اماندی گیتمه دایان بابا گیتمه

گئجه وقتی باغریقان بابا گیتمه

اورک غمین گیزلدن بابام ایوای

یارالی قبره گیدن بابام ایوای


اماندی گیتمه دایان بابا گیتمه

گئجه وقتی باغریقان بابا گیتمه

اورک غمین گیزلدن بابام ایوای

یارالی قبره گیدن بابام ایوای

بابا نظر ایله بیر من زاره

آخور دالونجا سرشکیم عذاره

دایان بیرده باشیوه دولانوم من

آنام تک گیتمه گئجیله مزاره

دایان اورک داغلیوم باباجان گیت

دویونجان بیر آغلیوم باباجان گیت

اجازه ویر باشیوین یاراسین من

آچوم بیرده باغلیوم باباجان گیت

سنه بو چرخین نه اولدی وفاسی

جفا الیله چوخ اولدی بلاسی

سنی ایاقدان سالانمادی امّا

ایاقدان سالدی ثقیفه جفاسی

ثقیفه نون ظلمه عرشی دایاندی

ملک اجازه آلان قاپی یاندی

آنام سنون حفظ حرمتون اوسته

قاپی دالیندا قالوب یارالاندی

همان گونده عمریوین گلی سولدی

یانیقلی قلبون ملالیله دولدی

او گونکه گوردون آنامی یارالی

سنه نه اولدی بابا او گون اولدی

او گون آهون چرخ اطلسه چخدی

مصیبتلر اودلی قلبیوی سخدی

سندی دعواده یخانمادی دشمن

آنامون دردی ولی سنی یخدی

عجب باشیم دوشدی درد و بلایه

گئجه گوندوز گلّم آه و نوایه

بیله یانماق آغلاماق منه ایمدی

زمینه دور دشت کرب و بلایه

او گون راز قلبیمی بولن اولماز

اورک غمیم کیمسیه علن اولماز

بو عالمده جان ویرنلرین نایچره

حسین تک نسگلّی جان ویرن اولماز

آنام دیوبدی نلر اولاجاقدی

ملالیله قلبلر دولاجاقدی

سموم ظلمیله دشت بلاده

حسینیمون گلشنی سولاجاقدی

او گون همین کوفیان بداختر

ایده لّه غارت خیامی سراسر

گورنده اشراری قمچی الینده

اوشاقلار برگ خزان کیمی تیترر

او صحراده دللر اودلاناجاقدی

خیام عصمت الولاناجاقدی

سراسیمه وحشتیله قاچاندا

سکینه نین دامنی یاناجاقدی

تقاضا ایلیوبدی مونسی بابا

بو شعری ایلوبدی «جابری» انشا

نجف الاشرف براتینی ایله

بو ایکّی مدّاحیوه صله اعطا