اسیرم گر سپاه زاده ی مرجانیه قارداش

ولی اُلسمده من یالوارمارام بیگانیه قارداش


اسیرم گر سپاه زاده ی مرجانیه قارداش

ولی اُلسمده من یالوارمارام بیگانیه قارداش

حسینیم دخت زهرایم عدودن ایتمرم پروا

شهامت درسینی ویرمیش منه سرمشق آنام زهرا

در و دیوار آراسیندا گوروردی هر قدر ایذا

گوروردون سن که یالوارمازدی اصلا ثانیه قارداش

بو رسم عشقیدور پروانه لازمدور یانا شمعه

او بلبلسن سولوبدی گللرون گلمز سسون سمعه

خلیل عشقسن سن، سرپرستم منده بو جمعه

بو منصب بسدی زهرادن اولان ریحانیه قارداش

سنون قارداش یولوندا هر بلا گلسه دایانّام من

شرار عشقیوه پروانه تک شوقیله یانّام من

دوشوب بیر باش باشون آردینجا شاماتی دولانّام من

قوی اوخشاتسون سنون عشقون منی دیوانیه قارداش

دولانّام هر دیاری ناقه اوسته حال زاریله

سو ویرّم نخل دین حقّه چشم اشکباریله

وورار آهیم علم هر یرده بو پوزقون قطاریله

باخا هر کیم ایده لعنت یزید جانیه قارداش

اگر دشمنلرین حالین پوزار حال پریشانیم

ولی جان گیتسه ده گیتسین بو دینه وقفیدور جانیم

تاپوبدور پرورش سر چشمه ی دیندن اَتیم قانیم

باشیمدان آتمارام دین فکرینی بیر ثانیه قارداش

حسینیم کاسه ی عشقیم اولوبدور شوریله لبریز

مگر وار هانسی عاشقده بیله بیر عشق شورانگیز

قیاس ایتمز منی شمعیم یقین پروانیه هرگز

وفا سرمشقینی من ویرمیشم پروانیه قارداش

اسنده تند یل گل سیندیرار سروین قدین اگمز

حریم عصمت کبرای حقّه غیر الی دگمز

جهاندا آل هاشم دشمنه باش اگمیوب اگمز

باجون زینب اُلر عجز ایلمز بیگانیه قارداش

اگر چه سن علیه کفر و ظلمه ایلدون نهضت

بویاندون قانیوه هرگز یزیده ایتمدون بیعت

ولی سندن صورا عشق اهلینه نه عید و نه عشرت

ملالون دوندرر بو عالمی غمخانیه قارداش

بو واضحدور مسافر سعی ایدر تیز منزله یتسون

گیدور شامه باجون گلدی دولانسون باشیوه گیتسون

ولیکن هر کسه لازمدی دیده بازدید ایتسون

بو دیدین بازدیدین ساخلا سن ویرانیه قارداش

گیچن گون خیمه دن عرشه او جالدی بانگ وا عبّاس

اوشاقلار بوینی چیگنینده سنه مخفی دوتوبلار یاس

گجه گوردوم نگهبان یوخ اوزوم اطفاله ویردیم پاس

قنادسیز قوشلاری یغدیم یانان کاشانیه قارداش

حسینیم نوکرون بو اعظمی ایلر مدام افسوس

ایدر حسرت او ششگوشه مزاره بیر اولا پابوس

او شهسن درگهوندن سائلی قیِترمه سن مایوس

گله هیهات سن تک شه بو دار فانیه قارداش