عالم اسلامیده حرّ ایله خدمت ایلدی

تا جهان وار اوز آدین تاریخه زینت ایلدی


عالم اسلامیده حرّ ایله خدمت ایلدی

تا جهان وار اوز آدین تاریخه زینت ایلدی

گوردی عاشورا گونی کفریله دین دوردی طرف

هر طرفده نوریله ظلماتیدن باغلاندی صف

فرصتی بولدی غنیمت قویمادی اولسون تلف

دائمی بیز عزّتین کسبینده سرعت ایلدی

گلدی سعداوغلین مخاطب ایتدی اول آزادمرد

سویلدی آیا واروندور واقعاً فکر نبرد؟

بو حسین ابن علیدور گلشن اسلامه وَرد

باغبانلیق بو گله ختم رسالت ایلدی

بنده ی نفس دنی- حرّه بیله ویردی جواب

وار خیالیم ایلیم بیر جنگه بو گون فتح باب

باش گیده، قولّار گیده، قان یاغدیرا گویدن سحاب

تا دیسونلر خادم صادق نه خدمت ایلدی!

حرّ- اولاندا ایده آلیندن او شومین باخبر

نفسینه هی ووردی عقلی کای ظلوم بد سیَر

سن حسینی ایلدون بو تیر آلامه سپر

سندن اوّل کیم بو شاه دینه جرات ایلدی؟

سن گتوردون بو حسینی کربلا صحراسینه

سن سبب سن جسمی گر غرق اولسا قان دریاسینه

هانسی غول بیله جسارت ایلیوب مولاسینه

هانسی شاهه بیله بیر ظلمی رعیّت ایلدی

عقلی نفسه غالب اولدی تاپدی بیر حال نِدَم

نفس امّاره اولوب لوّامه، قلبین دوتدی غم

مطمئنّه اولماقا گوردی قالور نچّه قدم

اول طریقین طیّنه مردانه همّت ایلدی

ایستدی ویرسون خطردن روحینه فوراً نجات

اُلماقیله ایلسون بو دهریده درک حیات

اوز یرینده گلدی دوردی واله و حیران و مات

لرزه دوشدی جسمینه تطهیره نیّت ایلدی

گوزیاشیندان غسلِ تطهیر ایتدی، دلدن چکدی آه

سالکِ راه وفا دوتدی طریقین خانقاه

یوز دولاندوردی گویه عرض ایتدی یارب اول گواه

اوز خطاسیندن بو عاصی بنده رجعت ایلدی

قُرَّةِ ابن قیسه بعداً یوز دوتوب ایتدی خطاب

ایتموسن سیراب آتون یا نه؟ بیله ویردی جواب

مرکبه بو رسم و عادتدور ویرر ابطال آب

لیک بو گون قُرّه ترک رسم و عادت ایلدی

نقل ایدر قُرّه او ساعتده بیله ایتدیم خیال

حُرّ ایستور ایلسون او دشتیده ترک جدال

بولمدیم امّا بودور فکری ایده درک جلال

واقعاً درک مقامات و جلالت ایلدی

گر بولیدیم فکرینی منده ایدردیم اتّفاق

جسمیمی راضی اولاردیم دوغراسون اهل نفاق

حرّ تک منده چالاردیم قان ایچینده ال ایاق

حرّ، حرّ اولدی حسینه یاخشی خدمت ایلدی

حرّ کم کم یوز قویوب اردوی اسلامه طرف

گوردی اُووس اوغلی مهاجر ناگه اول نیکو خَلَف

ابن سعدین لشکریندن ایلیوبدور ترک صف

مضطرب حالی اونا تاثیر او ساعت ایلدی

یوز دوتوب اول نامداره ایلدی بیله خطاب

قورخوسان آیا؟ ندور سنده بو حال اضطراب

اَشجعُ النّاسی سوروشسا بیر نفر، ویرّم جواب

غالب اولدی حرّ هر دعواده شرکت ایلدی

ایمدی امّا سربسر لرزه دوتوبدور جانیوی

قورخوسان توکسون بنی هاشم بو چولده قانیوی

حرّ- سسلندی منه آرتور داخی ایمانیوی

هانسی بیر دعواده گوردون حرّ وحشت ایلدی

قالموشام جنّاتیله دوزخ آراسندا ملول

ایلیوم حیرتدیم هانسی بیرین آیا قبول

حُفره ی نیرانه هرگز ایتمرم با..َ. نزول

