اوغول مروّت ایدوب قوم بی مروّت عجب

گلوب ترحّمه بو رحمیسیز جماعت عجب


اوغول مروّت ایدوب قوم بی مروّت عجب

گلوب ترحّمه بو رحمیسیز جماعت عجب

باخوب سَنه گلوب انصافسیزلر انصافه

یانوب مصیبتوه لشکر شقاوت عجب

ایدوبدیلر سارالان رنگوی عقیق کیمی

سولان گُلیم نه گوزل تاپموسان طراوت عجب

گوروبله سوز عطشدن دوشوب وجودیوه سوز

سپوبله سو کیمی قانون، سونوب حرارت عجب

عجب سو ویردیله اولدون خلاص زحمتدن

نه یاخشی یوخلاموسان تاپدون استراحت عجب

نه دلدی من دیورم والهم اوزومده علی

خیال عجب، سوز عجب، حال عجب، حکایت عجب

نه سوز نجه یوخی گوررم که گلموری نفسون

گنه دانشدیریرام منده واردی غفلت عجب

نجه سودور که ایدوب نشئه سی سنی مدهوش

قویوب حکیم قضا ظلم اوخوندا لذّت عجب

نقدر اوخ سنه خوش گلدی شوقدن گولدون

بوغازون اوخ یاراسیندان آلوب حلاوت عجب

سَن اوخلانونجا علی کاش اوخلانِیدیم اوزوم

ویرِیدی سَن تک آنان جان، اولِیدی راحت عجب

سنی بو نوع گورونجه اولوم منه خوشدی

ندندی اولمَز آنان واردی منده طاقت عجب

خزانیدون ولی لاله کیمی گُل آچدی یوزون

چَکیلدی سینه مه آخِرده داغ حسرت عجب

نه ذهنیدور که مقاماته اوج ایدر ذهنی

یقین که روح قُدُسدور ویرور مهارت عجب