ایلدون عالمده عالملرجه نهضت یا حسین

اولموش عالملر سنه مرهون منّت یا حسین


ایلدون عالمده عالملرجه نهضت یا حسین

اولموش عالملر سنه مرهون منّت یا حسین

اولماسیدی نهضتون ای نهضتون فرد جهان

دیندن انسانیتدن کیمسه تاپمازدی نشان

قهقرا ایلردی قبل از بعثته پیر و جوان

یر یوزین چولقاردی کفر و بربریّت یا حسین

تازه ایستوردی درخت دین اولسون بارور

آز قالوردی باغبان بو باغدن دَرسون ثمر

ناگهان گلدی اجل الدن گیدوب خیر البشر

مصطفی دفنینده غصب اولدی خلافت یا حسین

غصب اولان گوندن خلافت دوندی دور روزگار

دوتدی باطل مرکز حق و حقیقتده قرار

عدّه ای پست و اراذل اولدی صاحب اقتدار

کفر و ظلم و بدعته صرف اولدی قدرت یا حسین

غفلتی که چولقادی بیر نچّه ساعت امّتی

باعث اولدی اهل اسلامین پوزولسون امّتی

تئز پراکنده اولوب اسلامیان جمعیّتی

اهل اسلام اولدی بیر آشفته ملّت یا حسین

دین اسلامی که دانش اوسته اولموش استوار

بلکه دانش دیندن تاپموش جهاندا انتشار

بیله دینین مصدرینده تاپدی بیر عدّه قرار

صرف جاهل مست صهبای ریاست یا حسین

اوّلین تاثیر غفلت آتش افزون بیر شرار

بیر شراری که پیمبر درگهین یاندیردیلار

ایتدیلر روبَه صقتلر اللهین شیرین شکار

بی حیالر ایتدیلر تحمیل بیعت یا حسین

آز قالوردی دین و قرآن کوکبی تاپسون اُفول

مجتبی ایتدی حمایت ایلدی صلحی قبول

ایله صلحه فکری کوته لر باخوب اولدی ملول

گوردی دور اندیشلر دینه حمایت یا حسین

بیله صلحه هر باخان تاریخده اهل صفا

درک ایدر دینه نه خدمت ایلیوبدور مجتبی

بیله عالی رهبرین افکارینه صد مرحبا

صلحیله ابقای دین تاپدی ضمانت یا حسین

شمع عمرین مجتبی دین اوسته خاموش ایلدی

دین و قرآن اوسته دنیانی فراموش ایلدی

دین یولوندا عاقبت زهر جفا نوش ایلدی

گُستَروب صبر اهلینه صبرینده حیرت یا حسین

تا سنون دورین یتوشدی گوردون ای شاه زَمَن

عالم اسلام اولوب دنیای آشوب و فِتَن

یوخدی اصل دین و داد دین مظلومه یِتَن

سندن ایتدی دین مظلوم استعانت یا حسین

داده گوردون یتمَسن ای فخر اولاد بشر

نه بشر، اسلام و انسانیّت اللردن گیدر

کفر قویماز یر یوزینده دین و قرآندان اثر

سخت اولوبدور اهل دینه موقعیّت یا حسین

گوردون ای عین الهی دیده ی حق بینیله

کفر ایدور جنگ نهانی دینیله آئینیله

دین گرک گیتسون و یا نفس برابر دینیله

دینه سن اولدون برابر در حقیقت یا حسین

تیزبین چشمیله سالدون ماسوایه بیر نظر

سندن اوزگه گورمدون دینه برابر بیر نفر

باغلادون قرآنه قربان اولماقا محکم کمر

بیر کمر که آچمادی غیر از شهادت یا حسین

آشیانین ترک ایدوب مرغ قطا تک ای عجب

ترک قیلدون خائفاً یثرب دیارین نصف شب

همرهون اوز اهل بیتون، غم الیندن جان به لب

ظاهراً بیت الَلهه ایتدون عزیمت یا حسین

امن ایویندِیدون سن ای عالملره امن و امان

حکم قتلون صادر ایتدی شام امیری ناگهان

مکّه ده قالسان قانون بولدون توکللر بی گمان

باشلانار بیت خدایه حتک حرمت یا حسین

تا یِتیشدی هشتم ذی الحجّه روز ترویه

باشلانوب حُجّاجیدن احرامه ذکر تلبیه

گوردولر سنده ایدوبسن تکیه رُکن کعبیه

ایلوسن نهضتلی حَجّوندن حکایت یا حسین

