حضرت بو طالبه لطف ایتدی رب ماسوا

دورد زبر دست و کریم النفس اوغول ایلوب عطا


حضرت بو طالبه لطف ایتدی رب ماسوا

دورد زبر دست و کریم النفس اوغول ایلوب عطا

جعفر طیار و طالبدور ، عقیل و مرتضی

زینت  گلزار خلقت قامت رعنالری

بیر بیریندن فوق و زیبا ، سیرت و سیمالری

...

جعفرون حقنده قیلدی قادر یکتا کرم

بیر اوغول لطف ایتدی ، غربتده اولوب زیب حرم

اولین مولود اسلام عالمه  قویدی قدم

محنت غربتدن آزاد اولدیلار  شیرین کام

قویدولار مولود پاکین آدین عبدالله نام

...

مرحبا بو عنصر آزاده نون اعمالینه

آفرین بو مرد تاریخون گوزل آمالنه

نفسی تک اقبالی زیبادور خوشا اقبالنه

اول قدر قوس صعودی ایلدی بخت اولدوزی

جعفر طیارون اوغلون خوشلادی زهرا قزی ...

ضمن عقدینده ولی عنوان ایدوب بو صحبتی

زینبیم بیر دریدور عالمده یوخدور قیمتی

یاخشی ساخلا حق مبارک ایلسون بو وصلنی

منکه خوش بینم وصال و الفت پایندوزه

حسنی وار بو ازداجون دلخوشام آیندوزه

بیرده قاردشی حسینی چوخ چوخ ایستر زینبیم

گورمسه تزتز جمالین غصه ایلر زینبیم

اشک محنتله اولار آلوده معجر زینبیم

تا نفس واردور حسینون ترکنی قیلماز قزیم

زندگیدن آیریلار ، اوغلومدان آیریلماز قیزیم ...

....

ویرسه یوز قارداشوه هر بیر مکاندا ابتلا

خواهشیم سندن بودور ای اختر برج حیا

بو ایکی طفله کفن گیدیر خیمده ساخلاما

گوزلرینه سرمه چک تشویق ایله ویر ال اله

سنی آز قربانلاری مردانه گوندر مقتله ...

داللریجا باخما حتی اولما خیموندن کنار

آغلاما ، سس سیز یانوب خاکستر اول پروانه وار

التجاء ایت حقیدن آهولرون اولسون شکار

قوی اوجالسون کهکشان عشقه ناز ایتسون باشون

آلسون آغوشه گتورسون هر بیرین بیر قارداشون

(تا واقعه کربلا اولدی . خانم زینب اوشاقلارین کفن گیندیرسن صورا  )

قیلدی فرمایش گیدون اکبر گیدن یولدان بالا

شاخ نیلوفر کیمی اما کیچردون قول قولا

عشقوزی گورسون دعا ایتسون دایوز سالسون یولا

عرض ایدون بو صحبتی الحال له اول سروره

برگ سبزوک بیز ، آنام تقدیم ایدوبدور محضره

خیمه دن چخدی او طفلان خوش اقبال و نترس

مغزده شور شهادت قلبده شوق و هوس

محضر سلطان عشقه گلدیلر یورقون نفس

دامنیندن دوتدولار عجز ایتدیلر یالواردیلار

گتدیلر زهرا آدین آخر اجازه  آلدیلار

 

... (ایکی قارداش مردانه جنگ ایتدیلر اما )

ارشد اوغلون زینبین یخدی او اشرار زمن

خورداجا قارداش ضعیف اولدی داخی روحیه دن

گوردی قارداش جان ویرور شدتله ایلور آه و زار

سنگ دللر ال گتومور جسمین ایلور سنگسار

قلب آلشدی زمزمه ایتدی او طفل گلعذار

ایلورم چوخ چوخ تاسف سن یخیلون من وارام

شهپریم سندی ولی گلم دالونجا قالمارام

فرصتیم یوخدور دیزیم اوسته آلام من باشوی

قانلو گوزلردن توکدوگجه سیلم قان یاشوی

کوفه نون اهلی یوروب دلدن سالوب قارداشوی

سن تراب اوسته دوشندن تنگ اولوب میدان منه

بیر قنادسیز قوش کیمی قارداش اسیرم دشمنه