بالام اوخلانیب، الیمده سپه ظلامه یا رب

نه یوزیله بو بالانی، آپاریم خیامه یا رب


بالام اوخلانیب، الیمده سپه ظلامه یا رب

نه یوزیله بو بالانی، آپاریم خیامه یا رب

 

گورونوبدی  هانسی شمسون بئله بیر شهاب الینده؟

سود امر بالا آتانین ائده پیچ و تاب الینده

نئجه گور خسوفه یتدی قمر آفتاب الینده

بو هلالیم ائتدی سیرین یئتیریب تمامه یا رب

 

دَگیب اوخ ائدیب تهیّه بوغازیندا یاره یاره

قولوما گئچیب بوغازین، ستمیله یاره یاره

آپارام اگر خیامه، بئله حلقی یاره یاره

آناسی ربابون عمری یتیشمر تمامه یا رب

 

منی پیر ائدیبدی دوران آلیب اکبری الیمد‌ن

داخی وئرمیشم بو چولده هامی یاوری الیمد‌ن

الی یوخ گله ابوالفضل، آلا اصغری الیمد‌ن

وئره لااقل تسلّی من تلخ کامه یا رب

 

سپیرم سمایه قانین، اولا ساق عرشه زینت

دم حشر اولونجا بو قان، قالا عرشیده امامت

قوروب عدل دادگاهین، ائد‌سن اوزون قضاوت

وئر‌سن عذاب آتش، سپه لئامه یا رب

 

بوغازیندا یاره گل تک، نئجه گور اولوبدی  خندان

نفسین آلیب وئرنده، یاراسی وئریر قیزیل قان

الیم اوسته شیرخواریم، ال آیاق چالیر وئریر جان

ایلییر اثر بو حالی، دل خاصّ و عامه یا رب

 

نه قدر منه مصیبت وئره یوز دوزوب دایانام

نه قدر منه بو لشگر وورا یاره سهل سانام

ولی من بو شیرخواره، بالاما باخاندا یانام

دئییرم ندیر گناهی، نئدیب اهل شامه یا رب

 

دیل آچاندا احتجاجه، دله التهاب گلدی

اوره‌گیم آلیشدی گوزد‌ن، یوزه اشگ ناب گلدی

بالاما سو ایستدیم من، اوخولان جواب گلدی

همین اوخ یئتیردی عهد اَزلی ختامه یا رب