باشاندی حسین‌ین ایام عزاسی

سیزدن کمک ایستر حقین شهداسی


باشاندی حسین‌ین ایام عزاسی

سیزدن کمک ایستر حقین شهداسی

قلبینده امام عصرین غمی آرتار

جهد ائیله اماندیر پوزما بو اساسی

گر عشقی حسینی درک ائتسن اوزونده

اشگون قطراتین گیزلتمه گوزونده

لبّیک دیلونده گوز یاشی یوزونده

ائیله شه دینه خدمت بو سوزونده

فرض ائت اوجالوبدور «ینصرنی» صداسی

توک شیشه­ی دیلدن رخساره گلابی

کیم آغلار حسینه، آرتیقدیر ثوابی

فیض عبراتون یوخ حد و نصابی

عاجزدی ملک‌لر ائتسین بو حسابی

واضح‌دی بو مطلب یوخ چون و چراسی

ینصرنی بویوردو، سلطان حقیقت

بو کلمده اول شاه، ائتدی سیزی دعوت

ایندی بو عزاده هر کیم ائده خدمت

مثل اینکه شهادت اولموش اونا قسمت

البته شهیدین جنّتدیر بهاسی

هر کیم وورا زنجیر، هر کیم وورا سینه

تنبیه ائلییبدیر خصم شه دینه

اون گون دوتولور یاس، هر ایلده حسینه

چونکو او مقدّس، قانون سَببینه

دین نبوی‌نین مُحکم‌دی بناسی

بو شأن وجلاله، قربانم حسین جان

عالمده آچیبسان بیر سفری احسان

عرش حقه گئتدی، حلقوندان آخان قان

اول قانی وئریبسن جنّاتی آلیبسان

بو بارده حقّین وار عین رضاسی

فکریمده دولاندی اول غملی زمانون

آغزوندا عطشدن دونمزدی زبانون

زینب کومگینه اولمادی توانون

سنگین یارالاردان جوش ائیلدی قانون

شمرین اوجالاندا میداندا نداسی