هانسی عاقل دوتدی ناری ترک جنّت ایلدی؟

تا سوزین قورتاردی سوردی مرکبین چوخ تند و تیز

ایتدی عزم سوی لشکرگاه شاه رستخیز

هر گورن فکر ایتدی ایلور حمله باشلانسون ستیز

فعلینه تحسین او قوم پست فطرت ایلدی

تا یاخونلاشدی حسین اردوسینه اول ذی فنون

قویدی شمشیرین غلافه ایتدی قَلخانین نگون

گوزلرین دولدوردی اشکیله او دارای شئون

شرح حالین یوزده اشکیله کتابت ایلدی

پای بوسه سالدی توپراقه اوزین اول نامدار

شه قباقینده اوزین قیلدی غلام خاکسار

دوتدی دامانین شهین آچدی زبان اعتذار

سویلدی ای شاه دین نفسیم جنایت ایلدی

سیّدی، سیز چرخ لطفه نیّر تابنده سوز

معدن جود و سخا هر مدحته زیبنده سوز

عالم امکان سیزه بنده، خدایه بنده سوز

حق سیزی اوز رحمتیندن خلقه آیت ایلدی

سیزسوز عالمده خدای عالمه اعلی مَثَل

سیزسوز انوار الهیّه مصابیح ازل

سیزلری هادی ایدوب خلقه خدای لم یزل

سیزلریله حیّ اعلی فتح خلقت ایلدی

خُلد اعلایه سیزون حبّوزدی شاها- شاهراه

چاره هر یردن کسیلسه سیزسوز عالمده پناه

ایلیوب خالق سیزی اعمال مخلوقه گواه

اسموزی دعوتده شرط استجابت ایلدی

خیریدن گر بیر خبر ذکر اولسا سیزسوز مبتدا

کلمه ی خیراته سیزسوز اصل و فرع و منتها

فعلوز احساندور همیشه، عادتوز جود و سخا

نفسینه کیم سیز کیمی احسانی عادت ایلدی

مهبطِ وحی الهی سوز شرافت سیزده دور

منبع علم و حِکَم امر امامت سیزده دور

مقتداسوز خلقه میراث نبّوت سیزده دور

خالق عالم سیزی خُزّان حکمت ایلدی

عالم امکاندا سیز خورشید عالم تاب سوز

جود و احسان و سخایه بیر آچیلمیش باب سوز

بسته دور آبه حیات خلق، سیزلر آب سوز

کیم دیر بیر کس سیزه خلقتده سبقت ایلدی

عالم خلقت سیزون وابسته دور انواروزه

خار اولا یا گل- سیزون محتاجدور گلزاروزه

اولسا حاجتمند هر کیم یوز قویار درباروزه

سیزدن اشراف جهان کسب شرافت ایلدی

اولماسیدوز سیز حیات اولمازدی بیر ذیروحده

اولماسیدوز سیز نجات اولمازدی فُلک نوحده

سن بولورسن وار نه دردیم بو دل مجروحده

نفس عمّاره منی سندن خجالت ایلدی

آستانوزده غلام روسیاهم من سنون

چوخدی تقصیریم بغیشله، ال منیم دامن سنون

دوست و دشمن لطفیوه شاها اولور ایمن سنون

سیزلری ا... بیزه باب کرامت ایلدی

من او بدبختم سنه اولدوم ازلده سدّ راه

نامه ی اعمالیمی بختیم کیمی ایتدیم سیاه

بو چوله سالدیم گذارون ای کمکسیز پادشاه

تا سنی بو قوم دون محصور محنت ایلدی

من او عاصی بندیم تقوا حجابین یتمیشام

حق طریقیندن چخوب راه ضلالت دوتموشام

جهل اوزیله فاطمه قیزلارینی قورخوتموشام

قیزلارون اوّلده مندن خوف و وحشت ایلدی

سیز اولارسوز عالم امکاندا خلّاق مجید

ماسِواللهدن مقام و شانوزی ایلوب مزید

گیتمیوبدور بیر سوال اهلی قاپوزدان ناامید

اَسخیا سیزدن بلی کسب سعادت ایلدی

بولمدیم من ایش بورا منجرّ اولار ای شاهِ دین

یوخسا کسمزدیم یولون ای قبله ی اهل یقین

من سبب اولدوم سنی محصور قیلدی قوم کین

