گرچه غمون علی دل ایوین ترک و تاز ایدر

امّا خوشام بو عشق منی سرافراز ایدر


گرچه غمون علی دل ایوین ترک و تاز ایدر

امّا خوشام بو عشق منی سرافراز ایدر

عشقون سالوبدی لیلینی مجنون کیم چوله

عشق عقلیدن خیال ایوینی بی نیاز ایدر

سن اولموسان مخالفه مغلوب عراقیده

سانما آنان دوباره خیال حجاز ایدر

گوگلیمده واردی عشق حقیقی اودور سبب

گوردوقجا سرزنش منه اهل مجاز ایدر

یاندورما یانموشام منه گَل ناز آز ایله

عشّاقه گرچه رسمیدی معشوق ناز ایدر

امّا گورنده عاشقینین صبری قورتولوب

ناز ایلمز، گر ایلسه ده ناز آز ایدر

من سرّیمی محالیدی اغیاره بُلدورم

امّا آخار سرشک تریم کشف راز ایدر

گوردوقجا گُل یوزون گوزوم ابر بهار تک

قان یاش توکر یانار جگریم سوز و ساز ایدر

قانلی یوزوندن ایتسه صبا زلفیوی کنار

پوزقون خیال رتبه ی عشق امتیاز ایدر

مه صورتون طلوع ایدر ابر سیاهیدن

تصدیق ذی حق اولماقیمی قوم آز ایدر

منصور پای داره گیدوب پایدار اولوب

لیلا او داردن علی گور احتزار ایدر

سعی ایتمیشم صفای محبّتده باش قویام

عصفوری عشق قدرتیله شاهباز ایدر

من کسوت اسارتیله مُحرِم اولموشام

باشون منی نه وقت طوافه مُجاز ایدر

طاق مقوّس خم ابرودی منظریم

عشق اهلی کعبه ی رخ یاره نماز ایدر

دل خسته، دست بسته، یول اوسته باخان دیر

آویز دار عشقی رسن دلنواز ایدر

ای شبه روی احمد محمود شاه عشق

خدمت «حسینی» گور سنه مثل ایاز ایدر

من گوزلرون فداسی سن ایتسن اگر نظر

باب نجات اوزیمه خداوند باز ایدر