گوردون عالم عالم بیداد و کفر و زوردور

دولت عدل و دیانت وصله ی ناجوردور

بیله دنیاده حیات، انسانیتدن دوردور

باشلادون اوندا علیه کفره نهضت یا حسین

ایستدون بو نهضتون عالمده عالم گیر اولا

تا جهان وار نهضتونده بیر جهان تاثیر اولا

هر زمان سرمشق اَحرار جوان و پیر اولا

اهل کفره گوش مال و درس عبرت یا حسین

بو مقدّس نهضتونده ای یگانه رادمرد

باشه یغدون دهرده ممتاز یِتمیش اهل درد

باشلادون دنیا بویی بیداد کفریله نبرد

واقعاً ویردون نشان چوخ عالی همّت یا حسین

همّتون شخصیّتون تک عالی و ممتازیدی

عرصه ی دنیا مجال همّتونده آزیدی

لشکرون هر چند یِتمیش بیر نفر سربازیدی

لیک هر سرباز بیر نیروی دولت یا حسین

کیم بولر نه قدریمیش نیروسی هر سربازیوین

سود امر، یا نوجوان، یا پیرتر سربازیوین

بیر جهان نیروسی وار تک سود امر سربازیوین

چولقیوب دنیانی بو سربازه حیرت یا حسین

واردی بیر دنیا سوزوم بو سود امر سربازیله

یوز قویان گهواره دن میدانه یکّه تازیله

مرگی استقبال ایدن لبخندیله، مین نازیله

اوخلاناندا ایتدون اول سربازی رویت یا حسین

بعضی سربازون جهان دیده جوان، دل پیریدی

حلمیده دریا، شجاعتده آجیقلی شیریدی

دشمنه دعوا گونی بیر سینمیان شمشیریدی

سینماسین شمشیر سرباز شریعت یا حسین

بعضی سربازون سیه چهره غلام زر خرید

زر خریدی که قانیله ایتدی دنیانی خرید

هر ایکی دنیا سرافراز و سعید و رو سفید

شه لر اولسون بیله سربازه رعیّت یا حسین

بعضی سربازون جوان هاشمی، روشن ضمیر

بیر جوان که دانِش دینینده بیر فرزانه پیر

مرحبا بیر مادره ویرمیش بیله سربازه شیر

هاشمیّاته بو فخر ایلر حکایت یا حسین

بعضی سربازون نهال جعفری، نورس جوان

سِنّی سَگّیز دوقّوز، اوندان آرتوق اولماز بی گمان

قامت مردانه سی هم قدِّ تیغ جان ستان

نوک شمشیرین اُپردی یرده تربت یا حسین

بعضی سربازون یگانه رادمرد سرفراز

قامت ممتازینه مخصوص نچّه امتیاز

سر سپَه، سقّا، علمدار شهنشاه حجاز

خاصّه دارای بِنَفسی اَنتَ رُتبَت یا حسین

بعضی سربازون اون اوچ سنّینده بیر طفل صغیر

بیر صغیری که شهادت اشتیاقینده کبیر

بیر اَمامه باشدا وار، اَگنینده پیراهن حریر

نه زِرِه، نه طاس کُلَه دن وار علامت یا حسین

بیر شتابیله سالوب آت رزمگاهه تند و تیز

گو که مقصد بزم جاناندور نه میدان ستیز

دوغرانار باخماز وجودی قطعه قطعه ریز ریز

چوخدی چون چوخ دوغرانان قربانه قسمت یا حسین

آه او ساعتدن بو سربازون یخیلدی توپراقا

گُل وجودی بَنزَدی پامال اولان گُل یَپراقا

حسرت اولدی تاپمادون فرصت هرایه یِتماقا

وار هنوز ایمدی همان نسگل، او حسرت یا حسین

جان ویروردی مسلم ابن عوسجه گلدی حبیب

سویلدی واردور وصیّت، سویله ای عزّت نصیب

گوزلرین آچدی بویوردی جان سنون جان بو غریب

قان حنا موضوعنه واردور اشارت یا حسین

بو هامی لشکر که جمعاً عدّه ی معدودیدی

حیطه ی همّت لری بی حدّ و نامحدودیدی

نهضتونده مقصدون هر فردینه مقصودیدی

نفس واحد نفسین ایتمیشدی جماعت یا حسین

«ذهنی سائل» سنون درگاهیوه دوشموش دخیل

روز و شب ذکر وصائبده ایدر اشکین سبیل

لطف قیلسان روز محشرده اونا اولسان دلیل

مسکنی حتماً اولار فردوس و جنّت یا حسین