عترت پیغمبره جرات بو امّت ایلدی

گلمیشم امّیدیله درباریوه زار و ملول

ایله فرمایش گوروم توبَم اولار آیا قبول

لطفیله نطق گهربارین آچوب سبط رسول

حرّیله بی منتها رافتله صحبت ایلدی

ایتدی فرمایش باشون قوزا چوخ ایتمه آه و زار

رحمتی اوز نفسینه واجب قیلوب پروردگار

رحمته مشمول ایدوب ایلر عقوبتدن کنار

هر کس اوز جرمیندن اظهار ندامت ایلدی

حُرّسن، یا حرّ اولما لطف حقدن ناامید

هر ایکی دنیاده اولدون نیکبخت و روسفید

باخما ساتدی دینینی دنیایه بو قوم عنید

عترت طاهایه اظهار عداوت ایلدی

حرّ عرض ایتدی که ای سبط رسول کائنات

ایمدیکه ایتدون بو عبد روسیاهه التفات

سرفراز ایت نوکرون ویر درد خجلتدن نجات

چوخ سرافکنده منی بو دردِ خجلت ایلدی

اوّلین خاطی حضورونده منم ای مقتدا

ویر اجازه خاک پایونده اولوم اوّل فدا

تا رضا اولسون غلاموندن قیامتده خدا

نوکره بولسونله مولاسی نه رافت ایلدی

حرّی مشمول عنایت قیل سنی زهرا آنان

خاطر ناشادیمی لطفیله ایله شادمان

صفحه ی تاریخده قالسون آدی تا وار جهان

خلق بولسون حرّ جرمیندن انابت ایلدی

گوزلرون قربانی گل قویما گوزی گریان اولوم

اذن ویر اوّلده من اوز قانیمه غلطان اولوم

مظهر پیغمبر اوغلون اکبره قربان ایلدی

حرّده پیغمبره گورسونله نصرت ایلدی

گوزده اشک، الده امامین دامنی پژمرده حال

آغلادی عجز ایلدی یالواردی ایتدی ابتهال

رقّته گلدی پیمبر اوغلی شاه خوش خصال

آلدی حرّین گوگلونی چوخ چوخ محبّت ایلدی

ایلدی مهمان نوازی سرور مُلک حجاز

ایتدی فرمایش قوناقسان سن بیزه ای پاکباز

سو که یوخدور تشنه اولسان گَل اوتور دینجَل بیر آز

حرّین آرتدی شیونی، گوزیاشی شدّت ایلدی

سویلدی آغلار گوزیله ای شهنشاه اَنام

ویرمرم دامانون الدن ایتمسم تحصیل کام

عاقبت اذن جهاد ایتدی عطا مظلوم امام

حرّ شاد اولدی قتال عزمیله عودت ایلدی

رزمگاهه تا یتوب الده حسام جان شکار

باشلادی عالی رجز اول رادمرد نامدار

سویلدی ای اهل کوفه سیزده یوخدور شرم و عار

سیز کیمی عالمده کیم ترک مروّت ایلدی

مینلریله نامه یازدوز ای وفاسیز کوفیان

دعوت ایتدوز کوفیه پیغمبر اوغلین میهمان

اوز قوناقین اُلدورور دنیاده هانسی میزبان؟

سیز ایدن ظلمی جهاندا هانسی ملّت ایلدی؟

فرض ایدون بو شاه بی لشکر ایا اهل مجاز

نه اماموزدور سیزون نه سرور مُلک حجاز

نه پیمبر اوغلیدور نه باغ دینه سرو ناز

حق یولا نه سیزلری جدّی هدایت ایلدی

لامحاله بیر مسلماندور بو شاه ذوالحَسَب

اُلدورور یوخسا مسلمانی مسلمان تشنه لب

ظلموزون طغیانینه واردور نه علّت نه سبب؟

قوم اعرابی خجالت بو رذالت ایلدی

ظلمیله دوندرمیسوز شامه حسینین گوندوزین

قویموسوز آغلار رسول اکرم و زهرا گوزین

سیز یزید سگ پرسته فرض ایدون یاغی اوزین

نه گناه آخِر صغیره آل عصمت ایلدی؟

بیر سو که خلقه مباح ایلوب خدای مستطاب

بیر سو که سیراب اولور اوندان خنازیر و کلاب

ویرمیسوز بیر شربه آل اللهه ای اهل عذاب

خوردا قیزلاردان سوسوزلوق سلب طاقت ایلدی

