کوفه ده بیر محترم قائم مقام اُلدوردولر

حقّ امامه عاقّ اولوب، نائب امام اُلدوردولر


کوفه ده بیر محترم قائم مقام اُلدوردولر

حقّ امامه عاقّ اولوب، نائب امام اُلدوردولر

مسلمه بیعت الین اوّل ویروب خرد و کبار

باغلیوب پیمان و عهد اول فرقه ی بی اعتبار

حیف و صد افسوس او عهدی بی وفالر پوزدولار

معنی پیمان و عهدی بالتّمام اُلدوردولر

نصب اولوندی کوفه ده کفر و نفاقین بیرقی

داندیلار علم الیقینی عالماً قوم شقی

باشلیوب عصیانه، پاکوب ایتدیلر دین حقی

دین مطلق نائبین قوم لئام اُلدوردولر

اولدی تابع کفر محضه کوفیان بد شعار

پیک دین اُلدورماقا باغلاندی بِللر استوار

آدلاری اسلام اولانلار ایلدی اسلامی خوار

محترم اسلامی چوخ بی احترام اُلدوردولر

بی وفالر باخمادی مهمان اوچون وار احترام

"اَکرِمُو الضَّیف" امر ایدوبدور حضرت خیرُ الانام

سهلیدور مهمان کیم اولسون نائب خاصّ امام

بو قوناقی امّت خیرالانام اُلدوردولر

آلدی اوچ یوز بی مروّت بیر غریبین دوره سین

ویرمدی فرصت یتورسون شاه بطحایه سسین

توکدولر قانین او مظلوم وحید و بی کسین

ظلمیله ناحق یره حقّ المرام اُلدوردولر

ایتدیرلر چون مسلمی بام اوسته مقتول جفا

آتدیلار نعشین یره، ایتموب بو ظلمه اکتفا

ایپ سالوب یرده سوروردی کوفیان بی وفا

حرمت و آداب شرع و دینی تام اُلدوردولر

تاپدیلار جرات ز بس اول قوم طغیان ایتدیلر

کربلاده عالمینون قلبینی قان ایتدیلر

حقّه باطل آد قویوب بیر باطل عنوان ایتدیلر

عاقبت پیغمبر اوغلون تشنه کام اُلدوردولر

چون شهیدی ایتدی حسینی ظاهری قرآنیان

ایتدیلر قرآن ناطق باشینی زیب سِنان

قویدولار آد خارجی آل رسوله کوفیان

دین پاک حقّینده ایلوب فکر خام اُلدوردولر

کوفیه وارد اولاندا عترت شاه نجف

کوچه لرده غرفه لرده اهل کوفه چکدی صف

آل یاسین آغلادوقجا گولدی قوم بی شرف

ننگ و نامی فرقه ی بی ننگ و نام اُلدوردولر

«ذهنی» ذهنه گلسه بو مبحثده هر قدری کلام

کوفیانین شرح ظلمی تاپماز هرگز اختتام

جزء جزئیّاتی حاشا نظمیده تاپسون نظام

چون نظام نظمی قوم بد نظام اُلدوردولر