نقل مجلس هامی یرده حسنین سوزلریدی

او که پیغمبره بنزر حسنین گوزلریدی


نقل مجلس هامی یرده حسنین سوزلریدی

او که پیغمبره بنزر حسنین گوزلریدی

اونی تعریف ایلین من دگولم ، ئوزلریدی

عصمتین گر یانا بیر پرده اون اوچ مصباحی

دل آچوب مدحه اولاللار حسنین مداحی

یوسفین حسنی گوزلدی حسن اوناندا گوزل

گر مثلده او شکر اولسا بودور قند عسل

گور نه زیبا یارادوب نقشنی نقاش ازل

گورسه رویاده ده سیماسین اولار گوزلر مات

او جماله دیر عشاق محمد صلوات

قلبلر مملکتینده اودی حاکم اودی شاه

حسن چرخینده گوزللر هامی اولدوزدی او ماه

مه لقایان پری چهره اونا خاطرخواه

اشتباه ایلور اونی اوخشادا هر کیم ملکه

اولماسیدی او ، چخانمازدی ملکلر فلکه

گورمیوبسن نه بیلورسن نجه زیبادی حسن

بو قدر بل که مراد دل زهرادی حسن

من نه تعریف ایلسم قطره و دریادی حسن

گر مرکب اولا مین بحر ، قلم جنگللر

شرح حسنون یازا بیلمز بو یارانمش اللر

وصف دریایه بیزیم سوزلریمیز چون خسدی

نه دیوم ، ایوده کس اولسا ایله بیر سوز بسدی

مصطفی روز ولادت اونا قربان کسدی

وقت افطار آچیلوب سفره احسان حسن

اهل قرآن دئدی جانیم اولا قربان حسن