ای جمالی کعبه ی اهل حقیقت یا علی

سن شهید اولدون شهید اولدی عدالت یا علی


ای جمالی کعبه ی اهل حقیقت یا علی

سن شهید اولدون شهید اولدی عدالت یا علی

کوفه ده ظاهرده بیر یعسوب دین اُلدوردولر

باطناً آیات قرآن مبین اُلدوردولر

یعنی کفر اهلی امیرالمومنین اُلدوردولر

قویدولار اسلامیده ظلم اهلی بدعت یا علی

بیر نه تک آل علینون قلبینی قان ایتدیلر

بیر غلط منظوری بو مورد ده عنوان ایتدیلر

وجه وجهُ اللهی القانیله الوان ایتدیلر

قانیویله دولدی محراب اطاعت یا علی

بو غلط حکمه بو گون دشمنده ایلر اعتراف

عمروعاصیله ایدوب تا پور سفیان ائتلاف

حُکم منفور حَکَم اسلامیدی آچدی شکاف

قالدی بو آثار شومی تا قیامت یا علی

زاده ی ملجم، او بی شرم خطاکار و لعین

اولدی تا بیر بی حجابیله گئجه خلوت نشین

وعده ی وصل آلدی اولسون مُنهَدم ارکان دین

قتلیوه اولدی اودا بیر عمده علّت یا علی

اوز جمالین بی حیا قُطّامه تا ویردی نشان

زاده ی ملجمدن آلدی جلوه سی تاب و توان

بیر وصالین شزطی قتل حجّتُ ا..َ. دور تمام

وای اگر انسانه نفس ایتسه حکومت یا علی

اوندا که مشغولیدون سن حضرت معبودیله

سجده ده سرگرمیدون بیر شاهد مشهودیله

ووردی بیر ضربت باشوندان تیغ زهر آلودیله

پایه ی اسلامی سیندیردی او ضربت یا علی

مسجده بیر خیمه وورموشدی او بی شرم و عفاف

معتکف ظاهرده، امّا دلده قصد انحراف

آه از آن احیای قدر و وای از آن اعتکاف

قتلیوه اولدی زمینه بو عبادت یا علی

هر کسی خالق ایدر اوز قدرتینجه امتحان

راستی حیرتده دور بو آزمایشده جهان

سجده دن سن باش گوتوردون ویرمدی دشمن امان

تیغ کینی ایتدی فرقوندن اصابت یا علی

اولدی بیر شمشیریله رکن هدایت مُنهدم

گَلمسه اوغلون بو شیرازه اولانماز مُنسجم

چون آلار بو قانلاری بیر گون امام مُنتقم

حق او مولایه ویروب بو امره نصرت یا علی

تا ایشیتدی جبرئیلین صیحه سین آل رسول

مسجده یوز قویدولار گوز یاشلی، محزون و ملول

گَلمدی امّا کناره دخت زهرای بتول

پشت درده دوردی اول کان حمیّت یا علی

کربلاده بُلمورم گوردی نجه قارداشینی

ابر باران تک توکوب رخسارینه گوز یاشینی

معجریله باغلادی محکم خانم اوز باشینی

قتلگاهه گَلدی اول دریای عصمت یا علی

بُلمورم شمریله ایتدی ایتمدی جنگ و جدال

خنجریله بُلمورم دوغرانمادی دوغراندی اَل

بو قَدَر وار سَسلدی ناگه بابا فریاده گَل

صور محشردی دوتوب دنیانی ظلمت یا علی

کربلاده گَل بابا بو قان دولان میدانی گور

باد ظلمیله بو صحراده قوپان طوفانی گور

زینبی، شمری، حسینی، قانلی بیر دریانی گور

بو کشاکشده منه ایله حمایت یا علی

ماجرای قتلگاهی ایلمه «خوندل» بیان

قانلی بیر دریادی، گیتسن غرق اولارسان بی گمان

بیر گَزَر اوردا مروّت سیز ستمگر ساربان

هر کس اوز مولاسینه ایتمز جسارت یا علی