یا رب بالام اصغردی ویرور جان الیم اوسته

چالدی ال ایاق بوقوزی قربان الیم اوسته


 یا رب بالام اصغردی ویرور جان الیم اوسته

چالدی ال ایاق بوقوزی قربان الیم اوسته

یوخ بیر نفر اولسون منه بو عرصه ده یاور

نهر اوسته دوشوب قولسوز اباالفضل دلاور

بو غنچه گلی تیر جفا ایلدی پرپر

نازک بوغازیندان سوزولن قان الیم اوسته

لای لای دیدیلر بلکه بشیکده یاتا اصغر

سوفیکرینی بیر لحظه باشیندان آتا اصغر

لبیک دیدی قانه بوچولده باتا اصغر

اوخ ایتدی بوگون دردینه درمان الیم اوسته

تفکیک اولا تا عشق حقیقیله مجازی

عشق ایستدی میدانه بوغنچه نازی

ظلمین اوخونا اولدی سپر تشنه بوغازی

گل جسمی اولوب قانیله الوان الیم اوسته

عاشقلر ایچینده هامیدان سینّیده آزدی

آلتی آیوار گل هله یوخ غنچه و نازدی

آق دوشلو گونون اوسته آخان قانیله یازدی

پاینده گرکدور قالا قرآن الیم اوسته

چون عشق مناسینده ره حقه خدادی

گلگون یوزی آئینه توحیدنمادی

بوتشنه بالام نقطه عطف شهدادی

حق اوسته اولوب قانینه غلطان الیم اوسته

اوچ تیر اوخونان سود امرین نیسبتی اولماز

هیچ سود امرین بو ستمه طاقتی اولماز

دنیا هامی اصغر قانینون قیمتی اولماز

وار بونه گوزل منصب شایان الیم اوسته

واجب دی اطاعت اولا حکم ازلیدی

گهواره ده ال آچماسی عکس‌العملیدی

اوخ دگدی ولی اوخ دیمدی آدی علیدی

باخدی یوزیمه لبلری خندان الیم اوسته

یارب سنه خاطر هامی انصاریمی ویردیم

دریای ادب قولسوز علمداریمی ویردیم

یتمیش گلی بیر غنچه گلزاریمی ویردیم

پرواز الدی قوش کیمی الان الیم اوسته