بولبول  دییرکی غنچه خندانه عاشقم

صحن  چمنده  سنبل و ریحانه  عاشقم


بولبول  دییرکی غنچه خندانه عاشقم

صحن  چمنده  سنبل و ریحانه  عاشقم

پروانه ده ن سوروشسون اگر یانماق علتین

دائیم دییر کی شمع شبستانه  عاشقم

 زاهد مقام عشقی دانارعقله یوز قویار

 یعنی بیلین  کی منطق وبرهانه عاشقم

 آلسون  خبر عباد تینین علتین اگر

عابد  دییر کی روضه رضوانه عاشقم

 عشق مجازی دورنه حقیقی بوعشقی لر

عاشق  منم کی خسرو خوبانه عاشقم

 عاشق منم کی عاشقم  آل محمده

عا شق منم کی عترت  سلطانه عاشقم

 عاشق منم کی عاشق فتاح خیبرم

عاشق منم کی اول شه مردانه عاشقم

دلدادییم او فارس بدر و حنینه من

اول  شهسوار فاتح میدانه عاشقم

دنیا گوزواونون کیمی قاضی گوروبویوخ

اول مظهر عدالت و میزانه عاشقم

من عاشقم اوشاهه کی سوزیله روزوشب

دائم دییردی خالق سبحانه عاشقم

هر  یئرده  واردی  جلوه  ی ذات خدا کی من

دریا و دشت و کوه و بیابانه عاشقم

دنیا  منیم  گوزومده   بهاسیز  متاعی دور

فکر ائتمیون  محاسب  و  دیوانه عاشقم

قصدیم بودورکی سیزلره احقاق حق ائده م

 شیرینی حقیقت پنهانه عاشقم

باشه آپاردی عهدینی  پروردگاریلن

جانیلا  باغلانان  ائله پیمانه عاشقم

عاشق منم کی عاشق زهرای اطهرم

عاشق منم کی بانوی دوجهانه عاشقم

عاشق منم  کی عاشق ام الائمه یم

عصمت گویونده اول مه رخشانه عاشقم

عاشق منم کی عاشق صلح  و صداقتم

 یعنی  حسن او  نور درخشانه عاشقم

من عاشقم امامین او  پوزقون  مزارینه

 نه  مسند  و  نه  ملک  سلیمانه عاشقم

نه بولبولم کی عاشق اولام جویباره من

 صحرای  کربلاده  آخان قانه  عاشقم

عاشق منم کی عشق حسینیله زیندییه م

عاشق  منم  کی  شاه  شهیدانه  عاشقم

اذن   جهاد آلاندا  ا با لفضل  نامدار

هر دم  دئیردی  نیزه  و پیکانه  عاشقم

آقا  اجازه  وئر  ائلییم  جانیمی فدا

دینین یولوندا بخشش و احسانه عاشقم

سرکوب   ائدردی  دوشمنی سسلردی غیضیلن

لشگر بیلین  کی ناطق  قرانه عاشقم

آتدان دوشنده سسلدی قارداش آماندی گل

 تئز  گل کی من او صورت تابانه عاشقم

عاشق  منم   کی عاشق  زین ا لعبادینم 

 اول  شهریار   کشور  رفانه عاشقم

من   باقرا لعلومه    او دریای همته

مشکل  گشای  عالم  امکانه  عاشقم

بنیا  نگذار مکتب  شیعه عمود علم

صادق  امام  حلم  و سخندانه عاشقم

من عاشقم کی عاشق  موسی  بن  جعفرم

 زنداندا کی  او  روح  پریشانه عاشقم

داییم دئییردی حکمت یزدانه راضی یم

بو یئر یوزونده گوشه ی زیندانه عاشقم

ای دل یئتیر زمین و زمانه بو سوزلری

عاشق منم  کی شاه  خراسانه عاشقم

عشق رضا اولوبدی سبب عشق  میهنه

بیجا   دئیل  کی   کشور   ایرانه عاشقم

من  عاشقم  طریق جوادالائمیه

هادی  او مهر مشرق ایمانه عاشقم

مولای عسگری  منه  جان جهانیدور

تا  وار جانیم  بدنده او جانانه عاشقم

فخریم بودور کی شاعر آل محمدم

ناموس دهر مهدی دورانه عاشقم