مسلم یارالی تشنه، ترک ایلدی دنیانی

قویدو الی قوینوندا، بیر جوت قوزو قربانی


مسلم یارالی تشنه، ترک ایلدی دنیانی

قویدو الی قوینوندا، بیر جوت قوزو قربانی

چون سیف‌ بنی هاشم، چالدی ال آیاق قاندا

قالدی ایکی شهزاده، آواره بیاباندا

گه قالدیلا چوللرده، گه گوشه­ ی زنداندا

تا چیخدیلا زنداندان، بیر موقع بحراندا

آیا هارا گئتسینله؟ غربت یئری گون باتدی

آللاه ایکی شهزاده، بس هاردا گئدیب یاتدی

ظلمت بورویوب شهری، گئتسینله مکان یوخدو

یا اوردا اوتورسونلا، دشمنده امان یوخدو

یا چوللره قاچسینلا، قاشماقلیقا جان یوخدو

یاپراق کیمی تیتریللر، رخساریده قان یوخدو

قالساق دئدیلر بوردا، دشمن گورجک قارداش

صبّاح زیاد اوغلو، وای اولدورجک قارداش

یوز قویدولا صحرایه، قان یاش الئییر گوزلر

قورخوللا قارانلیقدا قاشدوقجا بدن تیترر

هر دم او کیچیک قارداش، آغلار اوجادان سسلر

گل غیرتیوه قربان، عبّاس وعلی‌اکبر

باغریم قارالیب بابا، رنگیم سارالیب بابا

گل دربه­در اطفالون، چوللرده قالیب بابا

دوردو یارالی قوش تک، دوشدو یولا یولاندی

آغلاردیلا گئتدیکجه، صبح اولدو ایشیقلاندی

بیر عورت او اثناده، گوردو اورگی یاندی

گتدی ائوه گوز یاشلی، باشلارینا تولاندی

سو وئردی غذا وئردی، تا گون دولانیب باتدی

بیر یئرده قوجاقلاشدی، یورقون بالالار یاتدی

یاتدی او بویوک قارداش، روح اوچدو قانادلاندی

رویاده گوروب ناگه فانوس خدا یاندی

پیغمبر خاتمدیر، شاهنشه مرداندی

آما اوجا قامتلی بیر شخص نمایاندی

دقتله نظر سالدی، یاندی اورگ اودلاندی

گوردو آتاسی مسلم، اوز قانینه غلطاندی

فورا یوخودان دوردو، آز قالدی چیخا جانی

اول خرداجا قربانه، کشف ایلدی رویانی

الان بابامی گوردوم، جیسمیندن آخیر قانی

بیز ترک ائدریک بیلدیم، صبّاح بو دنیانی

حارث یوخودان دوردو، نصف‌ شب ظلمانی

گوردو او قارانلیقدا، آغلار ایکی قربانی

قانون محمّد ده واجیبدی مسلمانه

کافرده اگر اولسا رحم ایلیه مهمانه

بیر ظلم ائلدی بی‌دین، اول خیرداجا قربانه

بیردن دئدی وای بابا، لبلر بویانیب قانه

اسدی یارالی لبلر، تر آخدی جبینیندن

یالواردی امان ظالیم، اولدورمه یئتیمم من

اول قانلی دوداقلاردان، یاندیم سسی قوزاندی

صبح اولدو ایشیقلاندی، حارث قولو چیمراندی

بیر جوت بالاجا قارداش، وای قول قولا باغلاندی

گلدی او خانیم عورت، باشلارینا تولاندی

ابراهیم اوزون دوتدو، اول عورته یالواردی

گل آخر عمرومده، بیر کلمه سوزوم واردی

الان باتاریق قانه، بو آخر ساعتدیر

وئردیک سنه چوخ زحمت، بو آخر زحمتدیر

بیر کلمه سوزوم واردیر، چوخ غملی وصیّت‌دیر

بیر خیردا باجیم واردیر، گوزلر بیزی مدّت‌دیر

گوندر او قارا بخته، القانه باتان جامه

بیر جوت بالاجا کوینک، بیر جوت یاشیل عمّامه