سرپرستم من ریاحی قومینه حرّ دلیر

برق شمشیریم یانار اوددور جماعت سیز حریر

یوخ منه غیر از حسین ابن علی شاه و امیر

حرّ اولاد زنادن نقض بیعت ایلدی

ویرمیوب ویرمز سرشتی تلخ آقاج شیرین ثمر

بحر کفره ایله اولموشدی او لشکر غوطه ور

سوزلری دل سنگ قومه ایتمدی اصلا اثر

بیّنه، برهاینله هرچه نصیحت ایلدی

خواب غفلتدن اویانمور گوردی قوم کوفیان

تیغ خونریز الده ایتدی حمله چون شیر ژیان

لشکری سیندیردی اوج قوشوندان الامان

مات و مبهوت اشقیانی بو شجاعت ایلدی

سسلدی هَل مِن مُبارِز ویرمدی بیر کس جواب

شام و کوفه اهلینون دولدوردی قلبین اضطراب

بیر یزید آدلی جفاکاره حصین ایتدی خطاب

گورموسن حرّ ریاحی نه رشادت ایلدی؟

سن دگولدون هی دیردون ایلینده گفتگو؟

آرزومندم اولام حرّیله بیر گون روبرو

ایمدی گَل بو رزمگه- بو سن- او حرّ نامجو

رزمیدن باک ایتمینلر کسب شهرت ایلدی

زاده ی سفیانی ازبسکه حصین ابن تمیم

ایلدی تحریک دوشدی باشینه شوق جحیم

رزمگاهه یوز قویوب اولدی یتن ساعت دو نیم

جودت حرّ اشقیانی غرق حیرت ایلدی

ایتدی سعداوغلی حصین ابن تمیمه بیر نظر

سویلدی بِش یوز کمان داره بو امری ویر خبر

تیرباران ایلسونلر بلکه رفع اولسون خطر

قیل سیاست رمیِ دن هر کیمسه غفلت ایلدی

مقصدین بولجاق او شومین اوخ آتانلار هر نه وار

هر طرفدن مثل باران اوخلاری یاغدوردیلار

حرّین اولدی مرکبی بیر نچّه یردن زخمدار

جسمینه هم مرکبه اوخلار اصابت ایلدی

راویِ مطلبدی ایّوب ابن مُسرح نابکار

نقل ایدر حرّین آتین ایتدیم شکمدن زخمدار

پیلدیم اوندانصورا مرکوب اولوب بی اختیار

آت یخلدی راکب امّا استقامت ایلدی

گوردی ایستور آت یخلسون اول غیور نامدار

مرکب اوستوندن اوزین آتدی یره اول باوقار

تیغ خونریز الده ایتدی بیر شهادت آشکار

دشمنی تحسینه مجبور اول شهامت ایلدی

گورمدیم من بیر پیاده حرّدن اولسون دلیر

ایلینده صفلره غیظیله حمله مثل شیر

باش بدنلردن توکردی اول شجاع بی نظیر

طعمه ی شمشیر سانسیز بیر جماعت ایلدی

سویلدی گر پیلدوز مرکوبیمی ای قوم کین

بولمدور امّا پیاده جنگ ایدر شیر عرین

ایلرم قربان جانان اولسا مین جانیم یقین

جان ویرن جانان یولوندا درک لذّت ایلدی

اولدولار بیردن هجوم آور سپاه اشقیا

اول کمکسیز نامداره هر کس ایتدی بیر جفا

دوشدی طاقتدن یخلدی باشدا بیر کاری یارا

حرّی بی طاقت همان کاری جراحت ایلدی

سسلدی گل ای آدی نوحه اولان فُلکُ النّجات

ذکری ذوالنّونه اولان ظلمتده امّید حیات

ای مسیحا دم، دم آخِردی هنگام ممات

گل گوروم مندن دل پاکون رضایت ایلدی

ضعف ایدوب بسکه آخوب قانی بلا میدانینه

عطر جانان ناگهان یتدی مشام جانینه

آچدی گوز گوردی آلوب شه باشینی دامانینه

نه عطشدن نه یارالاردان حکایت ایلدی

عرض ایدوب ای میوه ی قلب علیّ المرتضی

اولدون آیا بو یوزی قاره غلاموندان رضا

چشم پر اشکیله نطقه گلدی شاه کربلا

حرّی مشمول عنایات و عطوفت ایلدی

