هاموسی یا فاطمه

باخدی غیضیله دئدی یوم آغزوی آزدون یزید

آزماسیدن گر بو قدری خودسر اولمازدون یزید

خیزرانیلن بو گون ئوز قبرووی قازدون یزید

اعتنا من ائتمرم تهدیدوه ؛ پرخاشوه

آند اولا عباسیمه تختون چوئیرم باشوه

 کیمدی بو عورت دئدی ؛سسلندی ظالم زینبم

هانسی زینب سن؛ دئدی برج ولاده کوکبم

چاشدی هند اوغلی دئدی قدرتده منده مرحبم

آغزوی باغلا دئدی مرحبلره باش اگمرم

مرحب اولسون سن اگر؛ من ذوالفقار حیدرم

دوزدی بو اوغلی ئولنلر یار و یولداشسیزدیلار

چوخلاری زهرا ننم تک بوردا قارداشسیزدیلار

سن بئله بیله فکر ائلمه عباس ئولوب باشسیزدیلار

من حسین بن علینون شیر بی پرواسیم

قاره معجر قیزلارون یعنی همان عباسیم

باخما چوخ تحقیریلن باشیمده قاره معجره

آند اولا طشتون ایچینده قانه باتمیش لبلره

من بو شهره گلمدیم تعظیم ایدم هر کافره

گلمیشم قلب دمشقه قاره پرچم ورماقا

گلمیشم بیرده سنون شخصیتون سیندیرماقا

نطق زینبدن پوزولدی مجلسون آرایشی

یاردی دشمن قلبینی هر نطقینون بیر ترکشی

بیر به بیر خلع سلاح اولدی یزیدون ارتشی

سوزلرین از بس خانم گیرا و مستحسن دیدی

طشت ایچینده قانلی باشلار زینبه احسن دئدی

آبرو هئچ قالمادی اول والی دیوانیه

الغرض گلدی اسیران منزل ویرانیه

اولدی بیر ایل مرتضی اولادینه هر ثانیه

چرپنوردی یاره لی دل لر شکسته شیشه ده

آج ، سوسوز یاتدی او جیرانلار هره بیر گوشه ده

از قضا چوخ تند اسوردی شامیده بیر قاره یل

قاره نی لر تک سیزیلدوردی دگن دیواره یل

صبح اولونجا همدم اولدی زینب غمخواره یل

هامّی یاتدی زینب اگلشدی حسینیم وای دئدی

گاه حسینیم وای دئدی گه قیزلارا  لای لای دئدی

پیچ و تاب ایلوردی گوردی غصه و غمدن رباب

ائتدی فرمایش نییّه آسوده یاتمورسان رباب

صبح اولونجا ناگران اولما اویاقم من رباب

تا نفس وار منده پابندم وفا قاموسینه

چپ باخا بیلمز بیری پیغمبرین ناموسینه

منزلون پوزقوندا اولسا عیبی یوخ ایمنده دی

اضطرابون وار حواسیم گون باتاندان سنده دی

تا وارام من ، فرض ایله قینون ابوالفضل زنده دی

ناگران اولما اگر آی باتسادا من باتمارام

گویده اولدوزلار یورولسا یاتسادا من یاتمارام

گوزلرینی تازه یوممشدی رباب خسته جان

گوشه ویرانه دن ناگه سه ساله قهرمان

سسلدی آهسته وار سندن سوالیم عمه جان

شامه بیز وارد اولاندان قلبیم آتشخانه دی

بو اوچوخ منزل بی بی آیا همان ویرانه دی ؟

عرض ائدور زینب قوجاقه آلدیم اول نیلوفری

تا دئدیم ویرانه دی چرپندی قلب مضطری

اولین باریدی گوردوم گولدی زیبا لبلری

کامه پس چاتدیم دئدی خوش روزگاریم وار بی بی

یاره لی یاریله بو ائوده قراریم وار بی بی

ترک ائدنده خیمه گاهی لبلری سوزان بابام

آلدی آغوشه یوزومدن اوپدی سرگردان بابام

قول وئردی آیریلان وقته منه عطشان بابام

غم یمه دردون دئدی هر حالدا من بیلم قیزیم

چوخ داریخما بیر گئجه ویرانیه گلم قیزین