ای خدا اوزون شاهد اول بونا اوخلانان علی اصغریمدی بو

قانینی سنه تحفه یولّورام عرشیوه سنون زیوریمدی بو


ای خدا اوزون شاهد اول بونا اوخلانان علی اصغریمدی بو

قانینی سنه تحفه یولّورام عرشیوه سنون زیوریمدی بو

چکمیشم خزان دردی یِتمیشم عالم وفا نوبهارینه

سو یرینه قان ویرمیشم بو گون گلستان دین لاله زارینه

رسمیدور قزل گُل نثار ایدر عاشق اوز وفالی نگارینه

گرچه بیر صولان غنچه دی ولی دسته ی گُل اَحمریمدی بو

تا یازیلدی طومار ابتلا مطلعی من اولدوم او دفترین

یازدیلار متمّم او دفتره آدینی ابوالفضل و اکبرین

ایله فدیه لر ویرمیشم بو گون گورمیوب فلک مثل و مظهرین

دفتر شهادتده حشریده شاهکار و سر دفتریمدی بو

مقصد اَلستیم گَلوب اَله بو حسین الهی بو کربلا

بو قُماط اصغر او حرمله بو بوغازداکی ناوک جفا

ویرمیشم بو گون کوی عشقیده شوق اوزیله یِتمیش نفر فدا

تک به تک اولار اصغر اولسالار شاهد اول اوزون اکبریمدی بو

ایلدی بنی هاشمین آیی خاک و خون ایچینده بو گون خسوف

آسمان عمریمده اکبریم آفتابیدی ایلدی کسوف

ظلم اَلیله اوخلاندی اصغریم باشی نیزیه گیچسه یا رئوف

باشینی گورن نیزه ده بُلر آی یانینجا بیر اختریمدی بو

سوگُلون حسینم کمکسیزم، حالیمی ایدن کیمسه یوخ سراغ

اولموری رضا اهل کوفه من غصه دن تاپام بیر نفس فراغ

اکبرین هله داغی گیتمیوب چکدیلر او داغ اوسته تازه داغ

وار یری دلیم اود دوتوب یانا پاره ی دل مضطریمدی بو

یالقوزام غریبم اوغولسوزام دشمنیم منیم چوخدور ای خدا

بو دیار غربتده بر نفر دادیمه یتن یوخدور ای خدا

سسلینده هَل مِن مُعین منه سس ویرن قلج اوخدور ای خدا

قیزلاریم سو ایستور خجالتم رفع خجلته رهبریمدی بو

یوخ آلان اَلیمدن جنازه سین سوزِ غم ایدوب قلبیمی کباب

اوغلوم اکبرین گَلموری سسی هر چه ایلورم نعشینه خطاب

قارداشیم ابوالفضلی سسلورم نیزه و قلجلار ویرور جواب

گیزله دَم گرک زیر خاکیده پر بها دُر و گوهریمدی بو

بو جماعت شام و کوفه نین وصفه گَلمین دور شقاوتی

وار بو غنچه ی نو شکفته نون برگِ گُلدن آرتوق لطافتی

سود اَمَر اوشاق نازنین بدن سُمِّ مرکبیله نه نسبتی؟

ایستورم وجودی تاپولماسون دلده مقصد مُضمریمدی بو

ای حبیب من اوخلانوب بالام منتهای مقصوده چاتمیشام

باغریما باسوب قانلی قونداقین سر به سر اوزوم قانه باتمیشام

اصغریم ایله حالیمی پوزوب اکبریمی یاددان چخاتمیشام

بُلمورم آخور قانی قلبیمون یا که اشگ چشم تریمدی بو

بیر نفر کمک سیز غریبیده نه قَدَر اولور ای خدا دوزوم؟

هر یانا بو چولده بو گون باخور دوغرانان جنازه گورور گوزوم

عرصه گهده دورسام قوشون گُلر خیمیه گیدوم گَلموری یوزوم

دوشموری دلیمدن علی آدی بسکه دلده چوخ از بریمدی بو

قان دوتوب بوغازین باتوب سسی آغلامور داخی ایلیوبدی خواب

عُذریله آناسیندان آلموشام وعده ویرمیشم اصغرینه آب

نه یوزیله من خیمیه گیدوم خیمه نین قاپوسین کَسوب رباب

حقّی وار گوروب قونداقین دیسه بوش قفسدی یا اصغریمدی بو؟

سس یِتیشدی دربار قدسیدن آغلاما حسین، صبر ایله دایان

وار بهشتیده دایه سی بونون گوزلوری بالان فاطمه آنان

تحفه یولّادون قانین اصغرین درگهیمده قیمتلی دور بو قان

باشلاناندا دیوان معدلت لطف و قهریمه مصدریمدی بو

باخما اصغره یانما آغلاما، کائناتی یاندورما یا حسین

سود اَمَر بالان باغریوا باسوب چوللری دولاندورما یا حسین

چرخ اطلسین دامنین بیله قانیله بویاندورما یا حسین

چرخیده شفق تک قالار بو قان زینت خورِ اَنوریمدی بو

سن منیم یولومدا بو سود اَمَر طفلی ایلدون تشنه لب فدا

تا که جدّیوین امّتی اولا نار قهریدن حشریده جدا

منده بو بالایه بغیشلرم ایتسه لر حسینی لرون خطا

شامل ایلرم لطفیمی دیسه هر او کس منه- سروریمدی بو

اولمیوبدی اولماز سنون کیمی بیر نفر وفاسین نشان ویره

سو یرینه سو اولمیان زمان نخل دین اسلامه قان ویره

ساخلاما اَل اوسته چکیده ی جانیوی یره قوی که جان ویره

ایچمیوبدی ایچمز فراتیدن، تشنه ی یَمِ کوثریمدی بو

ایچمه میشدی سو تشنه کامیدی، غنچه تک سارالمشدی صورتی

قانیله بویاندورموسان یوزین قرمزی گُله وار شباهتی

منتظردی زهرا گوزَتلوری بو گُلِ ریاض ولایتی

پیشوازینه مرتضی چخوب میهمان پیغمبریمدی بو

دوتما گوگلره قانلی صورتون، قان یاشیله دولدورما گوزلرون

بارگاهیمه سالما ولوله، قوزاما گویه قانلی اَللرون

محضریمده اثبات عهدیوه اکبروندن آرتوقدی اصغرون

بو مناده اکبر فدادی بو، چوخ دیمه داخی اصغریمدی بو

ای حبیب خلّاق لا مَکان، وی شهنشه انبیا غلام

من حسینیم سعدی زمان درگهونده مستخدمم مُدام

یازسان آدیمی کلبِ آستان کائناته فخر ایلرم تمام

تاج و تختیله ایتمرم عوض سن دیسن اگر نوکریمدی بو