اورک گوزومده عجب منظره هویدادی

نه منظره که به سان بهشت اعلادی


اورک گوزومده عجب منظره هویدادی

نه منظره که به سان بهشت اعلادی

دیسم بهشتیده هرگز بیله صفا یوخدی

ایدر بو عرضیمی تصدیق او گوز که بینادی

اورک گوزیله باخاندا او ایکه من گورورم

دیلیم بیانینه عاجزدی ناتوانادی

ایله مجسّم اولور عالی بیر سرا گوزومه

که آستانه سینه فرش اولان ثریّادی

او صحنه که گورورم وادی مقدّسدور

محل لطف خدادی، مقام موسادی

او قبّه که باش اوجالدوبدی قبّه ی فلکه

طواف ایدن اونی خورشید عالم آرادی

او قبّه دن گون ایدر کسب نور هر گونده

دیمه بو نور ندور یا بو نه تجلّادی

او گون که سیر ایدر افلاکی گونده بیر دفعه

مرامی شوط همان قبّه ی معلّادی

او قبّه صاحبی کیمدور سوال ایتدیم من

جواب گَلدی قتیل گروه اعدادی

ذبیح کوی محبّت، شهید عشق خدا

یگانه گوهر گنج خدای یکتادی

آدین سوال ایلدیم ویردیلر جواب منه

حسین تشنه جگردی، آناسی زهرادی

ایشیتمیسن حرمینده اوغول دیور آغلور

اَلی اورکده گَزور، ذکری وا حسینادی

اجازه حاصل ایدوب داخل رواق اولدوم

نجه رواق، بهشتدن یقین دل آرادی

ایله رواقه اگر عرض ایدم لیاقتی وار

رواق عرش معلّادی، بلکه بالادی

گورن گوز ایستوری گورسون، که اَل اَل اوسته دوران

مسیح عشق حضورینده یوز مسیحادی

کلیم منتظر رخصتِ تکلّم دور

ذبیح گر اولا خُدّامی فخر عُظمادی

شهاب کشتی فکری اُتورمه اوز باشنا

گوزَتله غرق اولوسان، بو عمیق دریادی

کناره چخما، سوزون رشته سی چخار اَلدن

بیان واقعه ایله، دیمه که رویادی

او تحت قبّیه باخ بیرده بلکه بیر گوره سن

او محترم حرم ایچره نه شور و غوغادی

او آلتی گوشه ضریحی طواف ایدنلری گور

عجب مراده یتوبلر عجب تمنّادی

بیری زیارت اوخور گوز یاشین ایدیر جاری

بیریسی درد دله دل آچوبدی گویادی

بیری نظرده علی اصغری مجسّم ایدور

آدی صغیر ، گورور ماجراسی کبرادی

سوسوزدی آغلور آناسی باسوبدی سینه سینه

آناسی شامه گیدوب حالی چوخ غم افزادی

آنا یرینه آتا متّصل دیور لای لای

خرابه ده آناسی ذکری وا علیلادی

بیری عروس او زلفون یولان یری گوروری

ببریسی یاده سالور قان حنالی دامادی

بیری دیه او یتیمه اگر مبارک باد

حقیقتاً یری واردور، دیمه کنایادی

بیری ضریحین اَیاق سمتینی اُپور، دویمور

مگر او یرده یاتان هانسی ماه سیمادی

او بیر جواندی که تعریف ایدوب اونی دشمن

جمالی گُلدی، لبی غنچه، قدّی رعنادی

ایله گُل اوزلی بشر گورمیوب بو گردش پیر

علاوه گورمیه جاق باقی تا بو دنیادی

مین ایلدی گُل آدی زیب مجالس غمدی

بیر عالم اهلی اونا عندلیب شیدادی

اوزی شبیه پیمبر، آدی علی اکبر

قرار و طاقت و آرام شاه بطحادی

بیله جوانیدن اَلحق چتیندی اَل اوزماق

بیله بلایه برازنده اُمّ لیلادی

گَلوب جهاده گیدنده آناسینی گورسون

گوروب خانمدا اُلوم حالی آشکارادی

آناسینا اورگی یاندی، نطقیدن دوردی

صراحتاً دیمدی بو وداع اُخرادی

آنا گورنده اوغول حالینی ، اوزی قاندی

اوغول قلج دمینه گیتماقا مهیّادی

نه اولدی تاب تکلم اوغولدا نه آنادا

تصوّر ایلمه سن بولمه سن نه اوضادی

آنا بالایه باخوب آغلادی ، بالا آنیه

او حاله آغلاسا سکّان عرش باجادی

اوغول، آنا، باجی، عمّه، تمام عورت اوشاق

قاریشدی بیربیره گویا که حشر برپادی

اوجالدی ضجّه و شیون خیام طاهره دن

دایاندی عرشه حریمون فغان و فریادی

گر ایستَسَن بُله سَن بُل بو سوزدن اهل حرم

سُوَردیلر که نه قدری او سرو آزادی

خیامیدن نچه دفعه تمام اهل حرم

چیخوب کناره او گون، اَلده واردی اسنادی

بیری حسینون او صحراده اوز وداعیدی

که چولقامیشدی فغان پرده پرده ایجادی

بیری بو تازه جوانی یولا سالاندِیدی

گورن دیردی یقین نفخ صور پیدادی

بیری اَلیندن اُپردی، بیری ایاقیندن

بیری کسردی یولون دلده شیون و دادی

بیری چخاندا سراسیمه خیمه دن، یوگوروب

باساردی باغرینا اول نوجوان ناشادی

بیری دیردی غریبوخ بیزه ترحّم ایله

سنون بو آیریلیقون تلخ و ناگوارادی

اوغول آناسی باخاردی دوتاردی دلدن اود

اَلولانوب جگری، اودلانوردی اَکبادی

دیردی بیر چکیلون یوز قویوم قدم لرینه

اوغول اَیاقینه دوشه آناسی اولادی

قویون آچیم ساچیمی بیر توکوم گیدن یولونا

سالوم کمنده، عجب بو غزال زیبادی

گیدر دچار اولی صیّاده خیمیه گلمز

قالور آناسی اوغول سوز بو چولده تنهادی

ویرون اَلین اَلیمه سیز، منیم گوزوم گورمور

گوزیمه پرده گَلوب یا که لیل یلدادی

اوجادان آغلامیون بلکه بیر سسین ایشیدیم

اوغول سسی آنیا طاقت و توانادی

امام گوردی حرملر علیدن اَل چکمور

او آه و ناله او خسته جوانه ایذادی

دیدی بالامی چوخ اینجیتمیون قویون گیتسین

یولونی گوزلور اونون منتظردی جلّادی

بالامی آغلیوب آغلاتمیون ، عطش گتورور

اوزی سوسوزدی، بو صحرا بیر اودلی صحرادی

حرملرین هره سین بیر دلیله ساکت ایدوب

اگرچه هر تکی بی صبر و بی شکیبادی

حرم غزالینی میر حرم حرمدن آلوب

سالوب یولا اوز اَلیله چاغیردی صیّادی

یوزون دوتوب گویه عرض ایتدی شاهد اول یا رب

بو نوجوان که هامی حُسنِ خُلقه دارادی

آدی علیدی، آتام مرتضی نشانه سیدی

ولیکن خَلقاً و خُلقاً شبیه طاهادی

بس ایت بو قصّه ی جان سوزی شرح ویرمه شهاب

آناسی فاطمه بو غمده ناتوانادی