گهواره ده ایمدی سسون آلدیم بابا لبّیک

امدادیوه من آخِره قالدیم بابا لبّیک


گهواره ده ایمدی سسون آلدیم بابا لبّیک

امدادیوه من آخِره قالدیم بابا لبّیک

تا گَلدی سسون ایتدی بو دعوت منی خرسند

گَل بُل منیده لایق درگاه خداوند

آند اولسون عزیز جانیوه، جانانیوه سوگند

گهواره ده ایمدی سسون آلدیم بابا لبّیک

بیر عمر که گوندوز گئجه فریاده گَلوردیم

من محض بو ساعتدن اوتور داده گَلوردوم

بُلسِیدیم اگر اذن وار امداده گَلوردوم

گهواره ده ایمدی سسون آلدیم بابا لبّیک

گلجک سسون اوّل بابا حیرتده دایاندیم

یانمش جگریله گنه بو حالیوه یاندیم

گوردوم سو ویرور حرمله یاتمشدیم اویاندیم

گهواره ده ایمدی سسون آلدیم بابا لبّیک

جانانیوه قربان ویریلن نچّه نفردن

منده بیرییَم، قویما قالوم من بو سفردن

گَلَّم اَلون اوستونده گِچَم مدّ نظردن

گهواره ده ایمدی سسون آلدیم بابا لبّیک

سانما منی بیر غنچه ی نشکفته ی گُلدور

چوخ آغلامیشام، گَل آل آپار گُل کیمی گُلدور

ویر اوخ دمینه شانیمی عالملره بُلدور

گهواره ده ایمدی سسون آلدیم بابا لبّیک

من بیله بُلوردوم چَکیلن یانه دگلدوم

کیم لایق قربانگه جانانه دگلدوم

یار اولماقا من که بابا بیگانه دگلدوم

گهواره ده ایمدی سسون آلدیم بابا لبّیک

بو گون هر آنا باشین اوغول مرگی اوجاتدی

باطنده آنام رنگینی بو غصّه ساراتدی

بیر نوعی بو ساعت اودا مقصودینه چاتدی

گهواره ده ایمدی سسون آلدیم بابا لبّیک

شیون اوجالانمشدی ز بس اهل حرمدن

گَلمزدی سسون خیمیه بو نچّه قدمدن

بُلموردوم علمدارون اَلین اوزموش علمدن

گهواره ده ایمدی سسون آلدیم بابا لبّیک

ویردون نچه قربان هاموسی گوزلری مکحول

قربانلاریوی ایلسون ا... اوزی مقبول

بُلدون نه عجب بو قوزی قربانیده معمول

گهواره ده ایمدی سسون آلدیم بابا لبّیک

آلجاق سَسیوی مهد منی سخدی لَحَد وار

سالدی یره، بو واقعه دن ایتدی خبردار

یتدی منه ده اوزگه لره کشف اولان اسرار

گهواره ده ایمدی سسون آلدیم بابا لبّیک

من لایق درکم، نه بابا قابل ترکم

تازه ویری باش شاخه ی گُلده من او برگم

گَل آل اَلون اوسته نجه گور شایق مرگم

گهواره ده ایمدی سسون آلدیم بابا لبّیک

قربان سنه، کیمدور که سنون تک ویره قربان

اکبر تک اوغول امّت پیغمبره قربان

ویر اصغریده اوغلون علی اکبره قربان

گهواره ده ایمدی سسون آلدیم بابا لبّیک

سوز عطش ایلوبدی اگرچه منی بی تاب

من طالب اولان سو دگُل امّا بابا نایاب

اِلّا دمِ پیکان ایلمز اصغری سیراب

گهواره ده ایمدی سسون آلدیم بابا لبّیک

لایق دگی هرگز باباجان شانیمی تصغیر

بیر اوچیه ویرموبله نشان من کیمی نخجیر

آمادیم اُلماقه یولوندا هدفِ تیر

گهواره ده ایمدی سسون آلدیم بابا لبّیک

صافی سنه بو طرز سخن بسدی مقدّر

بُل قدرینی استاد سوزین سانما محقّر

هر بیتیده قیل مصرعی آخِرده مکرّر

گهواره ده ایمدی سسون آلدیم بابا لبّیک