دیولّه بیزلره عالمده جعفری مذهب

عیاندی مسئله، روشندی گون کیمی مطلب


دیولّه بیزلره عالمده جعفری مذهب

عیاندی مسئله، روشندی گون کیمی مطلب

امام جعفر صادقدی رکن دین مبین

اودور مروّج احکام و مذهب  و آئین

آتاسی حضرت باقردی حجّت باری

آناسی بنت محمّددور، امّ فروه یقین

یازولّا هجرتین هشتاد اوچومجی سالینده

قدم بو عالم امکانه قویدی بو شه دین

ربیعُ الاوّلین اون یِدّیسی دوشنبه گونی

بو شاه دینه ولادت گونی اولوب تعیین

وجودی صفحه ی غَبرایه اولدی زینت بخش

تفاخر ایلدی عرش خدایه سطح زمین

ازل موسّس قانون شرع مصطفوی

بونی یازولّا تواریخیده معارف بین

همین که سنّ شریفی اوتوز بیره یتدی

آتاسی اُلدی، غم و ابتلایه اولدی قرین

بنی امیّه او وقته کیمی مسلّطیدی

ائمّة تحت فشار عدوده زار و حزین

ائمّه قورخودان احکام دین دیَنموردی

فشاره سالموشیدی هر امامی بیر بی دین

بونون زمانی خروج ایلدی بنی عبّاس

بنی امیّه ایله باشلادی عداوت و کین

بیری بیریله اولار جنگه اولدولار مشغول

بو، خلقه ایلدی احکام مذهبی تلقین

اودور سبب که شیاع ایتدی جعفری مذهب

شریعه نبوی روشن اولدی چون پروین

بنی امیّه نی محو ایلدی بنی عبّاس

یتوب خلافته منصور شوم و کینه گُزین

دوشوب بو فکره او کافر امامی اُلدورسون

بهشت عدنیده ایتسون پیمبری غمگین

دیدی امور سیاستده پیشرفت اولماز

امام صادق اگر ایتمسه منه تمکین

امام ده گِچینوردی تقیّه حالینده

ز بس رئوفیدی ایتمزدی دشمنی نفرین

دوانقی ولی اَل چَکمدی او سروردن

امامه ایتدی او بی شرم گونده بیر توهین

چاقوردی بیر گئجه خلوتده محرم رازین

دیدی اگرچه اولوبدور امام خانه نشین

ولی وجودی منه مانع ریاست دور

او اولماسا اولور عالم اَلیمده نقش نگین

گئجیله فوراً اونی ایله مجلسه احضار

شهید ایدوم تاپا بلکه بو خاطریم تسکین

ولی نه حالیله گورسن او حالتیاه گَتور

حقارتیله یتور مجلسه ملول و غمین

گَلوب نه گوردی نماز اوسته راکع و ساجد

امام تَکدی، یاتوب سر به سر بنات و بنین

قویوبدی سجدیه باش، دل آچوب مناجاته

ایدور دعا، گَلوری غیبیدن صدا آمین

ایله سیزیلدیری تاثیر ایدور جماداته

اولور عیان در و دیواریدن صدای اَنین

عمامه یوخ، باشینا باغلیوبدی بیر دسمال

گِیوبدی اَگنینه اول شاه بیر لباس خَشین

ایدوبدی منزلینی رشکِ وادی طور

دوشوب کلیم کیمی شاه یوم باز پسین

حضور یاریده گوزدن آتوبدی اغیاری

ایدور خدائیله راز و نیاز امام مبین

تحمّل ایتدی نمازین امام قورتاردی

و لیک قویمادی ایتسون عوض لباس لرین

اَیاق یالین باش آچوق گَتدی حجّتُ اللهی

یتیشدی مجلس منصوره شاه عرش مکین

گیرنده مجلسه ویردی سلام منصوره

یره توکولمدی علّت ندور سپهر برین

قوجا امام اَیاق اوستونده قالدی بیر ساعت

و لیک ایلمدی اعتنا او شوم و لعین

بیر آز گیچوب باشینی قوزادی تکبّریله

اولیدی لال گوروم، آچدی ناسزایه دلین

امام صادقه شرم ایتمیوب دیوب کاذب

ایدوب بو لفظیله قلب عوالمی تحزین

خیال سلطنته دوشموسن دیدی گورورم

دوزَلدوسن اوزیوه دور و برده یار و معین

بویوردی حضرت صادق منه دیمه کاذب

لقب ویروب منه صادق بابام رسول امین

جوان لیقیمدا ریاست خیالی ایتمَمیشم

قوجا لیقیمدا دوشم بیله بیر خیاله چَتین

دوانقی ایشیدوب بو سوزی غضبلندی

آپاردی غبضه ی شمشیر خون فشانه اَلین

غلافیدن قلجین بیر وجب ایدوب خارج

دوباره قویدی غلافه او مرتد بی دین

ایکیمجی دفعه ایدوب بیر ذِراع بویی خارج

امام قتلینه آرتوردی دلده کی هوسین

اوچومجی دفعه ایدوب تیغی غیظیله عریان

ایدوب او حالیده خاموش آتشِ غضبین

محبّتیله چاقوردی یانیندا یِر ویردی

محبّته عوض اولدی عداوت دیرین

امامه غالیه ی خاصّینی تعارف ایدوب

ایدوب او غالیه ایله محاسینین تزئین

چوخ عزّتیله یولا سالدی حجّتُ اللهی

ربیع سرّینی ایتدی سوال ماوقعین

جواب ویردی خلیفه سنه بیان ایدرم

و لیک بیر کسه بُلدورمه بو ایشین سببین

همین که ایتدیم اراده امام قتلینی من

اَیاق یالین باش آچوق گَلدی حضرت یاسین

بویوردی ایتمه اذیّت، بالامی اینجیتمه

هلاک ایلرم اولسان امام عصره ظنین

گَلِیدی کاش پیمبر یزید مجلسینه

امام قتلینه فرمان ویرن زمان او لعین

دییدی سیّد سجّادی ظالم اینجیتمه

اسیرلیق غمی بسدور، زیاده ایتمه غمین

قولونی باغلاموسان بسدی، جسمی ناخوشدی

بو غُلّ جامه مجروح ایلیوب بدنین

بو بیر بیوک، اوشاق، عورت، تیکوب بو ناخوشه گوز

اَلیندن آلما بو بی کس لرین اماندی کسین

ترحّم ایله بو بیچاره هاشمیّه لره

اوجاتما زینب و کلثومین آه و ناله سسین

سنه حسینی بو اشعار خوش نتیجه ویرر

                          قالار او گون که هامی ایتدوقی عملده رهین