آتدی دنیانی گوزوندن تاجدار هل اتی

ایلدی آل عبایه عالمی ماتمسرا


آتدی دنیانی گوزوندن تاجدار هل اتی

ایلدی آل عبایه عالمی ماتمسرا

زینب کبری یولا سالدی آتا تابوتینی 

بوینی چیگنینده ٫ گوزی یاشلی ٫ دلینده وا ابا

اوزگه بیر کیفیتیله نعشینی حمل ایتدیلر

گورمیوبدور بیله تشییع جنازه ما سِوا

پیش تابوته دگولدی ظاهرا حامل اولان

باطنا تابوتی حمل ایتدی ملکلر جابجا

پشت تابوتی صاقیندان حمل ایدردی مجتبا

صول طرفدنده یاپوشمیشدی غریب کربلا

سوز غلط دوشمز دیسم نعشین قباقینجه دوشوب

ایلیوردی حضرت روح الامین بیله ندا

ایله استقبال گرم ای تربت پاک نجف

سنده گلدی دفن اولونسون افتخار اوصیا

جان کیمین آغوشه آل گل جسمین ای خاک عزیز

غبطه ایتسون شانوه هفت آسمان٫ عرش خدا

بو علیدور خسته حالیله سنه مهمان گلور

باغریقان ٫ افسرده خاطر ٫ دل یارا ٫ باشدا یارا

بو علیدور اودلی دیلده واردی بیر دنیا غمی

دردی وار داغلار بوئی ٫ ئوز آدی هر درده دوا

بو علیدور تک لیقیندا جان مجموع جهان

دوتدی بیگانه صفتلر لیک اونی بی آشنا

آلدیلار حقین الیندن ایتدیلر خانه نشین

قالدی ائوده تک ٫ انیسی اولدی آه جانگزا

یرمی بش ئیل صبر ایدوب دوزدی بو امره شاهدیم

عین فی العین قذا دور بیرده فی الحلق شجا

بسکه گوردی بی وفالیق امت بی مهردن

خلقدن گتدی کناره تاپدی حال انزوا

گورمه سین تا کیم ایکی ئوزلی مسلمانلار یوزین

چولده اوز عمرین گونون باشه ویروب بو مقتدا

گاه گیزلینجه گئدوب چاهه دیردی دردینی

درد آلان کیمسه تاپولمازدی اورک دردین آلا

ملت اسلام الیله اولین مظلوم دی

امت قرآن الیندن چوخ گوروب جور و جفا

انجیدوب صوری مسلمانلار ٫ یورولموش خسته دی

آل کناره راحت ایت ای خاک پاک پر بها

بو عدالت روحی دور ٫ اوز عدلینه قربان اولوب

دار دنیادن گوزون اورتوب ٫ گلوب سنده یاتا

خسته دور ٫ قانی گیدوب ٫ چوخ باش یاراسی کاری دور

گوزله اینجیتمه ٫ بو جان مصطفادور ٫ مرتضی

دوردی تابوتین قاباق سمتی ٫ قاباقدان ناگهان

قویدولار تابوتی یر اوسته او دم دلده نوا

گوردیلر بیر قبر حاضر ٫ باخدیلار تاریخینه

حضرت نوح نجی ٫ قازموشدی قبری گوئیا

قبریدن بیر بیله سس گلسیدی چوخ با جائیدی

گل یولوندا انتظارم من نه مدتدوور آقا

چوخ یوروب صوری مسلمانلار سنی ٫ دلخسته سن

سینم اوسته یات بیر آز دینجل سن ای فخر التُّقی

سن منیم سینمده یاتسان فخر اعظمدور منه

چوخ تاپارسان تک وجودیله مقام ارتقا

چوخ اسفلی منظره اولدی کنار قبریده

ایستدی دین باغبانین گللری قبره قویا

آچدیلار گل تک سولان رخسارین آه و وائیله

محو مهر و عاطفت اولدی حسین و مجتبی

یوز یوزه قویدی آتائیله ایکی دلبندلر

آتش دل سونمه دی بو آیریلیقدا مطلقا

مجتبا ٫ نعشین اگیلدی باسدی جان تک باغرینا

هم قوجاقلاشدی او نعشیله غریب کربلا

آه او ساعتدن ترابه تاپشریلدی بو تراب

مجتبا قویدی آتا رخسارینی توپراقلارا

حیف او گل رخسار سولدی همدم اولدی خاکیله

