عرش اعظمدن بو آی فریاد واویلا گلوب

کربلایه باش آچوخ اوغلی اُلن زهرا گلوب


عرش اعظمدن بو آی فریاد واویلا گلوب

کربلایه باش آچوخ اوغلی اُلن زهرا گلوب

چون بو پیغمبرین اوغلی اولوب عطشان قتیل

گوگلره اعلان ماتم پخش ایدوبدور جبرئیل

قدسیان مظلوم امامه گوزیاشی ایتسون سبیل

عرش ماتمخانه اولسون حقّیدن طغری گلوب

باد ظلمیله بو آی گلزاریده گللر سولوب

گلستان مصطفی بلبل لری خاموش اولوب

کربلا مظلوملر قانیله دریا تک دولوب

کشتی دین غرق اولوب قان موجه چون دریا گلوب

گرچه دعوانی بو آی پیغمبر ایتمیشدی حرام

قویمیوب امّا او حکمه اهل کوفه احترام

سبط طاها قتلینه ایتدی او بی دین لر قیام

بیر غریبیله ایده قرخ مین نفر دعوا گلوب

کربلاده گرمیدی ازبسکه بازار بلا

بیر بیرینه سبقت ایلردی خریدار بلا

جمع اولوب یتمیش ایکی برجسته تجّار بلا

باش ویروب سود آلماقا یکسر ایده سودا گلوب

گورمیوب دهرین گوزی بیر نوجوان اکبر کیمی

خَلق و خُلق و منطقی اوز جدّی پیغمبر کیمی

باش قلجلاندی بویاندی قانینه حیدر کیمی

نالیه نی تک اُلونجه بی نوا لیلا گلوب

کربلاده طوی دوتوب شاه شهیدان قاسمه

کام آلا ویرموبله فرصت قوم عدوان قاسمه

حجله گاه عیش اولوبدور قانلی میدان قاسمه

حجله گاهه نوعروسی دلده واویلا گلوب

کوفیان بو آیدا بیر سرو خرامان یخدیلار

سو کنارینده ابوالفضلی لب عطشان یخدیلار

ظاهراً عبّاسی آتدان قوم عدوان یخدیلار

باطناً ارکان دینه صدمه ی عظمی گلوب

مَهریدی زهرایه گرچه قان اولان آب فرات

ویرمدی بیر قطره امّا اوغلونا قوم عدات

سو دیدی یاندی سوسوزدان عترت عین الحیات

نالیه سوز عطشدن عترت طاها گلوب

شدّت سوز عطشدن یاندی حیدر قیزلاری

گل کیمی سولدی خزان اولدی پیمبر قیزلاری

سسلینده العطش ساقیّ کوثر قیزلاری

حسرتیندن موجه کوثر، نالیه طوبی گلوب

آلدی آغوشه حسین بیر سودامر قونداقینی

گتدی میدانه سولی اوچ شعبه اوخ مشتاقینی

حرمله بیر ظلم ایدوب طاق ایتدی زهرا طاقینی

باش آچوب جنّتده زهرا، نالیه زهرا گلوب

گوردی قانیله بویاندی تحفه ی برجسته سی

خیمیه قِیتردی بیر قونداق دولی گل دسته سی

سسلدی گل ای باجی ای درد و محنت خسته سی

خیمه دن دیشره او ساعت زینب کبری گلوب

گوردی آغوشه آلوب خورشید دین بیر اولدوزی

آغ گیینمیشدی گیدنده، ایمدی گیمیش قرمزی

آلدی قارداشدان، آناسین سسلدی زهرا قیزی

گَل سولان گلزاریوه بیر غنچه ی زیبا گلوب

گلدی باغ مصطفانین اول خوش الحان بلبلی

آلدی زینبدن باسوب آغوشه اول خندان گلی

سسلدی ای غنچه گل، ای بو غریبه سویگلی

سن کیمی آیا گُله بیر خاریدن ایذا گلوب؟

صابرم صبر ایلرم هر محنت عظمایه من

دلده بو داغی آپارّام عالم عقبایه من

ایلرم شکوا قیامتده آنام زهرایه من

هانسی طفل شیرخواره بو ستم آیا گلوب؟