معتبر مقتلده بو کیفیّتی وار چوخ یازان

ایستیدن شامین یولوندا لنگه دوشدی کاروان


معتبر مقتلده بو کیفیّتی وار چوخ یازان

ایستیدن شامین یولوندا لنگه دوشدی کاروان

بیر صغیره قیز بلا کاشانه سی، غم خانه سی

کربلا مظلومینون اوز سوگُلی دردانه سی

یوخلادی قالدی او چولده کوچدی گیتدی کاروان

خوابیدن بیدار اولاندا گوردی یوخ بیر مهربان

صاق صولا حیران قاچاردی پراسف احوالیله

باجیسین سسلردی داده بو زبانحالیله

فاطمه ای عنصر بی روحیم ایچره جان باجی

گیتمه، دور، قالدی باجون چوللرده سرگردان باجی

قتلگاه کربلادن کوچ ایدندن صبح وشام

هم کَجاوِیدیم سنیله من بو یولّاردا مُدام

ایمدی سن محملده، من چولده، پیاده تلخ کام

گوز یاشیم مونس انیسیم دیده ی گریان باجی

قیز عیالی، قورخولی چول، دادرس یوخ، یول اوزاق

قارداشیم اکبر گوزیندن بیله بیر حالیم ایراق

ایستی گون، خار مغیلان، ایلیوبلر اتّفاق

سالماقا دلدن من مظلومه نی الآن باجی

آشیانیندن آزان بیر پرشکسته مرغ تک

هر یانا یوز دوندروب گورّم اوزیمی چولده تک

سوزش قلبه وورار اوز آه سوزانیم اتک

آز قالور بو سوز آهیمدن اولام سوزان باجی

ناقه ی امّیدیمی اَگلشدیروب اشکیم گِله

نابَلَد بیر قیز، تیکانلیق چول، اَیلقیم آبله

دوشموشم دلدن، نه همدم وار نه زاد و راحله

اشک چشمیم تک اَیاقیمدن رواندور قان باجی

نه آتام وار نه عموم عبّاس بیر دادرس

نه علی اکبر که اولسون بو یتیمیه هم نفس

سن نیه بس ویرموسن من سسلینده باجی سس؟

بس دیمورسن بیر باجیم وار غم کش دوران باجی؟

سسلینده سن آنا، باجی جوابون جان گلور

سسلینده من ولی امّیدیمه حِرمان گلور

سسلنور داغ داش سسیمدن، غم دله هر آن گلور

آرتوری قلبیمده وحشت دم به دم هر آن باجی

وار یقینیم سن دگولسن باجی جان نامهربان

ویرموری گویا توقّف مهلتی شمر و سنان

قویماسان گیتسون گر اولسا اختیارون کاروان

باخموری یالوارماقا اتباع بوسفیان باجی

یوخ بُلن احوالیمی بیر کارواندان بیر نفر

قویماسون چولده قالا بو تیر آلامه سپر

باری سن حالیمدن عمّم زینبی قیل باخبر

قویماسون گیتسونله بیر باش لشکر عدوان باجی

گون وورور، سوز حرارتدن ویرور زحمت باشیم

آج سوسوز یورقون اولوبدور اکل و شربیم گوزیاشیم

بُلموری بو حال زاری یوخسا ناخوش قارداشیم

بیر اشاره ایلسون اولسون جهان ویران باجی

گلشن شاه حجازه من که سولموش بیر گُلم

ایمدی گُلدن آیریلان بیر پرشکسته بلبلم

قورخورام بو قورخولی چولده قالام، آخِر اُلم

نه اولا غسل و کفن نه ایلین افغان باجی

کیم گوروب بیر قیز عیالی بیله ظلمه توش اولا

مقصده یول تاپمیه گُل تک حرارتدن سولا

پابرهنه قاچمیشام چوللرده بس که صاق صولا

خانه ی دلدن اولوبدور طاقتیم تالان باجی

یا حسین ای جدّ مظلوم، ای شهید کربلا

لطف ایله بو سویگُلی قیز خاطرینه سن شها

وار صغیره بیر قیزیم ناخوشدی ویر فوراً شِفا

ایتمسون شیون آناسی قالماسون گریان باجی