حیف ایله قامت که یاتدی توپراق آتدا جابجا

حیف ایله بیر باغبانه کیم ایاقدان سالدیلار

گللری چیگنینده بوئنی قالدیلار دلده نوا

حیف اولا بیر دللرین دردین آلان درد اهلینه

درد دل صاحبلرین هجرانی ایتدی بی دوا

حیف او رافت بخش ابوالایتامه یاتدی قبریده

قالدی ایتام و ارامل یولدا گوزلر ٫ بی غذا

حیف او امید فقیران که ترابه قویدی باش

قالدی بیر عده فقیر و دلشکسته بی رجا

حیف اولا بیر چاره ساز و و چارهء درماندگان

گیتدی ٫ باشسیز قالدیلار بیر عده درده مبتلا

حیف او مولا گئتدی الدن کول آلندی باشلارا

شیعه نی ایتدی عزالی آلدی دللردن صفا

حیف او شاهین فضای دین قالوب پروازدن

سست عنصر کرکسه اما وسیع اولدی فضا

حیف ایله قرآن ناطق که خموش اولدی خموش

ویرمدی فرصت او شاهه بو جهان تنگنا

بیله تشییع جنازه بیله دفن و کفندن

یاده دوشدی دفن وکفن شهریار کربلا

دوشدی قالدی گون ایوینده فاطمه اوغلی حسین

قانه غلطان ٫ خسته ٫ یورقون ٫ سر بسر پیکر یارا

دفن و کفنه حضرت سجاد گلدی کوفه دن

گوردی واردی کربلا دشتینده بیر عالی صفا

باخدی اول قانلی بیابان ایله عطریله دولوب

عطر آپارور جنته هر دم اسور باد صبا

جویبار عشقدور دوشموش ایاقدان سرولر

گل کیمی خندان اولوب یتمیش ایکی گلگون قبا

تاپدی اوّلده آتا نعشین دولاندی باشینه

حلق مذبوحیندن اوپدی گوزه اشک پر بها

بولمورم آیری کفن تاپدی او عالی قامته

بیر حصیری چولقادی یا جسمینه اول مقتدا

بوتراب اوغلون ترابه تاپشیروب رمزا دیدی

توپراق اولسون باشینه بو عالمین سنسیز بابا

تاپدی اصغر نعشینی ویردی آتا آغوشینه

حشره تک یاتسون آتانین سینه سی اوسته بالا

دفن ائدوب پائین پاده شاهزاده اکبری

یاتدیلار بیر قبریده مظلوم اوغول مظلوم آتا

شمع دینین جمع ایدوب یتمیش ایکی پروانه سین

بیر مزاره قویدی جمعین ٫ بیر مزار ایتدی بنا

یعنی بو بیر جمع دور جانلاری بیر٫ قانلاری بیر

 اوزلری بیر ٫ سوزلری بیر ٫ بیر مرامه آشنا

جامه سرخ شهادت سرخ صحراده گیوب

سرخ رو ئوز جانلارین اسلامه ایلوبلر فدا

یوز قویوب سمت فراته دیده خونباریله

حالی چوخ پوزقون ٫ شکسته  نی کیمی دیلده نوا

جویبار عشق ایدوب گوردی کنار علقمی

قان آرا دوشموش او سرو بوستان مرتضا

بی مروتلر قریبلار قول بوداقین ظلمیله

خار تیریله دولوب گل پیکری باشدان باشا

نیزه پوش اولموش وجودی گل کیمی اوراق دور

گلموری اعضا اله ٫ حملی اونون امکان تاپا

دوشدوقی یرده قازوب بیر خیردا مدفن آغلادی

اوز عموسین قویدی قبره اودلی دیده آه و وا

گتدی قویدی سینه سی اوسته کسیلمیش اللرین

تا او اللر خدمتینده شاهد عدلین اولا

ای صبا ام البنینه ویر خبر قان اغلاسون

خیرداجا بیر قبریده یاتدی ایله قد رسا

(تائبا) یوردی سنی پیر ایلدی بو چرخ پیر

قدیوی بوکدی او موزون قامتون ایتدی دو تا

دلده ذکر کربلا اوز گونلرون ویردون باشا

گیتدی عمرون قالدی دلده آرزوی کربلا

دامن عباسی دوت یالوار اوزی ایستر سنی

گیت ضریحیندن یاپوش اهل عزانی قیل دعا