یاحسین یتیشدی محرّمون ماتمونده عالملر آغلوری

عرش و فرشه قاره چکوبدوله یرلر آغلوری گویلر آغلوری


یاحسین یتیشدی محرّمون ماتمونده عالملر آغلوری

عرش و فرشه قاره چکوبدوله یرلر آغلوری گویلر آغلوری

چولقیوب هامی ماسِوانی غم ماتمه باتوب ختم الانبیا

سینه چاک ایدوب مرتضی علی دلده واحسینا ایدر نوا

بانگ نوحه آفاقی دولدوروب آغلوری یانا یانه مجتبی

روضه خواندی معناده جبرئیل، سس چکوب پیمبرلر آغلوری

جنّت ایچره زهرا آنان سالور سوز آهیله دللره شرر

آغلادور خواتین جنّتی قدسیان اولوب جمله خونجگر

قاره پوش اولوب آغلاشور بو آی شیعیان دل بسته سربسر

پرچم عزا دلده دیده تر نالیه گلوب یکسر آغلوری

یاحسین سنه عالمین آرا چوخ اولوب یانان دلدن آغلین

عمرینی سراسر عزا دوتان سیل اشکی رخساره باغلین

گورمیوبدی چشم جهان ولی زینبون کیمی سینه داغلین

ایمدیده مزارینده حالیوه زینب الم پرور آغلوری

داد او وقتیدن کربلا چولی دولدی ناله و سوز و آهیدن

اون بیر محرّمده زینبین سالدیلار یولون قتلگاهیدن

گوردی بیر یارالی بدن دوشوب ظلم لشکر دین تباهیدن

اهل بیتینون حال زارینه یرده بی کفن پیکر آغلوری

عرض قیلدی کامیمجه من سنون محنتونده دل داغلینمدیم

پیکرونده سانسیز یارالارون مرهمین تاپوب باغلینمدیم

سس چکوب سنه قتلگاهیده وای حسین دیوب آغلینمدیم

چاره سیزلیقیندان باخور یانور دخت ساقی کوثر آغلوری

ای آنام عزیزی گیچن گیجه زینبون چکوب درد بی حساب

صبح اولونجا اوغلی اُلنلرین نازینی چکوب ایلیوبله خواب

صبحه تک ولی یاتمادی رباب ایلدی دل عالمی کباب

گوردوم اللری سینه ده یانور دلده وای علی اصغر آغلوری

سسلنوردی گل هارداسان علی یاندیرور شرار غمون منی

آچدیلار فراتین یولین بالا یوخ فراتیده لشکر دنی

ایچمیشم سو سینم الولانور آختارور علی گوزلریم سنی

سو اله گلندن یولوندا بو ناگران قالان گوزلر آغلوری

یاحسین بیر امّیدیله اله آلدی جابری دفتر و قلم

پیری ایستمیشدی بو وزنیده نوحه ی محرّم اولا رقم

ایستدی کمکلیق خلوصیله لطف قیلدی خلّاق ذوالکرم

ایستدی یازا یاحسین گوروب الده خامه و دفتر آغلوری