حرمله ایری کماندا دوز اوخا ویردی مکان

ایتدی اوچ پر تیکانا غنچه نوبازی نشان


حرمله ایری کماندا دوز اوخا ویردی مکان

ایتدی اوچ پر تیکانا غنچه نوبازی نشان

او قوی دست چکوب شدت قهریله کمان

اوخ یولا دوشدی هوا اوسته مسیرین تاپدی

عجلیله صود اسیرین سو اسیرین تاپدی

ساغر صبری او پیکان عداوت جالادی

دگدی نازک بوغازا شاه رگین پارچالادی

دئین اولمادی بیر آز رحم ایله دلسیز بالادی

سن که بو حالتیله پارچالادون آی پاراسین

عمه سی نه آناسی باغلیا بیلمز یاراسین

دم فولادیله یوخ نسبتی ریحان ترون

آدون اوخدور ولی خنجر کیمی واردور کسرون

اوچ یره بولدی بوغازین بونون اوچ تیزپرون

خوار اولیدی سنی گل برگنون اوسته آتانی

دیجگین یاره لدون هم بالانی هم آتانی

آغ گیندیردی گوزل اوغلونا بیچاره رباب

سو تمناسینه گوندردی ئورکده تب و تاب

قلب زهرانی ایدیب حرمله نون ظلمی کباب

جان ویرن وقته او دلسیز بالانین چمکی نازین

گوزلرین باغلادی اول صورا اوپدی بوغازین

دگدی اوخ اسدی او طفلین چنه سی هم بدنی

سوز بیله گلدی ندوم ایلمه تنقید منی

ساده تشبیه وروم حالی ایدیم درده سنی

دوشدی نه حاله خبر آلما ربابون چیچیگی

تیز قیچیله تصور ایله نازک ایپگی

لاله مثلی بویادی دوشلوگون آخدوقجا قانی

مرغ بسمل کیمی مظلوم بالانون چخدی جانی

باغبان چکدی گلون اوستن او اوچ پر تیکانی

دئدی اوغلوم سنه اوخ خوان جفادن پایئمش

بو فنا دهرده عمرون ایله آلتی آیئمش

پهلوان ئولدورن اوخ دگدی یازیق بیر اوشاقا

نرم و نازک بوغازی آچدی قولاقدان قولاقا

نه پذیرائیدی بو حرمله ایتدی قوناقا

حقی واردور آنووین باخدیقیجا قلبی یانا

اللریم اوسته جنازون گیدیم ایندی هایانا

قاتلون قوشدی سنون یاسووی اکبر یاسینا

بیر نفر حالی اولان یوخ اورگیم احساسنا

خبرون یوخدی نجه دوشموشم اوز دالداسینا

خاریله برگ گلی پارچالیان اولسون خوار

حلقوین یارسینی گورسه رقیم قورخار

بیله یاتدون بالا یوخ بیرده آیلماق هوسون

کسلوب برده اوجالماز نه سیزیلتون نه سسون

لبلرون گلدی ، نیه گلدی باتاندا نفسون

متبسم دوداقون محنتوی آندیردی

گولمگون آغلاماقوندان منی چوخ یاندیردی

سنسا گل بوته سی ، اوستوندن اولار آویزان

بوینون اوستونده باشون قالدی ایله نامیزان

ایتدی اوخ تازه آچان غنچه نی شبنم ریزان

قاره سی سوزدی گوزل گوزلرینون قالدی آغی

یل کچرتدی ایله بیل شعله سی آز بیر چراغی

اکبرین درد و غمیندن چتین اولدی محنون

قرمزی لاله سی وار سن کیمی هانسی چمنون

خوردا سید یاشلون قرمز اولوب باشدا سنون

پر طاووس مثالی بزنوب قول قانادون

ایدورم بوسه لبوندن قالا آغزیمدا دادون

اولمیوب هیچ ملر آهو بیله صیاده دچار

گیت بو باغلی بلگون بندینی حورالر آچار

صدمه یتسه قفسه قوش پر آچار ، فوری اوچار

سیندی جسمون قفسی سد حیاتی یخدی

جان قوشون شهپر آچوبدور بو غازیندان چخدی