ای غنچه دهن لای‌لای، پیکانی امن لای‌لای

قبری ننه‌ده‌ن گیزلین، قونداقی کفن لای‌لای


ای غنچه دهن لای‌لای، پیکانی امن لای‌لای

قبری ننه‌ده‌ن گیزلین، قونداقی کفن لای‌لای

 

لای‌لای گوز‌لیم لای‌لای، شیرین غز‌لیم لای‌لای

یاز گونلری گول وقتی، سولموش خزلیم لای‌لای

 

آخر گئجه سینمده بیر حالدا سارالمیشدون

چون شمع شبستانی یاندوقجا آزالمیشدون

بیلدیم سحره خاطر، جبرا دیری قالمیشدون

بیلمزدی ندیر دردون سویلردی گور‌ن لای‌لای

 

آشفته هواسیله، فکریم کیمی مختلّم

هر آن اوزومی تاپسام،  بیلسم یئریوی گللم

بیر آز سود امیب، یاتسون منده بالا دینجلم

خوشدور دویا دلبندون اوندان دییه‌سن لای‌لای

 

نسبت آنا عشقینده بیر ذره مجاز اولماز

قانلی دوداقون اوپسم جان نقدینه آز اولماز

کیم بیلمیرم اورگتدی، سنده بئله ناز اولماز

آغلا سسیوه قربان چاللام تزه‌د‌ن لای‌لای

 

شش‌ماهمیله بئش آی گزدیم نئجه داغ داشدا

ال گاه دعادئیدی، گه سینه‌ده گه باشدا

اللیک قوچ اولار قوربان، هئچ اولماسا بیر یاشدا

اللیک یئرینه املیک قوربان کسیلن لای‌لای

 

هر گون نئچه یول اوغلوم، مندن سود امردون سن

دویجاق منه هر لحظه نازیله گولردون سن

آرتیق سودی آغزوندان اطرافه سپردون سن

تئز تئز سنی اوخشاردیم قربان سنه من لای‌لای

 

یادیمه دوشر یارون هر دم دییمر‌م جان جان

اولمادی سودوم مند‌ن اولدون بئله رو‌گردان

لب تشنه چیخان جانه، شرمنده ننون قربان

قویدون منی چوللرده یات قبریده سن لای‌لای

 

آغ دوشلوگ اولار طفله، پاکیزه برازنده

داشلانسا سود آغزیندان سالماز لکه روبنده

آغزوندان آخیب قانون ای آهوی زیبنده

سینوندا چیچک بیتمیش خنداندی چمن لای‌لای