نهضت خونین عاشورا حساب اوستونده دی

هم نماز اوستونده هم حفظ حجاب اوستونده دی


نهضت خونین عاشورا حساب اوستونده دی

هم نماز اوستونده هم حفظ حجاب اوستونده دی

قانیله کرب و بلانین دشتی یکسر دولماقی

گلشن حریتین سوز عطشدن سولماقی

اصغرین حلقی نشان تیر عدوان اولماقی

هم نماز اوستونده هم حفظ حجاب اوستونده دی

بیر قولاق ویر زینبین فریاد و واویلاسینه

جان و دل یاندور شرار شعله ی آواسینه

دستگیر اولماقلیقی دشت بلا اعداسینه

هم نماز اوستونده هم حفظ حجاب اوستونده دی

اکبرین توپراقلار اوسته حون پاکی آخماقی

یاندیروب قلب جهانی نار هجری یاخماقی

چشم خون باری آنایه نوک نِیده باخماقی

هم نماز اوستونده هم حفظ حجاب اوستونده دی

آچ گوزون ای مدّعی عبّاسه عاشقسن اگر

بول ندن اوتری اولوب عنقا کیمی بی بال و پر

چشم بینا کیمده وار بو سرّی یاخشی درک ایدر

هم نماز اوستونده هم حفظ حجاب اوستونده دی

شاه گلگون پیکرین باشدان جهانی آتماقی

دلده شور وصلِ دلداریله قانه باتماقی

طائر عرش آشیانین توپراق اوسته یاتماقی

هم نماز اوستونده هم حفظ حجاب اوستونده دی

قاسم شهزاده نون آماده ی جنگ اولماقی

جسمی آماج خدنگ قوم بی ننگ اولماقی

ظلمیله مقتول اولوب قانیله همرنگ اولماقی

هم نماز اوستونده هم حفظ حجاب اوستونده دی