جدّیوی یابن الحسن قوم ظُلام اُلدوردولر

دعوی دین ایتدیلر امّا امام اُلدوردولر


جدّیوی یابن الحسن قوم ظُلام اُلدوردولر

دعوی دین ایتدیلر امّا امام اُلدوردولر

اهل کوفه عالم امکانی محزون ایتدیلر

قلب عالم قلبینی چون لاله پرخون ایتدیلر

نینوا دشتینده بیر لیلانی مجنون ایتدیلر

بیر جوان شبهِ نبی ماه تمام اُلدوردولر

گوردولر شیرخدایه بنزوری عباس شیر

حیله ایله کسدیلر سرپنجه سین قوم شریر

تاپدی روبه طبعلر جرات ووروب چوخ تیغ و تیر

تیغ تیزه ایتدیلر جسمین نیام اُلدوردولر

بسکه آهن دللرین دوتموشدی قلبین زنگ لر

دین و ایمان شیشه سین سیندیردیلار دل سنگ لر

ووردولار بالمرّه ننگه پشت پا بی ننگ لر

صاحب شان و مقام و ننگ و نام اُلدوردولر

اولدولار بی نوعیله جام می ناحقّه مست

ایتدیلر پیمانه ی پیمان اسلامی شکست

دین حقّی یخماقا اول فرقه ی دنیا پرست

ایتدیلر دنیا هواسیله قیام اُلدوردولر

ایلین قرآن حمایل آدلاری قرآنیان

چکدیلر یاسین و طاها وجهینه تیغ و سِنان

ایتدیلر قرآن ناطق قلبینی تیره نشان

ووردولار بیر سینیه دورت مین سهام اُلدوردولر

فاطمه مَهریّه سیدی قان اولان آب فرات

سو یانندا یاندیلار امّا عطشدن طاهرات

دونمدی قانه ندور علّت سراسر سائلات

صاحب آب فراتی تشنه کام اُلدوردولر

بسدی بیر ایل بیر قبیله اهلینه بیر داغ دل

اولمادی سفیانیان امّا بو ایشدن منفعل

اولسون اولاد امیّه هر ایکی دنیا خجل

ایتدیلر آل منانی قتل عام اُلدوردولر

اون ایکی آیدان ایدوب قرآندا حیّ لایَنام

دوردینی شهرُ الحُرُم قان توکماقی اوندا حرام

اَشهَرُ شهرُ الحُرُمدندور محرّم لاکلام

اوز حبیبین عاشر شهرُ الحرام اُلدوردولر

امّته امر ایلمیشدی حضرت خیر الانام

خانه ی اسلام تعمیرینده قیلسون اهتمام

عاقّ اولوب پیغمبره گوستردیلر عکس مرام

ایتدیلر تخریب دینه اهتمام، اُلدوردولر

ساخلا ال، ویرمه «حسینی» مطلبه بیر بیله طول

کائناتی ایلدی بو ماجرا زار و ملول

بسدی بو مصراع امام عصر اگر ایتسه قبول

جدّیوی یابن الحسن قوم ظُلام اُلدوردولر