شه تشنه زینب خون جگر بیری نیزده بیری ناقه ده
باجی قارداش اولدیلا هم سفر بیری نیزده بیری ناقه ده 


شه تشنه زینب خون جگر بیری نیزده بیری ناقه ده
باجی قارداش اولدیلا هم سفر بیری نیزده بیری ناقه ده 
بیریسی اوخوردی کلام حق دم نی ده لحن حجازیلن 
گه ائدردی راز و نیازینی او خدای بنده نوازیلن 
ولی زینب اوخشاریدی اونی دوه اوسته سوز و گدازیلن 
بیری بی بدن بیری دیده تر بیری نیزده بیری ناقه ده 
اوباشی جداده گورن زمان بیر عجوزه داشه ائدوب نشان 
گوروب حالی زینب بینوا ائدوب اشگ دیده سینی روان 
باشینی ویروب دم محمله یاریلوبدی باشی آخوبی قان 
او باشی کسوک بو شکسته سر بیری نیزده بیری ناقه ده
بیله سوز نه نوعی گئدوبدولر ره شامی قوم ظلامیله 
ویرولوبدی نیزه لر اوستونه شهدا باشی نه نظامیله
دوه اوسته عورت اوشاق هامی قولی باغلی رنج تمامیله
بیری ساکت و بیری نوحه گر بیری نیزده بیری ناقه ده 
اسرا نه حاله دوشردیلر گورولن زمان شهدا باشی 
آنالار گورردی اوز اوغلینی باجیلار گورردیله قارداشی 
هامی آه و ناله ائدردیلر هاموسی توکردیله گوزیاشی 
بیری بی پسر بیری بی پدر بیری نیزده بیری ناقه ده 
گهی دیر راهبه قویدولار سر پاک شاه مشارقی 
گهی گوردی مجلس عامده ستم یزید منافقی 
نه غم و بلا که گوروب حسین غم زینب اولدی مطابقی
او شهید اولوب بو گوروب نه لر بیری نیزده بیری ناقه ده