قویارام مزاره اصغر سنی تا قیامت اولسون

بوغازون بیچیلدی باری، بدنون سلامت اولسون


قویارام مزاره اصغر سنی تا قیامت اولسون

بوغازون بیچیلدی باری، بدنون سلامت اولسون

 

بیلیرم اگر بو چولده، سنی قویماسام مزاره

آت آیاغی آلتدا نعشون، اولار اوندا پاره پاره

وورولار باشون جدایه، ییخیلار ائویم دوباره

دگیلم رضا عربده، بئله بدعت عادت اولسون

 

اوخ آتان گوروم شل اولسون، بو قدر شقاوت اولماز

هدف ائیله‌ییب بوغازون، بئله بیر عداوت اولماز

بوغازونداکی یارون تک، گوروره‌م جراحت اولماز

نئجه تاب ائدیم نه نوعی، اورگیمده طاقت اولسون؟

 

سنیلن گر‌ک قویام من، او قدر دوداق دوداقه

توکوله سرشگ چشمیم سونه آتش علاقه

او قدر اوپم گر‌ک دل، یئته حدّ اشتیاقه

منه شهد ناب مقصد آناوا نیابت اولسون

 

شُهداد‌ن اولسون اصغر، گر‌ک عالی امتیازون

اودور ائیلمرهم زیارت، اوپمر‌م بو گول بوغازون

قویارام یئره جنازون، قیلارام اوزوم نمازون

سنه امتیاز عالی، منه‌ده عبادت اولسون

 

قویاجاخلا دفن ائدنده، سنی سینه‌مه دوباره

سنیلن گر‌ک یئتم من، شرف حضور یاره

الیم اوسته من آپاررام، سنی مجلس نگاره

گر‌ک عاشقین الینده، گل باطراوت اولسون

 

خوش اولار تفاخر ائیلر، آنالار اوغول سوزوندن

دانیشانمادون سن امّا، آناوین اور‌ک سوزوند‌ن

سنی گورسه من گور‌ن تک، گئدمر اوندا اوز اوزوند‌ن

اودو قورخورام غموندان، آناوا هلاکت اولسون

 

آناوی مذمّت ائتمه، خط غم چکیب نشاطه

یوزووی خراش ائدیردون، قویوب اللرون قماطه

دولاشیب قماط بندی، سنی ائیله‌ییب احاطه

ال آیاق چالانمیسان تا، سنه مرگ راحت اولسون

 

دم حشر اولاندا نعشون، الیم اوسته ساخلارام من

قانیوین بهاسین آللام، هامینی باغیشلارام من

سنه هر کیم آغلایبیدیر، گر‌ک اوندا آختارام من

اولارا بو پاک قانون، سبب شفاعت اولسون