ای هامی عالملره جان یا علی ابن الحسین

عبد بی همتای جانان یا علی ابن الحسین


ای هامی عالملره جان یا علی ابن الحسین

عبد بی همتای جانان یا علی ابن الحسین

مدحیوه عاجزدی خامه، شانی ای فوق خیال

مادحون ذات خدادور، ای حبیب لایزال

شانیده ایزد نماسن، حُسنیده احمد مثال

مظهر الطاف سبحان یا علی ابن الحسین

ای مناجات و دعاده مقتدای صالحین

آدلانوبسان ماسِوا... ایچره فخر السّاجدین

سس گلوب گویدن سنه تک اَنتَ زین العابدین

زینتُ العبّاد یزدان یا علی ابن الحسین

اَلّی یتدی ایل عمر ایدوبسن بو فنا دنیاده سن

طول بو مدّت اولوبسان ای امام ممتحن

روز و شب تسلیم فرمان خدای ذوالمنن

ای همای اوج عرفان یا علی ابن الحسین

روز عاشورا مشیّت ایتدی ایله اقتضا

ظاهر صورتده بیمار اولدون ای روح دعا

لکن اولموشدی سنه تفویض امورات ولا

ای امام کون و امکان یا علی ابن الحسین

افتخاریله آتان ایتدی جهاده فتح باب

نخل کفری ریشه دن قیردی مثال بوتراب

آز قالوردی خانه ی ایمان و دین اولسون خراب

ایلدی تجدید بنیان یا علی ابن الحسین

روز عاشورا آتان اولدی معلّم نهضته

تا ابد اولدی معرّف جوهر حرّیّته

دینی ذلّتدن رشادتله بتوردی عزّته

اولدی احیا دین و قرآن یا علی ابن الحسین

نهضته اولدون مکمّل سنده ای حقّه ولی

ایلدون تحقیر اسارتله گروه ارذلی

اولدی زنده شامیده خون حسین ابن علی

تاپدی نهضت تازه بیر جان یا علی ابن الحسین

شامیده مسجدده سن بیر خطبه ایراد ایلدون

آل بوسفیانه کیفرخواست انشا ایلدون

اوردا فِی المجلس یزیدی خوار و رسوا ایلدون

ای حسینِ شام ویران یا علی ابن الحسین

وقعه ی کرب و بلا گیچدی ولی دل داغلادون

کربلا یادیله اشکون گل عذاره باغلادون

سو گورنده گوزلرون دولدی اوجادان آغلادون

سسلدون ایوای باباجان یا علی ابن الحسین

ای امیرالعارفین، ای هیکل صدق و صفا

روح قرآن، جان تقوا، کان ایثار و وفا

بیله شانیله سنه دشمنلر ایتدی چوخ جفا

باغرون اولدی قان یا علی ابن الحسین

چوخ جفا ایتدی ولی عبدُ المَلِک اوغلی هشام

عاقبت زهریله مسموم ایتدی اولدون تلخکام

باشون اوسته اهل بیتون ناله ایلوردی تمام

ناله نه ناله، چو نیسان یا علی ابن الحسین

بوردا بیر غم دوشدی یاده دللری چوخ یاندیرار

کربلا دشتینده امّا شمر شوم کین شعار

قویمادی زینب حسینه آغلاسون زار و نزار

اشکینی ویرسون یوزه سان یا علی ابن الحسین

سویلدی قویمولّا قارداش زینبون دل داغلاسون

باجیلار تک نعشون اوسته بیر دویونجا آغلاسون

لااقل قلبونده کی پیکان یاراسین باغلاسون

عَمّن اولدی دیده گریان یا علی ابن الحسین

ای ویرن قبری صفای جاودانه یثربه

«جابری» بیر دفعه گلدی جاهلانه یثربه

ایسته حقدن بیرده گلسون عارفانه یثربه

قویما قالسون سینه سوزان یا علی ابن الحسین