نیزه باشندا باشون گَلموش بیانه قارداش

قرآن تلاوت ایلر قرآنیانه قارداش


نیزه باشندا باشون گَلموش بیانه قارداش

قرآن تلاوت ایلر قرآنیانه قارداش

سیر جهانه چخموش اوج سِنانه قارداش

سیرینده رهبر اولموش بیر کاروانه قارداش

بیر کارواندا رهبر اهل جهانه قارداش

یتدی دونَن گون آرتا گون تک زواله باشون

گوردوم جداده بنزر بدر کماله باشون

دوتموشدی پرده پرده قانیله هاله باشون

گیتدون کُل اوسته یاتدون دوندی هلاله باشون

بیر گونده چوخ دونَرمیش دور زمانه قارداش

بیر باش که آیت اولسون آیه به آیه نوره

نور رُخیله دونسون صحرا و دشت، طوره

مینلر کلیم عشقی سالسون او طور شوره

انصافیدور او باشی خولی قویا تنوره

مهمان یک شبیدون اول میزبانه قارداش

ا...ُ نور- نوری وار ناصینده پیدا

مشکاتی نوک نیزه، مصباحی حسن زیبا

نه شرقی و نه غربی نور منیر بطحا

بو قوم بی بصیرت گورمز بو نوری دَردا

بیگانه گوز گورَنمز نور یگانه قارداش

ای ماه چاردهِ شب، وی یک شبه هلالیم

آشفته روزگارون، آشفته وضع حالیم

شاهد بو قانلی زلفیم، خونابِ اشک آلیم

سن مندن آیریلِیدون گیتمزدی هیچ خیالیم

گَلمَزدی بیر گونومده سنسیز گمانه قارداش

حاشا بو آیریلیقدان دلده گلایَم اولسون

قوی پایه ی غمونجه عشقونده پایَم اولسون

غم مصحفونده باری بیر آیه آیَم اولسون

ساینده دالدالانّام عالمده سایَم اولسون

سایَنده سایه سالماق حقّیمدی یا نه قارداش

بو سایه سایه سینده پاینده دولتیم دور

تسخیر مُلک هستی معطوف همّتیم دور

ترویج دین و مذهب رسم طریقتیم دور

بیر جمع قاره معجر محموع قدرتیم دور

قید اسارت اَلده یوخسا بهانه قارداش

تسخیر قیلماسام گر آفاقی غرب و شرقی

عرشه اوجاتماسام گر بو سر شکسته فرقی

یاندیرماسا یزیدی بو آه سرد برقی

اوندا وفای عهد و سینماقینون نه فرقی

سوزدور سوزوم بو سوزدن غیری فسانه قارداش

ای آبروی خلقت وی افتخار زینب

سندن صورا چوخالموش شان و وقار زینب

دنیاده قوی دیولسون ای شهریار زینب

هم آبروی زینب، هم اعتبار زینب

گَلمَز بو آبروده کیمسه جهانه قارداش

بیزدندی جمله کون و امکانون آبروسی

بیزدندی آب و گِلدن انسانون آبروسی

وار بِالخصوص منده زهرانون آبروسی

صرف نظر بولاردان وار قانون آبروسی

باشدان آخوب بویانموش یوز گوز او قانه قارداش

آند ایچمیرم او جانه تا نقص عزّت اولسون

سوگند او خاک پاکه کویوندا تربت اولسون

زینبده گور نقدری لازمدی همّت اولسون

شام یچره منبر اوستی سجّاده قسمت اولسون

مدح علی دیولسون سفیانیانه قارداش

قان قان دیَن بو شهرین قان یاغدیرور هواسی

بوی جنایتیله مملُودور فضاسی

عید عظیمه دونموش دینِ مبین عزاسی

بیر یاندا کف چالوللار، بیر یاندا دف صداسی

هر یان نوای نای و چنگ و چغانه قارداش

گوردوم بو پست قومون رفتارینی زننده

شرم و حیا تاپولماز بُلدوم چالوب گولَنده

بیر انقلاب روحی بیدار اولوندی منده

بو انقلاب روحه تنگ اولدی یر بدنده

جسمیمده انفجاره گوردوم نشانه قارداش

آلدیم بو انقلابین طغیانِ جذر و مدّین

بُلدوم تجاوز ایستر مرز وجود حدّین

راه تعادلیندن تاپدوم او دمده ردّین

باشیم یاریلماقندان گوردوم طریق سدّین

باش ووردوم اوندا بیر باش تخت روانه قارداش

باش پارچالاندی آخدی دوتدی یوزی قزل قان

قانلی شفقده گویا بیر آفتاب تابان

قانلی شعاع سالدی دنیانی قویدی حیران

دوندی زمانه دوری، تغییر تاپدی دوران

گردون دولاندی کام اسلامیانه قارداش

رحمت گوزیله باخدیم بو قوم بی حجابه

بیر روح تازه ویردیم دل مرده شیخ و شابه

تا مستعد قیلِیدیم افکاری انقلابه

حمد ایلدیم خدایه تا باشلادیم خطابه

ظَنّ ایتدیلر علیدور گَلموش بیانه قارداش

بیر لهجه ده دانیشدیم گویا علی اوزیدی

لهجه علی لهجه سی، سوزلر علی سوزیدی

بیر شهر بیر منیدیم خلقین ایکی گوزیدی

سوزلر که من یتوردوم هر سوزلرین گوزیدی

هر کلمه مرغ روحه خوش آب و دانه قارداش

دشمن خبر بُلونجه پرده کنار اولوندی

پرده کنار اولوندی حقّ آشکار اولوندی

بِلمَرّه آل سفیان منفور و خوار اولوندی

بنیاد انقلاب خلق استوار اولوندی

باشلاندی بغض و نخوت سفیانیانه قارداش