آیینه فلق د ه دلیل ضیا علی 

ذرات کایناته سالوب سایه رحمتون


آیینه فلق د ه دلیل ضیا علی (ع)

ذرات کایناته سالوب سایه رحمتون

شمس وقمر گوزوندن آلوب انجلا علی (ع)

هرگون فلکده گون بو خیالیله سیر ائدر

باش آستانیوه قویوب ائدسین ثنا علی (ع)

عقباده باشینه قویاجاق تاج اتقیا

هر کیم سنی جهاندا بیله مقتدا علی(ع)

رحمت گوزونده بیردی فقط شرطی صدقدور

فرق ایلمز جنابیوا شاه و گدا علی (ع)

درویش سهل دور ائده اظهار احتیاج

شاهلار قاپوندا هر دم ائدر التجا علی(ع)

الله دئمم جنابیوا بو شرک محض دور

اللهه بنده سن بیزه اما خدا علی(ع)

کوثر سنیله کوثر اولوب باغ خلددا

سن اولماسان ندور شرف ماسوا علی(ع)

سن سن ایکی جهاندا یقینیم دی شبه سیز

سلطان ملک عشق و امیر ولا علی (ع)

(عابد) گوزل طریق ایله بو شعری درج ائدوب

منده گرک بو بیته ائدم اعتنا علی (ع)

«باش سجدیه قویاندا مصلای عشقده

ایلوب سنه حقیقت دین اقتدا علی (ع) »

تفویض ائدیبدی ما خلقی حق جنابیوا

تحت حکومتینده دی ارض و سما علی(ع)

فرمان سنوندی ئولدوره سن یا دیریلده سن

خلاق ائدوب بو امری سنه چون عطا علی(ع)

مالک رقاب سن هامی مخلوق عالمه

عالم اولار گر اولماسا لطفون، فنا علی(ع)

خضره ولایتیندی وئرن عمر جاودان

موسایه رحمتون دی اولان رهنما علی (ع)

نمرود اودون خلیله صفادن بهشت ائدن

طوفاندا نوح کشتی سینه ناخدا علی (ع)

خلقتده خلق اولوب سیزه خاطر بو عرش و فرش

شاهد بو مدعایه حدیث کسا علی (ع)

مولا علی نی سسلماقون وار شرایطی

هرکیسمه ذکر ائده آدین ، اولماز رضا علی(ع)

من باور ائتمرم بو محال امر دور عبث

هر کیم یازوب که قاتلی ذکر ائتدی یا علی(ع)

بیجا یازوب او شاعر غالی محالدور

ضربتلینده ذکر ائده یا مرتضی علی (ع)

شرم ائتمیوب خدادن او شاعر اوتانمیوب

او شعرده ائدوبدی عجب ادعا علی (ع)

اولمازدی ابن ملجم او کرداره مرتکب

بیر دفعه سسلییدی خلوصیله یا علی(ع)

دوت دامن ولایتی شب خیز چکمه ال

بنده حساب ائده سنی درگاهه تا علی (ع)