ایتدی فرمایش اوزوم، جدّیم، آتام، زهرا آنام

راضیوق سندن دم رحلتده اولما تلخکام

بیز رضا اولساخ اولار راضی خدای لایَنام

قلب حرّی شاد و خرّم بو بشارت ایلدی

وجه وجهُ اللهه باخدی آخدی حرّین گوزلری

ویردی جان درک ایلدی فیض حضور حیدری

آه یا زهرا گذشت ایله قلم اولدی جری

اوغلیوین جان ویرماقیندان بیر روایت ایلدی

صدر زین اوستن دوشنده کربلا میدانینه

اوغلیوین کیم نازنین باشین آلوب دامانینه

کیم او مظلومین اُلن ساعتده گلدی یانینه

شمر و خولی یا سَنان قصد قساوت ایلدی

مُرتجز اوستن دوشن ساعت او سلطان انام

قویمادی غیرت یخلسون ایلدی فوراً قیام

قبضه ی شمشیر الینده جنگه ایتدی اهتمام

بیر شجاعت گوستروب دشمن هزیمت ایلدی

اول پیاده لشکره سالدی ایله جوش و خروش

چخدی شجعان و فوارس باشلاریندان عقل و هوش

اولدی هر کیم روبرو جام هلاکت ایتدی نوش

فتحیدن نومید کفّاری او حضرت ایلدی

ایلدی بو ماجرا شمر شریری تلخکام

لشکره یوز دوتدی سسلندی او سرخیل لِئام

واردی نه علّت حسینین ایتمیسوز امرین تمام؟

بیر پیاده سیزلری مقهور قدرت ایلدی

پیش فرمانی او قومه ویردی تا شمر ظلوم

بیر پیاده یالقوزا سانسیز قوشون ایتدی هجوم

بیر یارالی بیر کمکسیز یاره لر مثل نجوم

جسمینین زخمی کواکبدن حکایت ایلدی

ایتمدی رحم اول جفاجولر دل مهمومینه

هر طرفدن آچدیلار ال کربلا مظلومینه

بیر ابوایّوب آدلی ووردی اوخ حلقومینه

قان آخوبدور چشمه تک تغییر حالت ایلدی

صول الیندن ووردی بیر شمشیر ذرعه ناگهان

بیر جراحتده یتوبدور کتفینه آلدی توان

صاق یوزی اوسته یخلدی توپراقا موج ایتدی قان

دوردی اگلشدی دیزی اوسته مهارت ایلدی

هی تلاش ایلردی دورسون اول غریب نینوا

ممکن اولمازدی واریدی بسکه جسمینده یارا

ناگهان گلدی سَنان ابن انس واحسرتا

الده بیر نیزه امامه هتک حرمت ایلدی

زوریله ووردی بوغازیندان امامین اول دَنی

نحر ایدوب حلقومینی چکدی چخارتدی نیزه نی

تازه دن ایتدی هدف اول دورت مین اوخلی سینه نی

بیر جفا ایتدی دلیم تقریره لکنت ایلدی

کاش ایدِیدی اول زنازاده بو ظلمه اکتفا

ایتمیِیدی اول یارالی بیکسه اوزگه جفا

ای دلیم لال اول سَنانین ظلمی قوی قالسون خفا

زینبه ظلم سَنان برپا قیامت ایلدی

ایلدی ظلم سَنان بزم وصاله فتحِ ره

قان آپاردی تاپدی بزم قربیده حالِ وَلَه

قان ایچینده توپراقا قانلی یوزین قویدی او شه

بزم رازی عاشق دلخسته خلوت ایلدی

قانلی یوز، قانلی تراب اوسته عزیز بوتراب

عرض ایدوب ای خالق عالم خدای مستطاب

بو دیار کربلا، بو من، بو قوم بی حجاب

هانسی عاشق من تک اظهار صداقت ایلدی

دینیوه گوردوم تعدّی ایلوری قوم طُغات

ال گوتوردوم باش و جاندان ایلدیم ترک حیات

سو دیدیم یاندیم سوسوزدان چوللره آخدی فرات

سیل تک اشکیم بلا دشتین رطوبت ایلدی

کشف راز ایلوردی معبوده او شاه تشنه کام

گلدی قاتل مقتله اولدی عوالم بی نظام

جدّیوین امری تمام اولدی «حسینی» قیل تمام

بو نه مطلبدور قلم شرح و کتابت ایلدی؟