علی اکبر نه تک لیلا اسیر قید هجراندور

شکنج زلفیوه پابسته بیر جمع پریشاندور


علی اکبر نه تک لیلا اسیر قید هجراندور

شکنج زلفیوه پابسته بیر جمع پریشاندور

پریشان ایلمه زلفون جداده ماه رخساره

بو مجموع پریشانی بیله ایتمه گونی قاره

بولورسن باغلی دور مین دل سر زلفونده بیر تاره

نجه بیر زلفدور بو هر تِلی مین رشته ی جاندور

ایدوب بیر نوعیله زلفون پریشان حال لیلانی

تانونماز گر چکه نقّاش غم تمثال لیلانی

عجب عکس ایتدی گردون نقشه ی آمال لیلانی

گورن سویلر بو لیلادور و یا مجنون دوراندور؟

عجب ماهیّتون تکمیل اولونموش بدو خلقتده

سنون تک بیر نبی منظر تاپولماز بو شباهتده

قویوبسان ظلمت زلفونله یوز مین خضری حیرتده

او پوزقون صورتونده لبلرون چون آب حیواندور

نوا و شوری لیلا مشق ایدوبدور تار زلفوندن

اولوبدور فرقتونده روزگاری تار زلفوندن

سالوبدور رشته ی تدبیر اله بیر تار زلفوندن

باشون آردینجا زلفون تک اودور افتان و خیزاندور

دوزولموش تار زلفه شدّه ی مرجان کیمی قانون

پریشاندور منیم حالیم کیمی زلف پریشانون

ایدوب باد صبا آشفته زلف عنبر افشانون

دل لیلای بیچاره به سانِ شانه شان شاندور

اگرچه محملیمله نیزه ده باشون مقابلدور

ولیکن گوزیاشیم رخساریوی گورماقه حایلدور

بو پرده دود آهیمدور و یا گرد منازلدور

جمال بدر کامل تک بولود آلتندا پنهاندور

بو یولّاردا گلوبدور هانسی شهر اهلی تماشایه

باخوب بیر باشیوه، بیرده دولاندی باخدی لیلایه

گوروب آشفته حالم، دوشموشم بیر اوزگه سودایه

سوروشدی ساربانیمدن بو هانسی خانه ویراندور؟

جوابینده خطاب ایتدی که مجنون زماندور بو

علی اکبر آناسی لیلی بی خانماندور بو

خدنگ عشقینه بو نازنین باشین نشاندور بو

اودور ابر بهاران تک گوزی هر لحظه گریاندور

بو پوزقون حالیمه آغلار باخاندا کافر و ترسا

ایدنده ناله امّا غیظیله بو فرقه ی اعدا

وورالّار تازیانه باشیمه ای مونس لیلا

دین یوخ وورمیون اینجیتمیون آخِر مسلماندور

اولان گوندن او تار طرّه نین دلدن گرفتاری

دولانّام دست بسته ناقه اوسته شهر و بازاری

منی قویمولّا، رمزیله دانیشدور سن منی باری

بولورسن درد الیندن غنچه تک باغریم دولی قاندور

«حسینی» سوزلرونده بولمورم نه قابلیّت وار

که هر بابینده اهل عشقه یوز مین باب حکمت وار

بو نوعیله که سنده شاعرانه بیر حقیقت وار

مضامین کلامون اهل عشق و ذوقه عنواندور