یوزون ای امید صبحی منه تا مقابل اولدی
هامی محنتیم اورکدن غم ایوینده زایل اولدی


یوزون ای امید صبحی منه تا مقابل اولدی
هامی محنتیم اورکدن غم ایوینده زایل اولدی
نفحات انس ایدردی منی مست اول شب
قدح ولا بُلردیم بو گیجه اولار لبالب
یتورر منی مراده اثرات ذکر یارب
او دعا اولوب مؤثر بو مراد حاصل اولدی
هامی گللریم آچلدی بو خرابه اولدی گلشن
نفس شمیم رحمت گره آچدی تار دلدن
چخوب آفتاب رخشان گئجه اولدی صبح روشن
نظر عنایت حق منه سنله شامل اولدی
بو حضوره نه سزادی گل و لاله‌ نین نثاری
که خرابیه گتوردون هامی جلوه بهاری
نفسیله وار کشاکش نچه لحظه گیتمه باری
هامی عمریدن بو ساعت منه حاصل دل اولدی
منی سالدی گفتگودن ایله شدت مصائب
که مجال، یوخدی نطقه اگر اولسادا مصاحب
اله بیرده حاشَ دوشسون بیله فرصت مناسب
یوزیوی گوروب دل آچدیم منه حل مشکل اولدی
دیمورم خرابه منزل منه کاخ آرزودور
دیمورم تراب تیره منه ناز پرّ قودور
دیمورم سرشک حسرت منه عین آبرودور
که بو اشکیدن یزیدین هامی نقشی باطل اولدی
نه لزومی وار دیم من هامی شام ماجراسین
شب قتل داستانین غم کوفه ابتلاسین
هامی پیکریم زباندی دیر اشقیا جفاسین
نه دیوم نه نوعیلن طی بو هامی مراحل اولدی
ره شامیده اگرچه غم و درد اولوب زیاده
ولی روبرو گورردیم سر اکبری جداده
یتیشنده شامه باتدی هامی ظلمت جفاده
او ایشیقلی اولدوزومدا ستمیله آفل اولدی
مه عارضونله روشن منه اولدی شام مظلم
نه بجائیدی گلِیدون علی‌اکبریله باهم
آتاجان مگر گورونمز مهیله ستاره توام
بو قران سعده بُلمم نه حجاب، حایل اولدی
رشحات فیض بیچون گل عمری ایتدی سیراب
منی غرق رحمت ایلوب کرمیله ربّ الارباب
بو حلولدن که اولموش به خلاف رسم و آداب
برکات حیّ سبحان بو مکانه نازل اولدی
دیم اهل شامیدن یا اورگیم تالّمیندن
بیرینین شماتتیندن بیرینین تبسّمیندن
بخصوص من بو قومین یانیرام ترحّمیندن
کیمه رحم کیملر ایلر کیمه کیم مماثل اولدی
من او بی نظیر لعلم من او تابناک گوهر
من او ماه عالم آرا من او پر فروغ اختر
که ایدنمیوب عوامل منی تیره و مکدر
سبب ملال اگرچه منه بو عوامل اولدی
من او نسخه ی کمالم فقرات عزّه شامل
صفحات کون و امکان منه دفتر فضایل
آچیلا اگر مکاتب یازیلا اگر رسائل
گورر اهل دل که هستی بو مقامه قائل اولدی
من او کعبه ه مطافم که طواف ایدر ملائک
من او مسلک ولایم که وفادی اوندا سالک
بو خرابه منله بیر گون اولی وجهه ی ممالک
نجه که سنیله گلشن بو خرابه منزل اولدی
منم اول فروغ یثرب منم اول چراغ بطحا
نسبیمده شیر یزدان حسبیمده واردی زهرا
سن آتام حسین عطشان ایکی کونه میر و مولا
کیمه بو جهاندا ممکن بیله بیر فضایل اولدی
من او سرفراز اسیرم منه فخردور اسارت
منه اول خرابه منزل منه خاک پادی عزّت
منه کاینات اولموش ابدی رهین منّت
که شهادته اسارت بُلورم مکمل اولدی
منی هر زمان اگرچه غمون ایلمیشدی دلگیر
بو گئجه علاوه دلده بو بلا ایدردی تاثیر
ایلیوب خیال، کلکی یوزیوی گوزومده تصویر
ایله محویدی که گویا منه دل مقابل اولدی
قطرات اشک گوزدن ایله یاغدی مثل باران
که سرشک موجی ایتدی منی غرق سیل و طوفان
او مهیب ژرفنادن یوخودی نجاته امکان
بو تشرّف زیارت منه امن ساحل اولدی
نه دیوم که لایق اولسون سنه نحوه ی خطابیم
شرف و وقار و شانیم، گل و ماه و آفتابیم
سنیلندی افتخاریم سنه واردی انتسابیم
سنیله قیزون جهاندا هامی عزّه نایل اولدی
منی لطف حق یتوردی گویول ایستین صفاته
اودی دلده یوخدی رغبت جلوات کایناته
ایله ووردی خطّ بطلان رقم تعلّقاته
هامی مکنتیم بو قولدا دوزولن سلاسل اولدی