دل دولوبدور غنچه تک قانیله دلدار آختارور

گوز بولود تک یاش توکور گُل یوزلی بیر یار آختارور


دل دولوبدور غنچه تک قانیله دلدار آختارور

گوز بولود تک یاش توکور گُل یوزلی بیر یار آختارور

دیده ی شب زنده داریم صبحه تک اولدوز سایور

هریانا حیران باخور بیر ماه رخسار آختارور

چشمه ی چشمیمده وار بیر سرو قامت منظری

دل ویروب باش دیده دن بیر سرو رفتار آختارور

اوزگه لر اولسا سلامت یا گوزل گوز عاشقی

عشق بیماری همیشه چشم بیمار آختارور

تارِ عمریم بسته دور بیر نقطه ی خال لبه

گوزلریم بو نقطه نی مانند پرگار آختارور

ایلیوب تارِ دله تاثیر مضراب فراق

شوریله ایلور نوا بیر طُرّه ی تار آختارور

من شکسته قلبیله نورسته بیر گُل عاشقی

حیف اولا گُل گُلستاندا صحبت خار آختارور

آیریلان گوندن گُلیمدن باخمارام رنگ گُله

قان اولان گوگلوم نه گُل نه سیر گُلزار آختارور

نینوا دشتنده سالّام یاده بیر خندان گُلی

ایله بیر گُل گُلستانلار تا جهان وار آختارور

بیر قوجا قدّی بوکولموش باغبانی وار اونون

باغبانی اوز گُلین گُلزاریده زار آختارور

گُل نه گُل گُللر او نا عاشق، علی اکبر آدی

بیر اوغولسوز شه اونی میداندا آغلار آختارور

جور و بیداد مخالفدن شهنشاه حجاز

قوس قامتله نشان تیر اشرار آختارور

وای اوغول دلده، محاسن اَلده، گوزده خونِ دل

اوز جوان اوغلین آتا با چشم خونبار آختارور

گه گیدور، گه سَسلَنور ای نوجوانیم هارداسان

بُلموسن یالقوز آتان بیر یاور و یار آختارور؟

هارداسان، سَس ویر، سسون قربانی دوشدوم نطقدن

نخله ی عمریم سنون تک حاصل و بار آختارور

خیمه دن عرشه چخوبدور وا علیّا ناله سی

جدّیمون آئینه سین اولاد اطهار آختارور

چوخ دولاندی تاپدی آخِر باغبان اوز نوگُلین

بیر گُله مین خار گوردی قصد آزار آختارور

شه گوروب شهزاده نی بی اختیار آتدان دوشوب

کوفیان گوردی آتا، فرزند دلدار آختارور

قلبینون بندین قیروبلار، دیزلری گَلمور دورا

قلب عالم، طاقت دلبند مضمار آختارور

عین عین اللهی قانیاش دولدوروب درای کیمی

ایله بیر دریا همیشه ابر آزار آختارور

چشمه ی چشمی یوزه اشکین توکر باران کیمی

اوز عزیزین عزّت دنیا و دین خوار آختارور

دیزلری اوسته سوروندی شاهِ دین یِتدی قدم

گوردولر قلبی سینوب، جَبریله جبّار آختارور

تا یِتیشدی باغرینا باسدی داغیلمیش پیکرین

سسلدی دور، بو کمکسیز بیر مددکار آختارور

قویدولار یالقوز اوغولسوز من غریبی کوفیان

بو غریبین قتلینی قرخ مین جفاکار آختارور

بو منیم قانیمدی جسموندن رواندور سو کیمی

قانیمون سفگین عبث بو قوم خونخوار آختارور

من اوزوم اُلّم اگر بو قوم دون اُلدورمَسه

قتلیمه بی جا سپاه کینه اصرار آختارور

ای حسینی خوش اثردور سوزلرون سندن صورا

صاحب علم و هنر عالمده آثار آختارور

ارزش اشعاروی با فضل شعر اهلی بُلر

شخص دانشمند و فاضل بیله اشعار آختارور