ای حبیبیم وی محبون خالق یکتا حبیبیم

وار کرامتدن باشوندا تاج کرمنا حبیبیم


ای حبیبیم وی محبون خالق یکتا حبیبیم

وار کرامتدن باشوندا تاج کرمنا حبیبیم

سن گل خوشرنگ و بوی گلستان مصطفی سن

سبط طه سن سرور سینه خیرالنساسن

مرتضانین نور عینی خامس آل عباسن

گلشن آلعباده ای گل زیبا حبیبیم

ماهه بنزتسم جمالون آیدا یوخ بیله وجاهت

سروه اوخشاتسام خرامون سروده یوخدور بو قامت

هانسی سروین قامتنده قامتون تک وار قیامت

قامتوندن بیر نمادور قامت طوبا حبیبیم

علت ایجاد عالم آیت صبح ازلسن

ذات خلاقه مثلسن نور حی لم یزلسن

چوخ گوزللر وار جهاندا هر گوزلدن سن گوزلسن

عالم امکاندی صورت سن اونا معنا حبیبیم

سن نئجه زیبا بشرسن مظهر صنع خداسن

سن نئجه احلا ثمرسن ریشه نخل هداسن

سن نئجه اعلا خبرسن هر خبرده مبتداسن

مبتدادور بو خبردن دنیی و عقبا حبیبیم

گر حبیبیم کلمه سیله من سنی ایتدیم مخاطب

عذریمی لطفا قبول ایت عفو قیل ایتمه معاقب

نیلیوم عشقونده جام دل اولوب قندان لبالب

عشق وادار ایتدی اولدوم بو سوزه گویا حبیبیم

گر دیسم سن شه عالم من گدایم سوز خطادور

سربسر شاهان عالم آستانوندا گدادور

کمترین خادم قاپوندا انبیادور اولیادور

ای سراسر اولیادن رتبه سی والا حبیبیم

گوهر گنج حقیقت در دریای شرف سن

نوح طوفان مصیبت تیر آلامه هدف سن

کربلایه زیب و زینت روح سلطان نجف سن

ای عزیز جان شاه یثرب و بطها حبیبیم

کلمه کنزاً خفیاً معنی اَحبَبتُ اُعرَف

اولماسیدوز سیز اولوردی عالمه هاردان معرَف

اولدی تشریفاتوزیله عالم خلقت مشرف

تا وجوده گلدی بو دنیا و مافیها حبیبیم

اولماسیدوز سیز معرِف شاهد مشهوده ای شاه

عالم غیب و شهوده بیر نفر اولمازدی آگاه

سیزلری برهان محکم ایلدی توحیده آگاه

نفی اثبات اولدی سیزدن تاپدی لا الّا حبیبیم

کون و امکاندا تاپولماز کربلایه بیر چاتان یر

وار یری فخر ایتسه عرشه سن سوسوز قانه باتان یر

عرش اعلادن شرفده با شرفدور سن یاتان یر

عرش اعلایه سنیله فخر ایدر غبرا حبیبیم

گلشن عمرون دولان گون تیر کین خار و خسیله

نوگل طه سولان گون ظلم قوم ناکسیله

محشر کبری اولان گون سنده بیر دوتقون سسیله

قتلگاهونده دیوردون ای منه مولا حبیبیم

بو بلا مطرح اولان گون من ازل ویردیم بلانی

عالم ارواحدن من آختاروردوم بو بلانی

جذبه عشقون گتوردی مسکن ایتدیم کربلانی

عشق بازارینده گوردوم گرم دور سودا حبیبیم

گوردوم ایستور دین حقه پرده چکسون قوم ناحق

اعتلای کلمه حق اوسته دوردوم دلده یا حق

من یخیلدیم حق اوجالدی یر یوزینده واردی تا حق

فرقه ی ناحق اولانماز بیرده پابرجا حبیبیم

محضر عشقونده دلدن نی کیمی چوخلار سیزیلدار

هانسینون جسمنده اما من کیمی اوخلار سیزیلدار

بیر نفر یالقوز غریبم اوخ سسی یوخلار سیزیلدار

راضیم امّا بو حاله ایتمرم شکوا حبیبیم

قول ویرمیشدیم ویرم بو چولده یتمیش بیر فدا من

ایلدیم صد شکر یارب ایتدیقیم عهده وفا من

قتلگاه کربلانی ایلدیم رشگ منا من

چاک چاک اعضا داغیلمیش چون گل حمرا حبیبیم

ایتدی گل یوزلی جوانلار پیکرین مجروح پیکان

چشمه چشمه آخدی قانلار قانیله دولدی بیابان

آچدی صد برگ ارغوانلار کربلا اولدی گلستان

لاله تک قاندان بزندی دامن صحرا حبیبیم

دوره ده بو قان ایچنلر بو منیم پژمرده حالیم

او نوامیس پیمبر بو منیم پوزوقون جلالیم

بو سویانلار اُلدورنلر او منیم باشسیز عیالیم

گور نه عالمدور گواه اول ای حق یکتا حبیبیم

بو علی اکبر او قاسم بو رضیع بی گناهیم

او یانان سوز عطشدن اهل بیت بی پناهیم

او دوشن صدپاره قولسوز سو یانندا سرسپاهیم

بو اوزوم یالقوز یارالی دلده واغَوثا حبیبیم

بو بلا صحراسی بو من، بو منیم سوز و گدازیم

او سولان گللر بو گلشن، بو منیم قان دستمازیم

او حرمخانم بو دشمن، بو منیم آخِر نمازیم

گورمیوب بیر بیله عالم دیده ی دنیا حبیبیم

او پریشانحال زینب، او بالام سجّاد نالان

خیمه گاهیمدور یغوبدور باشه بیر جمع پریشان

بو آنای زهرای اطهر باشیم اوسته دیده گریان

سسلنور ایوای اوغول وای زهره ی زهرا حبیبیم

دل شکسته قیزلاریمدان اوج ایدر افلاکه ناله

اشک تر گل یوزلرینده قطره قطره همچو ژاله

گور خواتین حجازی اشقیا سالموش نه حاله

دولدوروب دشت عراقی شور و واویلا حبیبیم

ناگهان الهام اولوندی بارگاه کبریادن

ای یارالی سوگلوم ایتمه شکایت بو بلادن

باخما گل جسمون دولوبدور گل کیمی خار جفادن

گلشن قدسیمده سنسن گلستان آرا حبیبیم

ایتمه غم بولدی بهاسیز قانیوی بو قوم کافر

ویردی بو صدپاره جسمه قانلی توپراقلاردا بستر

قانیوه من خونبهایم ای ایکی دنیایه سرور

هر ایکی دنیاده قیلّام امریوی مُجری حبیبیم

اون ایکی یردن باشوندا باخما وار کاری جراحت

حشریده مختصّ قیلّام من سنه حکم شفاعت

امروه جنات و دوزخ غول کیمی ایلر اطاعت

هر کیمه هر یرده سوُسن قیل معیّن جا حبیبیم

ای خدای ذوالجلاله مظهر جودیله قدرت

قبریوه قالمیش حسینی بیر اوزون مدتدی حسرت

بیر بیله آغلور سیزیلدیر ایتموسن بیر وقفه دعوت

لطفیوی اوز نوکروندن کسموسن آیا حبیبیم؟