منای کرب و بلایه یتوب چون آلُ ا...

او یرده نازل اولوب وارث خلیلُ ا...


منای کرب و بلایه یتوب چون آلُ ا...

او یرده نازل اولوب وارث خلیلُ ا...

حرم امیری خضوعیله باغلیوب احرام

ایدوبدی سعی صفایه یتوب صفاتُ‌ ا...

آلوب او دشتیده چون عطر وصل جانانی

خطاب قیلدی نزول ایلسون او یرده سپاه

کجاوه لردن اولوبلار پیاده آل رسول

ایدوبله نصب چوخور یرده خیمه و خرگاه

گَلوب حضور امامه جناب زینب او دم

توکوبدی گوز یاشی زمزم کیمی، چَکوب بیر آه

ادبله عرض ایلدی ای امام کون و مکان

فدا اولوم سنه ایتمه بو دشتی منزلگاه

الوم توزی گورورم اَگلَشوبدی گُل یوزیوه

ایدوم سنون بو سولان رنگیوه نه نوع نگاه

بو منزله یِتیشندن دولوب بو گوگلومه غم

نه غمدی بو، منی بو غمدن ایت گلن آگاه

بویوردی سرور دین صبر ایله آنام باجی

بو سرزمیندی آل خلیله قربانگاه

بو یر او یردی که جدّیم منه ویروبدی خبر

بو یرده جلوه ایدر جلوه ی جمالِ اِله

اولالّا محو، جوانان هاشمی یکسر

ایچَلّه جام شهادت، اَله گَلور دلخواه

یاتار علم، داغلور لشکریم، جوانلار اُلَر

آخار جوانلاریمون قانی فی سبیلِ ا...

ایده لّه قاسم و عبّاس و اکبریمی شهید

او وقته جانیمی من ایلرم فنا فِی ا...

یخالّا قتلگه ایچره منِ غریبی وحید

کَسَلّه باشیمی لب تشنه زمره ی گمراه

قویالّا غارته یوز خیمه گاهه فوج به فوج

آچالّا غارت اَلین فوجِ توده ی بدخواه

بو خیمه لر تالانور، اودلانور سراپرده

قاچالّا چوللره اطفال آختارالّا پناه

بوراخما دامنِ صبرون او وقت آنام باجی

یتیمه قیزلاریما اول گلن او دمده پناه

امامیدن ایشیدوب بو کلامی زینبِ زار

توکوب عذاره سرشکین، چَکوبدی دلدن آه

امام ساکت ایدوب زینبی بویوردی باجی

او که گرکدی اولا اولمیوب هنوز گواه

وجود اکبر و عبّاس و قاسمیمدی سنه

آلوبلا دوریوی چون انجم و ستاره و ماه

هنوز اوخلامیوبلَر علیّ اصغریمی

هنوز گِیمه میسَن اَگنیوه لباس سیاه

هنوز خیمه لریم یانمیوب یانا اورگون

هنوز واردی جلالون تالانمیوب خرگاه

حسینه آغلیه نین گوزلرینی آغلاتما

سیاه رو ایلمه روز حشر یا ا...