راوی دیر که حاضریدیم من او گونکی گون

کوی بلاده قافله ی عشق آچاردی بار


راوی دیر که حاضریدیم من او گونکی گون

کوی بلاده قافله ی عشق آچاردی بار

یعنی عراقی مسکن ایدنده شه حجاز

گوردوم عزیز فاطمه نون نه جلالی وار

دوردی قطارلر دایانوب هودج هودجه

تا امر ایدوب نزوله شهنشاه تاجدار

منده او طمطراقه باخاردیم کناریدن

گوردوم بیر هودج اورتوگی زردوز و زرنگار

ردّ اولدی پرده خارج ایدوب نازنین باشین

بیر بانوی مجللّه بیر معدن وقار

قصد نزول ایدنده او خاتون محترم

فوراً دیزین خم ایلدی عبّاس نامدار

شهزاده اکبر عزّتیله صاق قولون دوتوب

صولدان حسن نشانه سی قاسم غلام وار

هودجدن اندیروب یره اول سرو قامتی

اطرافین آلدی نچّه جوان گلذار

تا دوشمه سین اوق قامته نامحرمین گوزی

شمشاد قدّلر چکوب اطرافینه حصار

ایتدیم سوال کیمدی بو خاتون محترم

ایله لّه خدمتیله بنی هاشم افتخار

آندیردی بیر نفر منه ایما و رمزیله

زینبدی بو زمانه ده زهرایه یادگار

یاده سالوب او گوردوقوم اجلال و شوکتی

ایلردیم حیرتیله اونون حالینه نظار

مبهوتیدیم گوروم که همان شان صاحبین

کیم لر بو گون سوار ایدر ای ربّ کردگار

باخدیم او دمده بیر نچه بی رحم ساربان

مامور اولوندی تا اسرانی ایده سوار

ایستردیلر که میندیره لر هر اسیره نی

فریاد ایده ایده الی باشدا ایدوب فرار

سویلردیلر اماندی گلون بیزدن ال چکون

بسدور که ایلدوز بو قدر ظلم بی شمار

ا... رضاسینه بیزی شامه آپارمیون

ویرسز اگر وطن بیزه چوخ خوشدی بو دیار

جمع ایتدیلر قاچانلاری قمچی وورا وورا

اِرکَبن امری جمعه گینه ویردی انتشار

سسلندی شمر قافله نی لنگه وورمیون

گون باتدی تیز مینون که اولاخ شامه رهسپار

زینب جواب ویردی که ای ظالم امر ویر

نامحرمان کوفه چکیلسون هامی کنار

هرگز حریم عفّت و عصمت حریم لرین

ممکن دگل سوار ایده اغیار بدشعار

اولماز حرم غزاله لری اشقیایه رام

نخجیر هر زمانیده صیّاددن قاچار

نازین بو نازنین لریمون چکمه سم اوزوم

مینمزله بو جهت بولاری ساربان وورار

شمرین اشاره سیله کنار اولدی کوفیان

قالموب اسیرلر آراسندا بیر حمله دار

چوخ اضطراب و وحشت و هولیله میندیروب

هم نازنین اوشاقلاری هم بیر بیرین کبار

تیترردی ناقه لرده خزان برگی تک تمام

اطفال شور و شیونه گلمیشدی چون هزار

بعضی دیردی عمّه یریم راحت اولمادی

یولّانسا ناقه من اوتورا بولمرم یخار

بعضی دیردی من هارا عریان دوه هارا

اولدوم عجب زمانه ده ذلّتلره دچار

یکسر مینن لرین گویه قالخاردی ناله سی

باشه ووروب تمامیسی ایلردی آه و زار

بیر زینب اولدی یرده قالان بیر غریب امام

صاق و صولا باخاردیلا حیرتله دلفگار

بیمار سویلدی غم و محنت طبیبینه

گل عمّه میندیریم سنی من اولما اشکبار

بوکدی دیزین قویاندا ایاق زینب حزین

طاقت گتورمدی که واریدی چوخ انکسار

قارداش بالاسی عمّه یخلدی هر ایکّیسی

شمر شریر غیظه گلوب الده بیر تتار

باخموب اِناث طایفه سین یا که ناخوشی

وورمازلا شرم ایتمدی منظور او نابکار

ایش یتدی بیر مقامه که بیمار ضعف ایدوب

باشین دیز اوسته زینب آلوب لیک شرمسار

ایستوب او زاری حاله گتورسون سو تاپمادی

سپسون یوزینه اشک ترین ایلدی نثار

آچدی گوزون دوزوب بیبی سین ایلسون سوار

امکانی اولمادی ولی میندیردی اضطرار

آخِر امام عصریده میندیردی ساربان

امّا اولانمادی دوه اوستونده برقرار

قطب مدار عالم اولوب واژگون یره

توپراقلار اوسته دوشدی دوتوب صورتین غبار

سعد اوغلونا یتوردوله ای میر قافله

بالای ناقه ده اوتورانمور علیل زار

بیر ظلمه باخ دیموب یرینی راحت ایلیون

اولسون مریض ناقه سی لازمدی راهوار

باخموب علاوه بسدور اونا غلّ جامعه

زنجیر آغور، وجود اوزی خسته، بدن نزار

امر ایتدی دورمیون گیدون ایمدی طنابیله

باغلون ایاقلارین دوه قارنیندا استوار

خسته بدن، یولون زحماتی، اوزی اسیر

زنجیر و کونده ویردی خصوصاً اونا فشار

بولمم نه چکدی شامه کیمی بو فشاریله

قرخ منزله گجه گونوزی ایتدیلر گذار